കേന്ദ്ര യുവജനകാര്യ-കായിക മന്ത്രാലയത്തിലെ യുവജനകാര്യ വകുപ്പ് രാജ്യ വ്യാപകമായി നടത്തുന്ന നാഷണൽ യൂത്ത് പാർലമെന്റ് ഫെസ്റ്റിവലിന്റെ ഭാഗമായുള്ള പ്രസംഗ മത്സരത്തിൽ പങ്കെടുക്കാൻ അവസരം. ജനുവരി 24ന് 18 നും 25 നും ഇടയിൽ പ്രായമുള്ള യുവതീ-യുവാക്കൾക്ക് ജില്ലാ തലത്തിൽ നടത്തുന്ന പ്രഥമ റൗണ്ട് മത്സരത്തിൽ പങ്കെടുക്കാം. പ്രസംഗത്തിനായി ഹിന്ദി, ഇംഗ്ലീഷ്, മലയാളം ഭാഷകളിൽ ഒന്ന് തിരഞ്ഞെടുക്കാം. നാല് മിനിറ്റ് സമയമാണ് അനുവദിക്കുക. ജില്ലാതല മത്സരത്തിൽ ഒന്നും രണ്ടും സ്ഥാനം നേടുന്നവർക്ക് സംസ്ഥാനതല മത്സരത്തിൽ പങ്കെടുക്കാൻ യോഗ്യത ലഭിക്കും.

ജില്ലാ-സംസ്ഥാനതല മത്സരങ്ങൾ ഓൺലൈനായിരിക്കും തുടർന്ന് സംസ്ഥാനതല മത്സരത്തിൽ ആദ്യത്തെ മൂന്ന് സ്ഥാനക്കാർക്ക് ഫെബ്രുവരിയിൽ പാർലമെന്റിന്റെ സെൻട്രൽ ഹാളിൽ നടക്കുന്ന നാഷണൽ യൂത്ത് പാർലമെന്റ് ഫെസ്റ്റിവലിൽ പങ്കെടുക്കാനും ഒന്നാമതെത്തുന്ന വ്യക്തിക്ക് പാർലമെന്റിൽ പ്രസംഗിക്കാനും അവസരം ലഭിക്കും. പാർലമെന്റ് പരിപാടിയിൽ പങ്കെടുക്കുന്നവരുടെ വിമാന യാത്രാ ടിക്കറ്റ്, താമസം തുടങ്ങിയവ കേന്ദ്ര സർക്കാർ വഹിക്കും. മത്സരത്തിൽ പങ്കെടുക്കുന്നതിനുള്ള രജിസ്‌ട്രേഷൻ ഫോറത്തിനും മറ്റു വിവരങ്ങൾക്കും നെഹ്‌റു യുവ കേന്ദ്ര ജില്ലാ യൂത്ത് ഓഫീസർമാരുമായോ നാഷണൽ സർവീസ് സ്‌കീം പ്രോഗ്രാം ഓഫിസർമാരുമായോ ബന്ധപ്പെടണം. വിശദവിവരത്തിന് ഫോൺ: 0471 2302205