പട്ടയ വിതരണം, ഭൂമി തരം മാറ്റല്‍, വിവിധ പദ്ധതികള്‍ക്കായുള്ള ഭൂമി ഏറ്റെടുക്കല്‍, കൈയേറ്റം ഒഴിപ്പിക്കല്‍ തുടങ്ങിയ ഭൂസംബന്ധമായ പ്രശ്‌നങ്ങളില്‍ അടിയന്തര പരിഹാരങ്ങള്‍ കാണുന്നതിനുള്ള ശക്തമായ നടപടികളാണ് സര്‍ക്കാര്‍ സ്വീകരിച്ചുവരുന്നതെന്ന് റവന്യൂ ഭവനനിര്‍മാണ വകുപ്പ് മന്ത്രി കെ രാജന്‍. തൃശ്ശൂര്‍ കെഎസ്എഫ്ഇ ഹാളില്‍ ചേര്‍ന്ന മൂന്നാമത് ജില്ലാ റവന്യൂ അസംബ്ലിയില്‍ സംസാരിക്കുകയായിരുന്നു മന്ത്രി.
ഭൂമി തരം മാറ്റലുമായി ബന്ധപ്പെട്ട് നേരിട്ടും ഓണ്‍ലൈനായും ലഭിച്ച 54122 അപേക്ഷകളില്‍ 27043 എണ്ണം തീര്‍പ്പാക്കിയതായും ബാക്കിയുള്ളവയില്‍ നടപടികള്‍ തുടരുന്നതായും മന്ത്രി അറിയിച്ചു. നിലവില്‍ ഒരു സബ് കലക്ടറും ഒരു ആര്‍ഡിഒയും മാത്രമാണ് ഭൂമി തരം മാറ്റലുമായി ബന്ധപ്പെട്ട അപേക്ഷകളില്‍ തീരുമാനം എടുക്കുന്നത്. ഇത് വേഗത്തിലാക്കുന്നതിന് ഓരോ താലൂക്കിലും ഒരു ഡെപ്യൂട്ടി കലക്ടര്‍ക്ക് പ്രത്യേക ചുമതല നല്‍കുന്ന കാര്യം സര്‍ക്കാരിന്റെ പരിഗണനയിലാണെന്നും മന്ത്രി അറിയിച്ചു.
4673 വനഭൂമി പട്ടയ അപേക്ഷകളിലുള്ള നടപടികള്‍ അന്തിമഘട്ടത്തിലാണ്. ഇവയില്‍ 2777 എണ്ണത്തില്‍ സര്‍വേ നടപടികള്‍ പൂര്‍ത്തിയാക്കി. ബാക്കിയുള്ളവയില്‍ സര്‍വേ നടപടികള്‍ പുരോഗമിക്കുകയാണ്. ഇത് കൂടി പൂര്‍ത്തീകരിക്കുന്ന മുറയ്ക്ക് അപേക്ഷകള്‍ കേന്ദ്ര സര്‍ക്കാരിന്റെ അനുമതിക്കായി സമര്‍പ്പിക്കാന്‍ കഴിയുമെന്നും മന്ത്രി അറിയിച്ചു. കന്നുകാലി മേച്ചില്‍ പുറം, കളിസ്ഥലം, കടല്‍ പുറമ്പോക്ക്, ഇറിഗേഷന്‍ പുറമ്പോക്ക് തുടങ്ങിയ വിവിധങ്ങളായ സ്ഥലങ്ങള്‍ ഏറ്റെടുക്കുന്നതുമായി ബന്ധപ്പെട്ട നടപടികള്‍ ഒക്ടോബര്‍ മുതല്‍ നാല് ഘട്ടങ്ങളിലായി പൂര്‍ത്തീകരിക്കുമെന്നും മന്ത്രി പറഞ്ഞു.
ജില്ലയില്‍ സ്മാര്‍ട്ട് വില്ലേജുകളാക്കാന്‍ അനുമതി ലഭിച്ച 65 വില്ലേജ് ഓഫീസുകളില്‍ 41 എണ്ണം ഇതിനകം സ്മാര്‍ട്ട് ആയി. കഴിഞ്ഞ രണ്ട് വര്‍ഷത്തിനിടയില്‍ ജില്ലയില്‍ 1993 ഭൂപതിവ് പട്ടയങ്ങളും 21223 ലാന്‍ഡ് ട്രിബ്യൂണല്‍ പട്ടയങ്ങളും ഉള്‍പ്പെടെ 23216 പട്ടയങ്ങള്‍ വിതരണം ചെയ്യാനായി. ഡിജിറ്റല്‍ റീസര്‍വേയുടെ കാര്യത്തില്‍ ജില്ല സംസ്ഥാനത്ത് അഞ്ചാം സ്ഥാനത്താണ്.
