മാനന്തവാടി ബ്ലോക്കില്‍ ജനകീയ ജലബജറ്റ് തയ്യാറായി. തിരുവനന്തപുരം കെടിഡിസി മസ്‌കറ്റ് ഹോട്ടലില്‍ നടന്ന ജലബജറ്റ് പ്രകാശന ചടങ്ങില്‍ ബ്ലോക്ക് പഞ്ചായത്ത് പ്രസിഡന്റ് ജസ്റ്റിന്‍ ബേബി മാനന്തവാടി ബ്ലോക്ക്തല ജലബജറ്റ് അവതരിപ്പിച്ചു. ജല ബജറ്റിന്റെ പകര്‍പ്പ് ബ്ലോക്ക് പഞ്ചായത്ത് പ്രസിഡണ്ട് ജസ്റ്റിന്‍ ബേബി ജലവിഭവ വകുപ്പ് മന്ത്രി റോഷി അഗസ്റ്റിന് കൈമാറി. ചടങ്ങില്‍ ഗ്രാമപഞ്ചായത്ത് പ്രസിഡന്റ്മാരായ അംബികാ ഷാജി, കെ.വി വസന്തകുമാരി, എല്‍സി ജോയി, സുധി രാധാകൃഷ്ണന്‍ എന്നിവര്‍ പങ്കെടുത്തു.
നവകേരളം കര്‍മ്മ പദ്ധതിയില്‍ ഹരിത കേരളം മിഷന്റെയും ജലവിഭവ വികസന പരിപാലന കേന്ദ്രത്തിന്റേയും നേതൃത്വത്തിലാണ് ജലബജറ്റ് തയ്യാറാക്കിയത്. ജില്ലയില്‍ ആദ്യ ഘട്ടത്തില്‍ മാനന്തവാടി ബ്ലോക്കിനെയാണ് പദ്ധതിക്കായി തിരെഞ്ഞെടുത്തത്. തവിഞ്ഞാല്‍, തൊണ്ടര്‍നാട്, എടവക, വെള്ളമുണ്ട, തിരുനെല്ലി പഞ്ചായത്തുകളിലാണ് ജലബജറ്റ് തയ്യാറായത്. നവകേരളം കര്‍മ്മ പദ്ധതി ഇന്റേണ്‍സ്, ഗ്രാമപഞ്ചായത്തുകളിലെ രണ്ട് വളണ്ടിയേഴ്‌സ് എന്നിവര്‍ ഉള്‍പ്പെടുന്ന ടീമാണ് ജലബജറ്റിനായി വിവിധ വകുപ്പുകളില്‍ നിന്നും സ്ഥാപനങ്ങളില്‍ നിന്നും വിവരശേഖരണം നടത്തിയത്. പഞ്ചായത്തിന്റെ അടിസ്ഥാന വിവരങ്ങള്‍, ഭൂവിനിയോഗം, വനം, ജനവാസ മേഖല എന്നിവയുടെ വിവരങ്ങള്‍, കൃഷി, വ്യവസായം, വാണിജ്യം, ഗാര്‍ഹികം, മൃഗസംരക്ഷണം, വിനോദസഞ്ചാരം തുടങ്ങിയ മേഖലകളില്‍ ഉള്ള ജല ആവശ്യം, പഞ്ചായത്തിന്റെ അകത്തേക്കും പുറത്തേക്കുമുള്ള ജലവിതരണം തുടങ്ങിയവ ജലബജറ്റില്‍ ഉള്‍പ്പെടുത്തി ഓരോ പ്രദേശത്തും ലഭ്യമായ ജലത്തിന്റെ അളവും വിവിധ ആവശ്യങ്ങള്‍ക്കുള്ള ജലത്തിന്റെ അളവും കണക്കാക്കി ലഭ്യമായ ജലത്തിന്റെ അളവ് ആവശ്യമുളളതിനേക്കാള്‍ കുറവാണെങ്കില്‍ അതിനനുസരിച്ച് ജലത്തിന്റെ ലഭ്യത വര്‍ദ്ധിപ്പിക്കുതിനും ഉപയോഗം ക്രമപ്പെടുത്തുതിനുമുളള ഇടപെടലുകള്‍ ശാസ്ത്രീയ അടിത്തറയോടുകൂടി നടപ്പിലാക്കാന്‍ ഇതുവഴി തദ്ദേശസ്ഥാപനങ്ങള്‍ക്ക് സാധിക്കും.
ആവശ്യമുള്ള ജലത്തിന്റെ അളവ് കണക്കാക്കുമ്പോള്‍ ഈ ഓരോ മേഖലകളിലും എത്ര ജലം നിലവില്‍ ആവശ്യമുണ്ട്, ഭാവിയില്‍ ആവശ്യം വരാവുന്ന വ്യതിയാനം, നീര്‍ച്ചാലുകളിലെ പാരിസ്ഥിതിക നീരൊഴുക്ക് ഉറപ്പാക്കുന്നതിന് വേണ്ട ജലത്തിന്റെ അളവ് എത്ര എന്നിവയെല്ലാം പരിഗണിച്ചു. കണ്ടെത്തിയ ലഭ്യമായ ജലത്തിന്റെ അളവും പ്രദേശത്ത് വേണ്ട ജലത്തിന്റെ അളവും താരതമ്യം ചെയ്യുമ്പോള്‍ ഒരു പ്രദേശത്തിന്റെ സുസ്ഥിരമായ ജലവിതരണത്തിനുവേണ്ട ഇടപെടലുകള്‍ സാധ്യമാക്കാന്‍ കഴിയും. ഇത്തരത്തില്‍ ശേഖരിക്കുന്ന വിവരങ്ങളെല്ലാം ജലവിഭവ വികസന പരിപാലന കേന്ദ്രത്തിന്റെ നേതൃത്വത്തില്‍ പ്രത്യേക വിലയിരുത്തലുകളും അപഗ്രഥനവും നടത്തിയാണ് ജലബജറ്റ് രേഖ അന്തിമമായി തയ്യാറാക്കിയത്. മാനന്തവാടി ബ്ലോക്കില്‍ നടത്തിയ ജലബജറ്റില്‍ പ്രദേശത്ത് ജലം മിച്ചമുണ്ട് എന്ന കണ്ടെത്തലിലെത്തി. ഇതിലൂടെ ഭാവിയിലേക്കുളള ജലസംരക്ഷണ പ്രവര്‍ത്തനങ്ങള്‍ ആസൂത്രണം ചെയ്യാന്‍ കഴിയുമെന്ന് അധികൃതര്‍ അറിയിച്ചു.