പത്രക്കടലാസ് അച്ചടി മാത്രമല്ല നോട്ട്ബുക്ക് അടക്കമുള്ള വസ്തുക്കളുടെ അച്ചടിയിലേക്കും കേരള പേപ്പർ പ്രോഡക്ട്‌സ് ലിമിറ്റഡിന്റെ( കെ.പി.പി.എൽ.) ഉൽപാദനം വ്യാപിപ്പിക്കണമെന്നു ധനമന്ത്രി കെ.എൻ. ബാലഗോപാൽ. പേപ്പർ നിർമാണത്തിന് ആവശ്യമായ മുള വാണിജ്യാടിസ്ഥാനത്തിൽ കൃഷി ചെയ്യാനും അതു വെട്ടുന്നതിനും ആവശ്യമായ നടപടികൾ സ്വീകരിക്കാൻ സർക്കാർ തലത്തിൽ തീരുമാനമെടുക്കുമെന്നും ധനമന്ത്രി പറഞ്ഞു. കേന്ദ്രസർക്കാരിൽനിന്നു ലേലം വഴി സംസ്ഥാന സർക്കാർ ഏറ്റെടുത്ത് പുനർജീവൻ നൽകിയ പൊതുമേഖലാ സ്ഥാപനമായ കെ.പി.പി.എല്ലിലെ വാണിജ്യാടിസ്ഥാനത്തിലുള്ള ഉൽപാദനത്തിന്റെ ഉദ്ഘാടനം വെള്ളൂരിലെ ക്യാമ്പസിൽ നടന്ന ചടങ്ങിൽ നിർവഹിച്ചു സംസാരിക്കുകയായിരുന്നു അദ്ദേഹം.മാർച്ച് മാസത്തോടു കൂടി കെ.പി.പി.എല്ലിന്റെ ഉൽപാദനം ലാഭകരമായ ഘട്ടത്തിലേക്കു കടക്കുമെന്നാണ് പ്രതീക്ഷിക്കുന്നതെന്നും അതോടുകൂടി തൊഴിലാളികൾക്കു സ്ഥിരം നിയമനം നൽകുന്നതിനു തുടക്കം കുറിക്കുമെന്ന് ഉറപ്പുനൽകുന്നതായും ചടങ്ങിൽ അധ്യക്ഷത വഹിച്ചു സംസാരിച്ച വ്യവസായ-നിയമ വകുപ്പുമന്ത്രി പി. രാജീവ് പറഞ്ഞു. 3000 കോടി വിറ്റുവരവുള്ള സ്ഥാപനമായി കെ.പി.പി.എല്ലിനെ മാറ്റുകയാണു സർക്കാരിന്റെ ലക്ഷ്യം. അഞ്ചുലക്ഷം മെട്രിക് ടൺ ഉൽപാദനത്തിലേക്ക് സ്ഥാപനത്തെ എത്തിക്കാനാകും. 3000 തൊഴിലവസരങ്ങളും സൃഷ്ടിക്കാനാകും. നാലഞ്ചുവർഷത്തിനുള്ളിൽ സംസ്ഥാനത്ത് പൊതുമേഖലയിൽ സൃഷ്ടിക്കാൻ പറ്റുന്ന തൊഴിലവസരങ്ങൾക്കു തുല്യമാണിതെന്നും പി. രാജീവ് പറഞ്ഞു. അടച്ചിട്ട സ്ഥാപനം ലേലത്തിലൂടെ സംസ്ഥാനസർക്കാർ ഏറ്റെടുത്തു വ്യവസായിക ഉൽപാദനത്തിന് തുടക്കം കുറിച്ചത് അപൂർവ ചരിത്രമാണെന്നും മന്ത്രി പറഞ്ഞു.

സഹകരണ-സാംസ്‌കാരിക-രജിസ്‌ട്രേഷൻ വകുപ്പുമന്ത്രി വി.എൻ. വാസവൻ മുഖ്യപ്രഭാഷണം നടത്തി. വനം,വന്യജീവി സംരക്ഷണ വകുപ്പുമന്ത്രി എ.കെ. ശശീന്ദ്രൻ മുഖ്യാതിഥിയായിരുന്നു. എം.പിമാരായ ജോസ് കെ. മാണി, തോമസ് ചാഴികാടൻ, എം.എൽ.എമാരായ സി.കെ.ആശ, മോൻസ് ജോസഫ്, ഐ.എൻ.ടി.യു.സി. സംസ്ഥാന അധ്യക്ഷൻ ആർ.ചന്ദ്രശേഖരൻ, ജില്ലാ പഞ്ചായത്ത് പ്രസിഡന്റ് നിർമല ജിമ്മി, ബ്ളോക്ക് പഞ്ചായത്ത് പ്രസിഡന്റ് പി.വി. സുനിൽ, വെള്ളൂർ ഗ്രാമപഞ്ചായത്ത് പ്രസിഡന്റ് നികിത കുമാർ, കേരള റബർ ലിമിറ്റഡ് സി.എം.ഡി. ഷീല തോമസ്, കെ.പി.പി.എൽ. സ്പെഷൽ ഓഫീസർ പ്രസാദ് ബാലകൃഷ്ണൻ നായർ എന്നിവർ പ്രസംഗിച്ചു.
കെ.പി.പി.എൽ. അങ്കണത്തിൽ നടന്ന ചടങ്ങിൽ ആദ്യ ലോഡുമായുള്ള വാഹനം ധനമന്ത്രി കെ.എൻ. ബാലഗോപാൽ ഫ്‌ളാഗ് ഓഫ് ചെയ്തു. ഡിഇങ്കിങ് ഫാക്ടറിയുടെ സ്വിച്ച് ഓൺ കർമം സഹകരണ-സംസ്‌കാരിക വകുപ്പ് മന്ത്രി വി.എൻ. വാസവൻ നിർവഹിച്ചു. ഉദ്ഘാടന ചടങ്ങിൽ വിശിഷ്ടാതിഥികൾ ഒത്തുചേർന്ന് പേപ്പർ ഉൽപാദനത്തിന്റെ പ്രതീകാത്മക റോൾ ഓൺ നിർവഹിച്ചു. വുഡ് ഫീഡിങ്ങിന്റെ വിദൂര നിയന്ത്രിത ഉദ്ഘാടനം മന്ത്രി എ.കെ. ശശീന്ദ്രൻ നിർവഹിച്ചു. ചടങ്ങിനു മുന്നോടിയായി ഫാക്ടറിക്കുള്ളിൽ മന്ത്രിമാരും ജനപ്രതിനിധികളും സന്ദർശനം നടത്തി പ്രവർത്തനങ്ങൾ വിലയിരുത്തി.