ആസാദി കാ അമൃത് മഹോത്സവത്തിന്റെ ഭാഗമായി അറക്കുളത്ത് പ്രവര്‍ത്തിക്കുന്ന ഫുഡ് കോര്‍പ്പറേഷന്‍ ഓഫ് ഇന്ത്യയുടെ ഗോഡൗണ്‍ വിദ്യാര്‍ഥികള്‍ക്ക് സന്ദര്‍ശനത്തിനായി തുറന്ന് നല്‍കി. സ്‌കൂള്‍ വിദ്യാര്‍ഥികള്‍ക്കിടയില്‍ എഫ്‌സിഐയുടെ പ്രവര്‍ത്തനങ്ങള്‍ പ്രചരിപ്പിക്കുന്നതിന്റെ ഭാഗമായാണ് സന്ദര്‍ശനത്തിനായി തുറന്ന് നല്‍കിയത്. സ്‌കൂള്‍ വിദ്യാര്‍ഥികള്‍ക്ക് പ്രവര്‍ത്തിദിനങ്ങളില്‍ ഗോഡൗണ്‍ സന്ദര്‍ശിക്കാം.
അറക്കുളം സെന്റ് മേരീസ് സ്‌കൂളിലെ വിദ്യാര്‍ഥികളും അധ്യാപകരുമാണ് ആദ്യഘട്ടത്തില്‍ എഫ്‌സിഐ ഗോഡൗണില്‍ സന്ദര്‍ശനം നടത്തിയത്. ഫാക്ടറിയുടെ വിവിധ പ്രവര്‍ത്തനങ്ങള്‍ വിദ്യാര്‍ഥികള്‍ക്ക് നേരിട്ട് കണ്ട് മനസ്സിലാക്കാന്‍ സാധിച്ചു. ഡിപ്പോ മാനേജര്‍ റോണി മൈക്കിള്‍ സെന്‍, ക്വാളിറ്റി കണ്‍ട്രോള്‍ മാനേജര്‍ ജീന സേവ്യര്‍, ഷെഡ് ഇന്‍ ചാര്‍ജ് ആതിര സുധാകരന്‍ എന്നിവര്‍ കുട്ടികള്‍ക്ക് പ്രവര്‍ത്തനങ്ങള്‍ വിശദീകരിച്ച് നല്‍കി.
അറക്കുളം പഞ്ചായത്ത് പ്രസിഡന്റ് കെ.എസ് വിനോദ്, തൊടുപുഴ താലൂക്ക് സപ്ലൈ ഓഫീസര്‍ ബൈജു കെ ബാലന്‍, ഉദ്യോഗസ്ഥരായ ടിജിന്‍ എംറ്റി, സോനു എം ജെ, അനൂപ് പി. ആര്‍, മോനിഷ് കെ ജോസഫ്, രാഖി കെ. വി, കെ. എം ജോര്‍ജ് തുടങ്ങിയവര്‍ പരിപാടിക്ക് നേതൃത്വം നല്‍കി.