യുവതയുടെ കലാകായിക സാംസ്കാരിക സംഗമത്തിന് അരങ്ങുണർന്നു. സംസ്ഥാന യുവജനക്ഷേമ ബോർഡും തൃശ്ശൂർ ജില്ലാ പഞ്ചായത്തും സംയുക്തമായി സംഘടിപ്പിക്കുന്ന കേരളോത്സവം 2022ന് ജില്ലയിൽ തുടക്കമായി. 86 ഗ്രാമപഞ്ചായത്തുകൾ, 16 ബ്ലോക്കുകൾ, ഏഴ് നഗരസഭ, കോർപ്പറേഷൻ എന്നിവിടങ്ങളിൽ നിന്നായി അയ്യായിരത്തോളം കലാകായിക പ്രതിഭകളാണ് മത്സരങ്ങളിൽ മാറ്റുരയ്ക്കുന്നത്.

വലപ്പാട് ഹൈസ്കൂൾ ഗ്രൗണ്ടിൽ അത്‌ലറ്റിക്, ക്രിക്കറ്റ് ഇനങ്ങളോടെ മത്സരങ്ങൾക്ക് തിരിതെളിഞ്ഞു. കോവിഡിന് ശേഷം രണ്ട് വർഷത്തെ ഇടവേളയ്ക്ക് ശേഷം നടക്കുന്ന കലാ കായിക മാമാങ്കത്തെ ആവേശത്തോടെ എല്ലാവരും ഏറ്റെടുക്കുകയാണെന്ന് ഹൈസ്കൂൾ മൈതാനത്ത് മത്സരങ്ങളുടെ ഉദ്ഘാടനം നിർവഹിച്ച് ജില്ലാ പഞ്ചായത്ത് പ്രസിഡന്റ് പികെ ഡേവിസ് മാസ്റ്റർ പറഞ്ഞു. ഷോട്ട് പുട്ട് എറിഞ്ഞാണ് മത്സരങ്ങൾക്ക് അദ്ദേഹം തുടക്കം കുറിച്ചത്.

ചടങ്ങിൽ ജില്ലാ പഞ്ചായത്ത് വൈസ് പ്രസിഡന്റ് ഷീന പറയങ്ങാട്ടിൽ, മുൻ അത്‌ലറ്റിക് താരം അബ്ദുള്ള, യൂത്ത് പ്രോഗ്രം ഓഫീസർ സിടി സബിത, ജില്ലാ പഞ്ചായത്ത് അംഗങ്ങൾ, ബ്ലോക്ക് പ്രസിഡന്റുമാർ തുടങ്ങിയവർ പങ്കെടുത്തു.

വരകളിൽ തെളിഞ്ഞ കേര സംസ്കൃതിയോടെയാണ് കേരളോത്സവത്തിലെ സ്റ്റേജിതര മത്സരങ്ങൾക്ക് തുടക്കമായത്. ശിൽപി ടി പി പ്രേംജിയുടെ വരയിൽ അവതരിച്ച കേരനാട് കേരളോത്സവത്തിന്റെ വരവറിയിച്ചു. ഉപന്യാസം, കഥ, കവിത തുടങ്ങി രചന മത്സരങ്ങളോടെയാണ് ജില്ലാ പഞ്ചായത്ത് ഹാളിൽ സ്റ്റേജിതര മത്സരങ്ങൾ ആരംഭിച്ചത്. ഉപന്യാസ മത്സരത്തിൽ 22, കഥാ മത്സരത്തിൽ 23, കവിതാ രചനയിൽ 18 പേരും പങ്കെടുത്തു. ഡയറ്റ് ഭാഷാധ്യാപകൻ സനോജ് വിധികർത്താവായി. പരിപാടിയിൽ ജില്ലാ പഞ്ചായത്ത് അംഗം വിഎസ് പ്രിൻസ് അധ്യക്ഷനായി. ജില്ലാ പഞ്ചായത്ത് അംഗങ്ങളായ ജലീൽ ആദൂർ, പിഎസ് വിനയൻ, സീനിയർ സൂപ്രണ്ട് കെപി മോഹൻദാസ്, സംസ്ഥാന ശിശുക്ഷേമ സമിതി എക്സിക്യൂട്ടീവ് അംഗം പശുപതി മാസ്റ്റർ തുടങ്ങിയവർ പങ്കെടുത്തു.

ഡിസംബർ 17 വരെയാണ് മത്സരങ്ങൾ നടക്കുക. വലപ്പാട് ഹൈസ്കൂൾ ഗ്രൗണ്ട്, എസ്എൻ കോളേജ് നാട്ടിക, ചെന്ത്രാപ്പിന്നി എസ്എൻ വിദ്യാഭവൻ, ജില്ലാ പഞ്ചായത്ത് ഹാൾ, ടിഎസ്ജിഎ തൃപ്രയാർ, തൃശൂർ അക്വാട്ടിക് കോംപ്ലക്സ്, ഏങ്ങണ്ടിയൂർ ആർട്സ് ആന്റ് സ്പോർട്സ് ക്ലബ്ബ് ഓഡിറ്റോറിയം, മുണ്ടൂർ കൈപ്പറമ്പ് ഗ്രൗണ്ട് എന്നിവിടങ്ങളിലായാണ് സ്പോർട്സ് ഇനങ്ങൾ. റീജിയണൽ തീയറ്റർ, ജവഹർ ബാലഭവൻ (2 വേദികൾ), തൃശൂർ ബിഎഡ് കോളേജ്, ജില്ലാ പഞ്ചായത്ത് ഹാൾ തുടങ്ങിയവ കലാ മത്സരങ്ങൾക്ക് വേദിയാകും. 15 – 20 വയസ് വരെയുള്ള ആൺകുട്ടികൾ/ പെൺകുട്ടികൾ, 20-40 വയസ് വരെ വനിത/ പുരുഷ വിഭാഗങ്ങളിലാണ് മത്സരം.

കേരളോത്സവത്തിന്റെ ഭാഗമായി ഇന്ന് (ഡിസംബർ 9) റീജിയണൽ തിയേറ്ററിൽ മൈം, ഏകാങ്ക നാടകം (മലയാളം, ഇംഗ്ലീഷ്) ജവഹർ ബാലഭവൻ വേദി 1ൽ കളിമൺ ശിൽപ്പ നിർമ്മാണം, പുഷ്പാലങ്കാരം, മെഹന്തി, ജില്ലാ പഞ്ചായത്ത് ഹാളിൽ ചിത്രരചന, കാർട്ടൂൺ, ക്വിസ്, വലപ്പാട് ഹൈസ്കൂൾ ഗ്രൗണ്ടിൽ അത് ലറ്റിക്സ് മത്സരങ്ങളും നടക്കും.