അമ്പലപ്പുഴ:പ്രളയാനന്തരം നവകേരളം സൃഷ്ടിക്കാനുള്ള പണം കണ്ടെത്തുന്നതിന് പരമാവധി ആളുകളെ സമീപിക്കാനും മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന നൽകാൻ പ്രേരണ നൽകാനും സുമനസ്സുകളായ എല്ലാവരും തയ്യാറാകണമെന്ന് പൊതുമരാമത്ത് രജിസ്‌ട്രേഷൻ വകുപ്പ് മന്ത്രി ജി.സുധാകരൻ പറഞ്ഞു. മന്ത്രിസഭാ തീരുമാനപ്രകാരം ധനസമാഹരണത്തിന് മുന്നോടിയായി നിയമസഭ മണ്ഡലാടിസ്ഥാനത്തിൽ ചേർന്ന അമ്പലപ്പുഴയിലെ മുന്നൊരുക്ക യോഗത്തിൽ അധ്യക്ഷതവഹിച്ച് സംസാരിക്കുകയായിരുന്നു അദ്ദേഹം.
അമ്പലപ്പുഴ ബ്ലോക്ക് പഞ്ചായത്ത് ഹാളിൽ നടന്ന യോഗത്തിൽ തദ്ദേശ സ്വയംഭരണ സ്ഥാപന പ്രതിനിധികൾ, ഉദ്യോഗസ്ഥർ എന്നിവർ പങ്കെടുത്തു. സംഭാവന ചെയ്യേണ്ട സാഹചര്യം കഴിവുള്ളവരെയും സന്നദ്ധരായവരെയും ബോധ്യപ്പെടുത്തി പട്ടിക തയ്യാറാകണമെന്ന് അദ്ദേഹം നിർദ്ദേശിച്ചു. തയ്യാറാകുന്നവരിൽ നിന്ന്് നിശ്ചിത സ്ഥലത്ത് നിശ്ചിതസമയത്ത് പണം സ്വീകരിക്കും. ജില്ലയിലെ ഇതിന് ചുമതലയുള്ള മന്ത്രിമാർ ചടങ്ങുകളിൽ നേരിട്ട് പങ്കെടുക്കും. മറ്റു മണ്ഡലങ്ങളിലെ മുന്നൊരുക്ക യോഗങ്ങൾ 6,7 തീയതികളിൽ നടക്കും. എല്ലാ മണ്ഡലത്തിലും ഇതിനായി ഒരു കോർ കമ്മറ്റി രൂപീകരിക്കണം. എംഎൽഎമാരുടെ നേതൃത്വത്തിൽ ആയിരിക്കണം കമ്മറ്റി പ്രവർത്തിക്കേണ്ടത്. കമ്മിറ്റിയിൽ ബന്ധപ്പെട്ട എംപിമാർ , മണ്ഡലത്തിന്റെ ചുമതലയുള്ള ഡെപ്യൂട്ടി കളക്ടർ, പഞ്ചായത്ത് പ്രസിഡൻറന്റുമാർ, സെക്രട്ടറിമാർ, ബ്ലോക്ക് പഞ്ചായത്ത് പ്രസിഡണ്ട്,സെക്രട്ടറി, നഗരസഭാ ചെയർമാൻ,സെക്രട്ടറി, ബന്ധപ്പെട്ട തഹസിൽദാർ, വില്ലേജ് ഓഫീസർമാർ തുടങ്ങിയവർ അംഗങ്ങളാകും. പണം സ്വീകരിക്കാൻ സമീപിക്കേണ്ടവരുടെ പട്ടിക പഞ്ചായത്ത് , നഗരസഭ അടിസ്ഥാനത്തിൽ തയ്യാറാക്കണമെന്ന് മന്ത്രി നിർദ്ദേശിച്ചു. ഓഡിറ്റോറിയം ഉടമകൾ, മാനേജർമാർ, വ്യവസായ സ്ഥാപന ഉടമകൾ,കമ്പനികൾ, ഹോട്ടൽ വസ്ത്ര വ്യാപാരികൾ, സ്വർണക്കടകൾ, ആശുപത്രി ഉടമകൾ, ഉയർന്ന സാമ്പത്തിക ശേഷിയുള്ള കുടുംബങ്ങൾ, പ്രവാസികൾ, റസിഡൻസ് അസോസിയേഷനുകൾ, മറ്റു പ്രസ്ഥാനങ്ങൾ തുടങ്ങിയവരെയാണ് ഉദ്ദേശിക്കുന്നത്. ജനകീയമായ മുന്നേറ്റം ഇക്കാര്യത്തിൽ ഉണ്ടാകണമെന്ന് അദ്ദേഹം പറഞ്ഞു.
