സംസ്ഥാനത്ത് വിമുക്തി മിഷന്റെ നേതൃത്വത്തില്‍ ലഹരിക്കെതിരായി ശക്തമായ ബോധവല്‍ക്കരണ പ്രവര്‍ത്തനങ്ങളാണ് നടത്തുന്നതെന്ന് എക്‌സൈസ് വകുപ്പ് മന്ത്രി എം വി ഗോവിന്ദന്‍ മാസ്റ്റര്‍.സംസ്ഥാനത്തെ 14 ഡി അഡിക്ഷന്‍ സെന്ററുകളിലായി കഴിഞ്ഞ ജനുവരിയില്‍ മാത്രം 2101 പേര്‍ക്കാണ് ലഹരിമോചന ചികിത്സയും കൗണ്‍സിലിംഗും നടത്തിയത്.157 പേരെ കിടത്തി ചികിത്സിച്ച് ലഹരിയില്‍ നിന്നും മോചിപ്പിച്ചു.38 എന്‍ഡിപിഎസ് കേസുകളില്‍ 21 വയസ്സില്‍ താഴെ പ്രായമുള്ള 44 പേരെ പിടികൂടി.ഇതില്‍ 36 പേര്‍ക്ക് ഡി അഡിക്ഷന്‍ കേന്ദ്രങ്ങളിലെത്തിച്ചു.
വിമുക്തി മിഷന്റെ നേതൃത്വത്തില്‍ സംസ്ഥാനതലത്തില്‍ വിവിധ വിഷയങ്ങളുമായി ബന്ധപ്പെട്ട് കുട്ടികള്‍ക്കും രക്ഷിതാക്കള്‍ക്കും ബോധവല്‍ക്കരണ സെമിനാറുകള്‍ സംഘടിപ്പിക്കുന്നുണ്ട്.എല്ലാ തദ്ദേശ സ്വയംഭരണ വാര്‍ഡുകളിലും വിമുക്തി പ്രവര്‍ത്തനങ്ങള്‍ ഏകോപിപ്പിക്കുന്നതിനായി കമ്മിറ്റികള്‍ രൂപീകരിച്ച് പ്രവര്‍ത്തിക്കുന്നുണ്ട്. ഇതിന്റെ ഭാഗമായി 65 പേര്‍ക്ക് വിമുക്തി ലഹരിമോചന ചികിത്സയും കൗണ്‍സിലിങ്ങും ലഭ്യമാക്കി.
സംസ്ഥാനത്തെ സ്‌കൂള്‍ വിദ്യാര്‍ഥികളില്‍ മദ്യം, മയക്കുമരുന്ന് എന്നിവയ്‌ക്കെതിരെ അവബോധം സൃഷ്ടിക്കുന്നതിനായി ന്യൂ ഇയര്‍ ഗ്രീറ്റിംഗ് കാര്‍ഡ് നിര്‍മ്മാണ മത്സരവും ആര്യനാട് റെയിഞ്ചിന്റെ നേതൃത്വത്തില്‍ പ്രാദേശിക ക്ലബ്ബുകളെ ഉള്‍പ്പെടുത്തി ക്രിക്കറ്റ് മത്സരവും ജനുവരിയില്‍ സംഘടിപ്പിച്ചു. ആദിവാസി മേഖലകളില്‍ ബോധവല്‍ക്കരണ പ്രവര്‍ത്തനങ്ങള്‍ ശക്തിപ്പെടുത്തുന്നതിന്റെ ഭാഗമായി വിവിധ പരിപാടികള്‍ സംഘടിപ്പിക്കുന്നതായി മന്ത്രി കൂട്ടിച്ചേര്‍ത്തു.