ആലപ്പുഴ: ആലപ്പുഴ ബൈപാസില്‍ നിരീക്ഷണ ക്യാമറകള്‍ സ്ഥാപിക്കുന്നതിനുള്ള നടപടികള്‍ വേഗത്തിലാക്കാന്‍ ജില്ലാ കളക്ടര്‍ എ. അല്കസാണ്ടറുടെ അധ്യക്ഷതയില്‍ ചേര്‍ന്ന ജില്ലാ വികസന സമിതി യോഗം തീരുമാനിച്ചു. അപകടങ്ങള്‍ വര്‍ധിച്ചു വരുന്ന സാഹചര്യത്തില്‍ അമിത വേഗത്തില്‍ വാഹനങ്ങള്‍ ഓടിക്കുന്നവരെ കണ്ടെത്തുന്നതിന് ക്യാമറകള്‍ സ്ഥാപിക്കേണ്ടത് അനിവാര്യമാണെന്ന് യോഗം വിലയിരുത്തി.
എച്ച്. സലാം എം.എല്‍.എയാണ് വിഷയം അവതരിപ്പിച്ചത്. സ്പീഡ് ബ്രേക്കറുകള്‍ സ്ഥാപിക്കുന്നതും ബസ് സ്റ്റോപ്പുകള്‍ പുനഃക്രമീകരിക്കുന്നതും ഉള്‍പ്പെടെയുള്ള അടിയന്തര നടപടികള്‍ സ്വീകരിക്കാന്‍ കളക്ടര്‍ കഴിഞ്ഞ ദിവസം ദേശീയ പാതാ വിഭാഗത്തിന് നിര്‍ദേശം നല്‍കിയിരുന്നു. ഫലപ്രദമായ നിരീക്ഷണ സംവിധാനം കൂടി സജ്ജമായാല്‍ മാത്രമേ അപകടങ്ങള്‍ കുറയ്ക്കാന്‍ കഴിയൂ. ക്യാമറകള്‍ സ്ഥാപിക്കുന്നതിനു വേണ്ടിവരുന്ന തുക എം.പിയുടെയും എം.എല്‍.എയുടെയും ഫണ്ടിൽ നിന്ന് ലഭ്യമാക്കുന്നതിനുള്ള സാധ്യത പരിശോധിക്കാനും യോഗം തീരുമാനിച്ചു.
ഹരിപ്പാട് നിയോജകമണ്ഡലത്തില്‍ കടലാക്രമണ ഭീഷണി നിലനില്‍ക്കുന്ന സ്ഥലങ്ങളില്‍ ടെട്രാപ്പോഡ് സംരക്ഷണം ഉറപ്പാക്കാന്‍ നടപടി വേണമെന്ന് എ.എം. ആരിഫ് എം.പി നിര്‍ദേശിച്ചു. ജലജീവന്‍ മിഷന്റെ പ്രവര്‍ത്തനങ്ങള്‍ വേഗത്തിലാക്കി ജില്ലയില്‍ കുടിവെള്ള ലഭ്യത ഉറപ്പാക്കണമെന്ന ആവശ്യവും അദ്ദേഹം ഉന്നയിച്ചു.
അരൂര്‍ മേഖലയില്‍ റോഡുകളുടെ നിര്‍മാണ, നവീകരണ ജോലികള്‍ സമയബന്ധിതമായി പൂര്‍ത്തീകരിക്കുന്നതിന് ഉദ്യോഗസ്ഥര്‍ ജാഗ്രത പുലര്‍ത്തണമെന്ന് ദലീമ ജോജോ എം.എല്‍.എ നിര്‍ദേശിച്ചു. പള്ളിത്തോട് ചാപ്പക്കടവ്, ഉളവയ്പ്പ് മേഖലകളില്‍ കുടിവെള്ള വിതരണം മുടങ്ങുന്നതു സംബന്ധിച്ച പരാതി പരിഹരിക്കണം. കാക്കത്തുരുത്ത് ദ്വീപ് അടക്കമുള്ള പ്രദേശങ്ങളില്‍ വെള്ളക്കെട്ട് നിവാരണ പ്രവര്‍ത്തനങ്ങള്‍ ഊര്‍ജിതമാക്കണമെന്നും എം.എല്‍.എ ആവശ്യപ്പെട്ടു.
കുട്ടനാട് മണ്ഡലത്തിലെ പാടശേഖരങ്ങളുടെ പുറം ബണ്ട് നിര്‍മ്മാണം അടിയന്തരമായി പൂര്‍ത്തിയാക്കണമെന്ന് തോമസ് കെ. തോമസ് എം.എല്‍.എ നിര്‍ദ്ദേശിച്ചു. ബണ്ട് നിര്‍മാണത്തിനു മുന്നോടിയായി പ്രദേശവാസികളുടെ അഭിപ്രായം ആരായണമെന്നും അദ്ദേഹം അഭിപ്രായപ്പെട്ടു.
കുട്ടനാട് സമഗ്ര കുടിവെള്ള പാക്കേജ് നടത്തിപ്പുമായി ബന്ധപ്പെട്ട് എസ്റ്റിമേറ്റ് തയാറായിട്ടുണ്ടെന്നും ടെന്‍ഡര്‍ നടപടികള്‍ ഉടന്‍ ആരംഭിക്കുമെന്നും ഉദ്യോഗസ്ഥര്‍ യോഗത്തില്‍ അറിയിച്ചു.
ക്ഷീര ഗ്രാമത്തിന്‍റെ ഭാഗമായി തണ്ണീര്‍മുക്കം ഗ്രാമപഞ്ചായത്തില്‍ ഡയറി യൂണിറ്റുകള്‍ ഉള്‍പ്പെടെ വിവിധ പദ്ധതികള്‍ നടപ്പാക്കുന്നതിന് 50 ലക്ഷം രൂപ ധനസഹായമായി ക്ഷീരകര്‍ഷകര്‍ക്ക് അനുവദിക്കുമെന്ന് ജില്ലാ ക്ഷീര വികസന ഓഫീസര്‍ അറിയിച്ചു. പാലമേല്‍ ഗ്രാമപഞ്ചായത്തിലെ നാലു പട്ടികവര്‍ഗ കുടുംബങ്ങള്‍ക്ക് ജലജീവന്‍ മിഷന്‍ പദ്ധതിയില്‍ ഉള്‍പ്പെടുത്തി കുടിവെള്ള ലഭ്യത ഉറപ്പാക്കിയിട്ടുണ്ടെന്ന് പഞ്ചായത്ത് സെക്രട്ടറി അറിയിച്ചു.
ജില്ലാ പ്ലാനിംഗ് ഓഫീസര്‍ എസ്. സത്യപ്രകാശ്, വിവിധ വകുപ്പുകളുടെ ജില്ലാ മേധാവികള്‍ തുടങ്ങിയവര്‍ യോഗത്തില്‍ പങ്കെടുത്തു.