വയനാട്: ക്ഷേത്രപ്രവേശന വിളംബരം 82-ാം വാർഷികാഘോഷത്തിന്റെ ഭാഗമായി ജില്ലയിൽ വിപുലമായ പരിപാടികൾ സംഘടിപ്പിക്കും. നവംബർ 10 രാവിലെ 10ന് കൽപ്പറ്റ പുതിയ ബസ്‌സ്റ്റാൻഡിൽ നടക്കുന്ന ചരിത്ര പ്രദർശനം സി.കെ. ശശീന്ദ്രൻ എം.എൽ.എയും കൽപ്പറ്റ നഗരസഭ അദ്ധ്യക്ഷ സനിത ജഗദീഷും ചേർന്ന് ഉദ്ഘാടനം ചെയ്യും. രാവിലെ 11ന് എസ്.കെ.എം.ജെ യു.പി സ്‌കൂൾ ഓഡിറ്റോറിയത്തിൽ ഹയർസെക്കണ്ടറി വിദ്യാർത്ഥികൾക്ക് ഉപന്യാനവും ഹൈസ്‌കൂൾ വിദ്യാർത്ഥികൾക്ക് ചിത്രരചനാ മത്സരവും സംഘടിപ്പിക്കും. വൈകിട്ട് മൂന്നിന് വാദ്യമേളങ്ങൾ, പ്ലോട്ടുകൾ എന്നിവയുടെ അകമ്പടിയോടെ നഗരസഭ പരിസരത്തു നിന്നും ആരംഭിച്ച് കൽപ്പറ്റ പുതിയ ബസ്‌സ്റ്റാൻഡ് പരിസരത്ത് സമാപിക്കുന്ന വിധത്തിൽ വിളംബര ഘോഷയാത്രയും നടക്കും. മന്ത്രി രാമചന്ദ്രൻ കടന്നപ്പള്ളി, എം.പി, എം.എൽ.എമാർ തുടങ്ങിയവർ പങ്കെടുക്കും. തുടർന്ന് നടക്കുന്ന പൊതുസമ്മേളനം സി.കെ. ശശീന്ദ്രൻ എം.എൽ.എയുടെ അദ്ധ്യക്ഷതയിൽ മന്ത്രി രാമചന്ദ്രൻ കടന്നപ്പള്ളി ഉദ്ഘാടനം ചെയ്യും. പ്രശസ്ത മലയാള സാഹിത്യകാരൻ കെ.പി. രാമനുണ്ണി മുഖ്യപ്രഭാഷണം നടത്തും. തുടർന്ന് തൃശ്ലേരി പി.കെ. കാളൻ സ്മാരക ഗോത്രകലാപഠന ഗവേഷണകേന്ദ്രം ഗദ്ദികയും കൽപ്പറ്റ എമിലി ഉണർവ്വ് നാടൻ കലാപഠന കേന്ദ്രത്തിലെ രമേശ് എമിലിയും സംഘവും അവതരിപ്പിക്കുന്ന നാടൻപാട്ടും അരങ്ങേറും.
നവംബർ 11ന് ഉച്ചയ്ക്ക് മൂന്നിന് വെള്ളമുണ്ട പബ്ലിക് ലൈബ്രറി ഹാളിൽ ക്ഷേത്രപ്രവേശന വിളംബര അനുസ്മരണവും നവോത്ഥാന സംഗമവും നടക്കും. കോട്ടത്തറ ഗ്രാമപഞ്ചായത്ത് ഉപാദ്ധ്യക്ഷൻ വി.എൻ. ഉണ്ണികൃഷ്ണൻ സംഗമം ഉദ്ഘാടനം ചെയ്യും. നവംബർ 12ന് ഉച്ചയ്ക്ക് കളക്ടറേറ്റ് കോൺഫറൻസ് ഹാളിൽ കേരളം അന്നും ഇന്നും എന്ന വിഷയത്തിൽ സ്വാമിനാഥൻ റിസേർച്ച് ഫൗണ്ടേഷൻ ശാസ്ത്രജ്ഞ ഡോ. സി.എസ്. ചന്ദ്രികയുടെ പ്രഭാഷണവും മുഖ്യപരിപാടികളായി സംഘടിപ്പിക്കും.
കേരളത്തിന്റെ നവോത്ഥാന ചരിത്രത്തെക്കുറിച്ച് യുവതലമുറയ്ക്ക് അവബോധം സൃഷ്ടിക്കുന്നതിനും സംസ്ഥാനത്തിന്റെ ഉന്നത മതേതര ജനാധിപത്യ മൂല്യബോധം കാത്തുസൂക്ഷിക്കുന്നതിനും വേണ്ടി നവംബർ 10 മുതൽ 12 വരെ സംസ്ഥാനത്തെ എല്ലാ ജില്ലാ ആസ്ഥാനങ്ങളിലും ക്ഷേത്രപ്രവേശന വിളംബരം 82-ാം വാർഷികാഘോഷം സംഘടിപ്പിക്കുകയാണ്.