നിയമസഭാ ലൈബ്രറിയുടെ ശതാബ്ദി വര്‍ഷം ആശയങ്ങളുടെ ആഘോഷവും വിജ്ഞാനത്തിന്റെ ഉത്സവവുമാക്കി മാറ്റുമെന്നും ലൈബ്രറി സേവനങ്ങള്‍ പൊതുജനങ്ങള്‍ക്കുകൂടി പ്രാപ്യമാകത്തക്കവിധം ജനകീയമാക്കുമെന്നും നിയമസഭാ സ്പീക്കര്‍ എം.ബി. രാജേഷ്. നിയമസഭാ ലൈബ്രറിയുടെ ശതാബ്ദി ആഘോഷം ആര്‍. ശങ്കരനാരായണന്‍ തമ്പി മെമ്പേഴ്സ് ലോഞ്ചില്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
നിയമസഭയുടെ രേഖകള്‍ ഗവേഷകര്‍ക്കും വിദ്യാര്‍ത്ഥികള്‍ക്കും ഉപയോഗിക്കത്തക്ക വിധം ലൈബ്രറി രീതിയില്‍ മാറ്റം വരുത്തുകയും ചെയ്യും. അറിവിന്റെ കുത്തകവല്‍ക്കരണമല്ല ജനാധിപത്യവല്കരണമാണ് വേണ്ടത്. ആധുനിക സാങ്കേതിക വിദ്യയുടെ സാധ്യതകള്‍ ഉപയോഗപ്പെടുത്തി ഏകദേശം 20 ലക്ഷം പേജുകള്‍ ഡിജിറ്റൈസ് ചെയ്യുമെന്നും അന്താരാഷ്ട്ര പ്രസാധകരെക്കൂടി ഉള്‍പ്പെടുത്തി പുസ്തകോത്സവം സംഘടിപ്പിക്കുമെന്നും എം.ബി രാജേഷ് പറഞ്ഞു.
ആഘോഷങ്ങളുടെ ഭാഗമായി ജില്ലകളില്‍ പുസ്തകോത്സവം സംഘടിപ്പിക്കുന്നതിനും നോബല്‍ ജേതാക്കളെ ഉള്‍പ്പെടുത്തി പ്രഭാഷണ പരമ്പര സംഘടിപ്പിക്കുന്നതിനുമുള്ള നിര്‍ദ്ദേശം ലഭിച്ചിട്ടുണ്ടെന്നും സ്പീക്കര്‍ പറഞ്ഞു. ശതാബ്ദി ആഘോഷങ്ങളുടെ ലോഗോ പ്രതിപക്ഷ നേതാവ് വി.ഡി. സതീശന്‍ ലൈബ്രറി ഉപദേശക സമിതി അംഗം ഡോ.എം.കെ.മുനീര്‍ എം.എല്‍.എ യ്ക്ക് നല്‍കി പ്രകാശനം ചെയ്തു. നിയമസഭാംഗമായ കാലം മുതല്‍ തന്നെ നിയമസഭാ പ്രവര്‍ത്തനങ്ങളില്‍ ലൈബ്രറിയുടെ സേവനം പ്രയോജനപ്പെടുത്തിയിട്ടുണ്ടെന്നും 1,14,000 വൈവിധ്യമാര്‍ന്ന പുസ്തകങ്ങളുടെ കലവറയാണ് നിയമസഭാ ലൈബ്രറിയെന്നും പ്രതിപക്ഷ നേതാവ് പറഞ്ഞു.
ചടങ്ങില്‍ ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍ അധ്യക്ഷത വഹിച്ചു. ലോഗോ രൂപകല്പന ചെയ്ത ബിജു ഡേവിഡ് ജോണ്‍സിനെ ചടങ്ങില്‍ അഭിനന്ദിച്ചു. റവന്യൂ മന്ത്രി കെ.രാജന്‍, ചീഫ് വിപ്പ് ഡോ എന്‍ ജയരാജ്, എം.എല്‍.എ മാരായ മാത്യു ടി തോമസ്, മോന്‍സ് ജോസഫ് എന്നിവര്‍ ആശംസാ പ്രസംഗം നടത്തി. നൂറാം വാര്‍ഷികം പ്രമാണിച്ച് വായനയും സാമൂഹ്യ പരിവര്‍ത്തനവും എന്ന വിഷയത്തെ ആസ്പദമാക്കി സംസ്‌കൃത സര്‍വകലാശാല മുന്‍ പ്രൊവൈസ് ചാന്‍സലര്‍ ഡോ. കെ.എസ്.രവികുമാര്‍ പ്രഭാഷണം നടത്തി.
ചടങ്ങില്‍ ലൈബ്രറി ഉപദേശക സമിതി ചെയര്‍മാന്‍ തോമസ് കെ.തോമസ് എം.എല്‍.എ സ്വാഗതവും സമിതി അംഗം കെ. അന്‍സലന്‍ എം.എല്‍.എ കൃതജ്ഞതയും രേഖപ്പെടുത്തി.
ഡോ.കെ.എസ്. രവികുമാറിനുള്ള നിയമസഭയുടെ ഉപഹാരം സ്പീക്കര്‍ നല്‍കി.
ശതാബ്ദി ആഘോഷങ്ങളുടെ ഭാഗമായി സംഘടിപ്പിച്ച സാമാജികരുടെ ഗ്രന്ഥങ്ങള്‍ ഉള്‍പ്പെടുത്തിയ പുസ്തക പ്രദര്‍ശനം രാവിലെ ലൈബ്രറി ഉപദേശക സമിതി ചെയര്‍മാന്‍ തോമസ് കെ.തോമസ് എം.എല്‍.എ ഉദ്ഘാടനം ചെയ്തു. ചടങ്ങില്‍ നിയമസഭാ സെക്രട്ടറി എസ്.വി.ഉണ്ണികൃഷ്ണന്‍ നായര്‍, സ്പെഷ്യല്‍ സെക്രട്ടറി ആര്‍. കിഷോര്‍ കുമാര്‍, ചീഫ് ലൈബ്രറിയന്‍ ജി.മേരി ലീല എന്നിവര്‍ പങ്കെടുത്തു. പുസ്തക പ്രദര്‍ശനം വെള്ളിയാഴ്ചയും തുടരും