സംസ്ഥാനസര്‍ക്കാരിന്റെ വികസന-ക്ഷേമ പ്രവര്‍ത്തനങ്ങളുടെ ഭാഗമായി ഇന്‍ഫര്‍മേഷന്‍ ആന്റ് പബ്ലിക് റിലേഷന്‍സ് വകുപ്പ് കോട്ടയം മേഖലയുടെ ആഭിമുഖ്യത്തില്‍ ഇടുക്കി ജില്ലാ ഇന്‍ഫര്‍മേഷന്‍ ഓഫീസിന്റെ ഫേസ്ബുക്ക് പേജിലൂടെ പൊതുജനങ്ങള്‍ക്കായി നടത്തിയ ചൊല്ല്-ഓണ്‍ലൈന്‍ പ്രശ്നോത്തരിയുടെ നാലാംഘട്ട നറുക്കെടുപ്പ് ഇടുക്കി സബ് കളക്ടര്‍ അരുണ്‍ എസ.് നായര്‍ നിര്‍വഹിച്ചു. ബുധനാഴ്ച വൈകിട്ട് 3 ന് സബ് കളക്ടറുടെ ചേമ്പറില്‍ ഫേസ്ബുക്ക് ലൈവായി നടന്ന നറുക്കെടുപ്പിന് ഇടുക്കി ജില്ലാ അസിസ്റ്റന്റ് ഇന്‍ഫര്‍മേഷന്‍ ഓഫിസര്‍ യാസിര്‍ ടി.എ. നേതൃത്വം നല്‍കി.
ഡിസംബര്‍ 19 ന് ജില്ലാ ഇന്‍ഫര്‍മേഷന്‍ ഓഫീസിന്റെ ഫേസ്ബുക്ക് പേജില്‍ പോസ്റ്റ് ചെയ്ത ചോദ്യങ്ങള്‍ക്ക് മെസഞ്ചര്‍ വഴി ഉത്തരം നല്‍കി 24 പേരാണ് മത്സരത്തില്‍ പങ്കെടുത്തത്. 11 പേര്‍ രണ്ട് ചോദ്യത്തിനും ശരിയായ ഉത്തരം നല്‍കി. ആറന്മുള സ്വദേശി വിഷ്ണു വിനു, തൊടുപുഴ സ്വദേശി വിഷ്ണു ചന്ദ്രന്‍, ആറന്മുള സ്വദേശി വിഘ്നേഷ് വിനു എന്നിവരാണ് വിജയികള്‍. വിജയികള്‍ക്ക് ഫലകവും പുസ്തകങ്ങളും സമ്മാനമായി ലഭിക്കും. ഓഫീസില്‍ നിന്ന് അറിയിക്കുന്ന മുറയ്ക്ക് തിരിച്ചറിയല്‍ രേഖയുമായി ജില്ലാ ഇന്‍ഫര്‍മേഷന്‍ ഓഫീസിലെത്തി സമ്മാനങ്ങള്‍ സ്വീകരിക്കാം. അവസാനഘട്ട മത്സരത്തിനുള്ള ചോദ്യങ്ങള്‍ ഫേസ്ബുക്ക് പേജില്‍ പ്രസിദ്ധീകരിച്ചിട്ടുണ്ട്. ഡിസംബര്‍ 23 ന് രാവിലെ 10 മണി വരെ ഇടുക്കി ജില്ലാ ഇന്‍ഫര്‍മേഷന്‍ ഓഫീസിന്റെ ഫേസ്ബുക്ക് പേജിലെ മെസഞ്ചര്‍ മുഖേന ഉത്തരങ്ങള്‍ അയക്കാം.