പ്രളയദുരന്തമുണ്ടായ കേന്ദ്രങ്ങളിൽ സഹായം എത്തുന്നതുമായി ബന്ധപ്പെട്ട് യുവജനസംഘങ്ങളും, യൂത്ത്ക്ലബുകളും ജില്ലാ ഭരണകൂടവുമായി സമ്പർക്കം പുലർത്തണമെന്ന് ജില്ലാ കളക്ടർ ഡോ.ഡി.സജിത് ബാബു പറഞ്ഞു. ജില്ലാ ആസൂത്രണ സമിതിഹാളിൽ യുവജന ക്ഷേമബോർഡിന്റെ ആഭിമുഖ്യത്തിൽ നടന്ന ക്യാമ്പയിനും, ആദരണവും ഉദ്ഘാടനം ചെയ്ത് സംസാരിക്കയായിരുന്നു കളക്ടർ.
സഹായധനം കൃത്യമായ കേന്ദ്രങ്ങളിൽ തന്നെ എത്തുന്നുവെന്ന് ഉറപ്പുവരുത്താനുള്ള ജാഗ്രത നൽകുന്നവർക്ക് ഉണ്ടാകണം. ഇതിന് യുവജനങ്ങൾ പ്രത്യേകശ്രദ്ധ പുലർത്തണം. ദുരിതകേന്ദ്രങ്ങളിൽ സഹായത്തിനു പോകുന്നവർ ആരോഗ്യ പ്രതിരോധ കാര്യത്തിലും കാര്യമായ ശ്രദ്ധയുണ്ടാകണം. ഔദ്യോഗിക അറിയിപ്പുകൾ പാലിച്ചിരിക്കണമെന്ന് അദ്ദേഹം പറഞ്ഞു. ജില്ല യൂത്ത്‌പ്രോഗ്രാം ഓഫീസർ കെ.പ്രസീത ചടങ്ങിൽ അദ്ധ്യക്ഷതവഹിച്ചു. ജില്ലാ ഇൻഫർമേഷൻ ഓഫീസർ സുഗതൻ ഇ.വി., യുവജനകമ്മീഷൻ അംഗം കെ.മണികണ്ഠൻ,ആർ സഹീർ എന്നിവർ സംസാരിച്ചു. യുവജന ക്ഷേമബോർഡ് ജില്ലാ കോ-ഓർഡിനേറ്റർ എ.വി.ശിവപ്രസാദ് സ്വാഗതവും, സുരേഷ് വയമ്പിൽ നന്ദിയും പറഞ്ഞു.
