പച്ചക്കറി ഉല്‍പാദനത്തില്‍ സ്വയംപര്യാപ്തമാവാനൊരുങ്ങി മൂപ്പൈനാട് ഗ്രാമപഞ്ചായത്ത്. ജനകീയാസൂത്രണം 2018-19 വാര്‍ഷിക പദ്ധതിയിലുള്‍പ്പെടുത്തി നടപ്പാക്കുന്ന പച്ചക്കറി വികസന പദ്ധതി പ്രകാരം ആദ്യഘട്ടമായി 60,000 പച്ചക്കറിത്തൈകള്‍ വിതരണം ചെയ്തു. മൂപ്പൈനാട് ഗ്രാമപഞ്ചായത്ത് കുടുബശ്രീ അയല്‍ക്കൂട്ടങ്ങള്‍ മുഖേന സി.ഡി.എസിന്റെ നേതൃത്വത്തില്‍ നടക്കുന്ന പദ്ധതിയുടെ മൂന്നുഘട്ടങ്ങള്‍ പൂര്‍ത്തീകരിക്കുന്നതോടെ പഞ്ചായത്തിലെ മുഴുവന്‍ ഭവനങ്ങള്‍ക്കും അത്യാവശ്യ പച്ചക്കറി വിഷരഹിതമായും ന്യായവിലയിലും ലഭ്യമാക്കുന്നതിനാണ് ഗ്രാമപഞ്ചായത്തും സി.ഡി.എസും ലക്ഷ്യമിടുന്നത്.
ഉല്‍പാദന മേഖലയില്‍ ആകെ വകയിരുത്തിയ തുകയുടെ 30 ശതമാനത്തിലധികമാണ് മൂപ്പൈനാട് പഞ്ചായത്തില്‍ പച്ചക്കറി കൃഷിക്കായി മാറ്റിവച്ചിട്ടുള്ളത്. ആദ്യഘട്ട പച്ചക്കറിത്തൈ വിതരണോദ്ഘാടനം ഗ്രാമപ്പഞ്ചായത്ത് അദ്ധ്യക്ഷ ആര്‍. യമുന നിര്‍വഹിച്ചു. ഉപാദ്ധ്യക്ഷന്‍ കാപ്പന്‍ ഹംസ അദ്ധ്യക്ഷത വഹിച്ചു. വികസനകാര്യ സ്ഥിരം സമിതി അദ്ധ്യക്ഷ പ്രബിത, ആരോഗ്യ-വിദ്യാഭ്യാസ സ്ഥിരംസമിതി അദ്ധ്യക്ഷന്‍ ഷഹര്‍ബാന്‍ സൈതലവി, ക്ഷേമകാര്യ സ്ഥിരം സമിതി അദ്ധ്യക്ഷന്‍ യഹ്യാഖാന്‍ തലക്കല്‍, പഞ്ചായത്ത് അംഗം വിജയകുമാരി, പി.സി ഹരിദാസന്‍, ഷൈബാന്‍ സലാം, കെ. വിജയന്‍, ടി. ദാമോദരന്‍, സി.ഡി.എസ് അദ്ധ്യക്ഷ സഫിയ സമദ്, കൃഷി ഓഫിസര്‍ മറിയുമ്മ, കൃഷി അസിസ്റ്റന്റ് പി. കൃഷ്ണന്‍ എന്നിവര്‍ സംസാരിച്ചു.
