തെരുവുനായ ശല്യത്തെ പ്രതിരോധിക്കാൻ നടപടിയുമായി കട്ടപ്പന നഗരസഭ. വിവിധ വകുപ്പുകളെ ഉൾപ്പെടുത്തി നഗര സഭ ചെയർപേഴ്സൺ ഷൈനി സണ്ണി ചെറിയാൻ്റെ അധ്യക്ഷതയിൽ നഗരസഭയിൽ യോഗം ചേർന്നു. കട്ടപ്പന നഗരസഭയ്ക്ക് കീഴിൽ തെരുവു നായ ശല്യം അതിരൂക്ഷമായ സഹചര്യത്തിലാണ് അടിയന്തര നടപടികൾ സ്വീകരിക്കുവാൻ ആരോഗ്യ വിഭാഗം, മൃഗ സംരക്ഷണ വിഭാഗം, പോലീസ്, തുടങ്ങി വിവിധ വകുപ്പുകളെ ഉൾപ്പെടുത്തി യോഗം ചേർന്നത്.
വളർത്തു നായ്ക്കളുടെ വിവര ശേഖരണം, ബോധവൽക്കരണ ക്യാമ്പയിനുകൾ, നായ്ക്കൾക്കായി ഷെൽട്ടറുകൾ സ്ഥാപിക്കുക, വളർത്തുനായ്ക്കളും തെരുവു നായ്ക്കളുമായുള്ള സമ്പർക്കം ഒഴിവാക്കുക തുടങ്ങിയ വിഷയങ്ങളിൽ ചർച്ച ചെയ്തു. വിവിധ സംഘടനകളുടെ അഭിപ്രായങ്ങൾ സ്വീകരിച്ചാവും നഗരസഭ തുടർനടപടി സ്വീകരിക്കുക.
നഗരസഭ വൈസ് ചെയർമാൻ ജോയി ആനിത്തോട്ടം, കട്ടപ്പന പോലീസ് ഇൻസ്പെക്ടർ വിശാൽ ജോൺസൺ, മൃഗസംരക്ഷണ വകുപ്പ് ഓഫീസർ പി. വി. ഗീതമ്മ, താലുക്ക് സുപ്രണ്ട് എസ്. ശ്രീകാന്ത്, കട്ടപ്പന പ്രസ് ക്ലബ്ബ് പ്രസിഡൻറ് തോമസ് ജോസ്, നഗര വികസനകാര്യ സ്റ്റാൻഡിങ് കമ്മിറ്റി ചെയർപേഴ്സൺ ജാൻസി ബേബി, നഗരസഭ കൗൺസിലർ, ആരോഗ്യ വിഭാഗം ജീവനക്കാർ, വ്യാപാരികൾ തുടങ്ങിയവർ യോഗത്തിൽ പങ്കെടുത്തു.