സാധാരണക്കാരായ ആളുകളോടോ തൊഴിലാളികളോടോ് പണം വാങ്ങുന്നില്ല. അവർ മറ്റ് രീതിയിൽ സംഭാവന ചെയ്യുന്നുണ്ട്. ഉയർന്ന സാമ്പത്തികശേഷിയുള്ളവരെയാണ് പ്രധാനമായി സമീപിക്കേണ്ടത്. ഓരോ മണ്ഡലത്തിലെയും അവസാന പട്ടിക തയാറാക്കുമ്പോൾ എംഎൽഎമാരുടെ മേൽനോട്ടം ഉണ്ടായിരിക്കണമെന്നും അദ്ദേഹം പറഞ്ഞു. അമ്പലപ്പുഴ മണ്ഡലത്തിൽ സംഭാവന സ്വീകരിക്കുന്നത് രണ്ടുസ്ഥലങ്ങളിൽ വച്ചാകാൻ യോഗം തീരുമാനിച്ചു. അമ്പലപ്പുഴ മണ്ഡലത്തിലെ പഞ്ചായത്തുകളിൽ നിന്നുള്ള സംഭാവന 16 ന് രാവിലെ 10.30 ന് അമ്പലപ്പുഴ കെ.കെ കുഞ്ചുപിള്ള സ്മാരക ഹയർ സെക്കൻഡറി സ്‌കൂൾ ഓഡിറ്റോറിയത്തിൽ വച്ച് സ്വീകരിക്കും. നഗരസഭയുടേത് അന്നേ ദിവസം നാലുമണിക്ക് ടൗൺ ഹാളിൽ വച്ചാണ് സ്വീകരിക്കുക. ഈ ചടങ്ങുകളിൽ മന്ത്രിമാർ നേരിട്ട് പങ്കെടുക്കും. ജില്ലയിലെ മന്ത്രിമാർ, എംപിമാർ, എംഎൽഎമാർ, ജില്ലാ കളക്ടർ, സ്‌പെഷ്യൽ ഓഫീസർ തുടങ്ങിയവരുടെ ധനസമാഹരണത്തിനുള്ള അഭ്യർത്ഥന ഒരു കത്തായി തയ്യാറാക്കി നൽകുമെന്നും മന്ത്രി പറഞ്ഞു. മന്ത്രി അധ്യക്ഷത വഹിച്ച ചടങ്ങിൽ ജില്ലാപഞ്ചായത്ത് പ്രസിഡൻറ് ജി. വേണുഗോപാൽ, ജില്ലാ കളക്ടർ എസ് സുഹാസ്, മുനിസിപ്പൽ വൈസ് ചെയർപേഴ്‌സൺ ബീന കൊച്ചുബാവ ,ഡെപ്യൂട്ടി കളക്ടർ മുരളീധരൻപിള്ള, ബ്ലോക്ക് പഞ്ചായത്ത് പ്രസിഡൻറ് പ്രജിത്ത്കാരിക്കൽ, പഞ്ചായത്ത് പ്രസിഡണ്ടുമാരായ ജി വേണുലാൽ, അഫ്‌സത്ത്, എം.ഷീജ, സുവർണ്ണ പ്രതാപൻ, റഹ്മത്ത് ഹമീദ് തുടങ്ങിയവർ പ്രസംഗിച്ചു.