മുഖ്യമന്ത്രിയുടെ ദുരിതാശ്വാസ നിധിയുമായി (സിഎംഡിആര്‍എഫ്) ബന്ധപ്പെട്ട് ലഭിക്കുന്ന അപേക്ഷകളിന്മേല്‍ ആവശ്യമായ അന്വേഷണം നടത്തിയ 48 മണിക്കൂറിനുള്ളില്‍ അവ തുടര്‍നടപടികള്‍ക്കായി സമര്‍പ്പിക്കണമെന്ന് വില്ലേജ് ഓഫീസര്‍മാര്‍ക്ക് മന്ത്രി നിര്‍ദ്ദേശം നല്‍കി. ഇക്കാര്യത്തില്‍ വീഴ്ച വരുത്തുന്നവര്‍ക്കെതിരേ കര്‍ശന നടപടി സ്വീകരിക്കുമെന്നും മന്ത്രി പറഞ്ഞു. പട്ടയ അസംബ്ലികളില്‍ എംഎല്‍എമാര്‍ ഉന്നയിക്കുന്ന വിഷയങ്ങളില്‍ സ്വീകരിക്കുന്ന നടപടികളെ കുറിച്ച് മൂന്നു മാസത്തിലൊരിക്കല്‍ ജില്ലാ കലക്ടറുടെ നേതൃത്വത്തില്‍ അവലോകനം ചെയ്യണമെന്നും റവന്യൂമന്ത്രി നിര്‍ദ്ദേശിച്ചു.
ഠാണ- ചന്തക്കുന്ന് ജംഗ്ഷന്‍, കരുവന്നൂര്‍- കാട്ടൂര്‍ റോഡ് എന്നിവയുടെ വികസനവുമായി ബന്ധപ്പെട്ട ഭൂമി ഏറ്റെടുക്കല്‍ നടപടികള്‍ വേഗത്തിലാക്കണമെന്ന് ഉന്നതവിദ്യാഭ്യാസ വകുപ്പ് മന്ത്രി ഡോ. ആര്‍ ബിന്ദു പറഞ്ഞു. ഷൊര്‍ണൂര്‍- കൊടുങ്ങല്ലൂര്‍ റോഡ് വികസനത്തോടൊപ്പം തന്നെ ജംഗ്ഷന്‍ വികസനം പൂര്‍ത്തിയാക്കേണ്ടതിനാല്‍ അടിയന്തര പ്രാധാന്യത്തോടെ ഇക്കാര്യത്തില്‍ നടപടി സ്വീകരിക്കണം. പട്ടയ വിതരണം, വിവിധ പദ്ധതികള്‍ക്കായുള്ള ഭൂമി ഏറ്റെടുക്കല്‍ നടപടികള്‍, ദുരന്ത നഷ്ടപരിഹാരം, സര്‍വേ നടപടികള്‍ വേഗത്തിലാക്കല്‍ തുടങ്ങിയ വിഷയങ്ങളുമായി ബന്ധപ്പെട്ട വിഷയങ്ങള്‍ എംഎല്‍എമാര്‍ റവന്യൂ അസംബ്ലിയില്‍ ഉന്നയിച്ചു. താലൂക്ക് തലങ്ങളില്‍ നടന്ന കരുതലും കൈത്താങ്ങും അദാലത്തുകളില്‍ ലഭിച്ച 3447 അപേക്ഷകളില്‍ 92.63 ശതമാനത്തിലും തീര്‍പ്പുകള്‍ കല്‍പ്പിക്കാനയാതായി ജില്ലാ കലക്ടര്‍ വി ആര്‍ കൃഷ്ണ തേജ അറിയിച്ചു.
റവന്യൂ അസംബ്ലിയില്‍ ഉന്നതവിദ്യാഭ്യാസ മന്ത്രി ഡോ. ആര്‍ ബിന്ദു, എംഎല്‍എമാരായ കെ കെ രാമചന്ദ്രന്‍, സി സി മുകുന്ദന്‍, ഇ ടി ടൈസണ്‍ മാസ്റ്റര്‍, മുരളി പെരുനെല്ലി, എന്‍ കെ അക്ബര്‍, വി ആര്‍ സുനില്‍കുമാര്‍, സനീഷ് കുമാര്‍ ജോസഫ് തുടങ്ങിയവരും മന്ത്രി കെ രാധാകൃഷ്ണന്‍ പ്രതിനിധി കെ കെ മുരളീധരന്‍, ജില്ലാ കലക്ടര്‍ വി ആര്‍ കൃഷ്ണതേജ, ലാന്റ് റവന്യൂ കമ്മീഷണര്‍ ഡോ. എ കൗശിഗന്‍, സര്‍വേ ഡയരക്ടര്‍ സീറാം സാംബശിവറാവു, ഐഎല്‍ഡിഎം ഡയരക്ടര്‍ ഡോ. ഡി സജിത്ത് ബാബു, ലാന്റ് റവന്യൂ ജോ. കമ്മീഷണര്‍ അര്‍ജുന്‍ പാണ്ഡ്യന്‍, സബ് കളക്ടര്‍ മുഹമ്മദ് ഷെഫീഖ്, എഡിഎം ടി മുരളി തുടങ്ങിയവര്‍ സംസാരിച്ചു.