തദ്ദേശ സ്വയംഭരണ തിരഞ്ഞെടുപ്പിന്റെ ഭാഗമായി ഉദ്യോഗസ്ഥർക്കുള്ള പരിശീലനം കൂടുതൽ കാര്യക്ഷമമാക്കാനായി ജില്ലാ തിരഞ്ഞെടുപ്പ് വിഭാഗം പുതിയ വീഡിയോ സീരീസ് പുറത്തിറക്കി. ‘ത്രിതലം ലളിതം’ എന്ന് പേരിട്ടിട്ടുള്ള ഈ വീഡിയോ സീരീസിന്റെ ആദ്യ എഡിഷൻ ജില്ലാ കളക്ടർ മാധവിക്കുട്ടി എം. എസ്. പ്രകാശനം ചെയ്തു. തിരഞ്ഞെടുപ്പ് നടപടിക്രമങ്ങൾ ലളിതമായി വിശദീകരിക്കുന്ന ഈ വീഡിയോ, പരിശീലനം ലഭിക്കുന്ന ഉദ്യോഗസ്ഥർക്ക് ഏറെ പ്രയോജനകരമാകും.

​പാലക്കാട് ജില്ലാ പഞ്ചായത്ത് ഹാളിൽ രണ്ട് ദിവസങ്ങളിലായി നടന്ന തദ്ദേശ തിരഞ്ഞെടുപ്പ് ട്രെയിനർമാരുടെ പരിശീലന പരിപാടിയുടെ സമാപന സമ്മേളനത്തിലാണ് കളക്ടർ വീഡിയോ പ്രകാശനം ചെയ്തത്. പുറത്തിറക്കിയ ഈ പരിശീലന വീഡിയോ പൊതുജനങ്ങൾക്കും ഉദ്യോഗസ്ഥർക്കും കാണാനായി യൂട്യൂബിൽ ലഭ്യമാണ്. ‘ഇലക്ഷൻ ക്ലാസ് റൂം’ (Election Classroom, https://youtu.be/eEIo-1YegS0) എന്ന യൂട്യൂബ് ചാനലിലാണ് വീഡിയോ പ്രസിദ്ധീകരിച്ചിട്ടുള്ളത്. തിരഞ്ഞെടുപ്പ് പ്രക്രിയയെക്കുറിച്ച് സാധാരണക്കാർക്കും എളുപ്പത്തിൽ മനസ്സിലാക്കാൻ ഈ വീഡിയോ സഹായകമാകും.

ജില്ലയിലെ വിവിധ ബ്ലോക്കുകളിൽ നിന്നും മുനിസിപ്പൽ തലത്തിൽ നിന്നുമുള്ള 85 ഓളം ട്രെ യിനർമാരാണ് ജില്ലാ പഞ്ചായത്ത് ഹാളിൽ രണ്ട് ദിവസങ്ങളിലായി നടന്നപരിശീലനത്തിൽ പങ്കെടുത്തത്. ഈ ട്രെയിനർമാർ ഇനി അതത് ബ്ലോക്കുകളിലും മുനിസിപ്പാലിറ്റികളിലുമുള്ള മറ്റ് ഉദ്യോഗസ്ഥർക്ക് പരിശീലനം നൽകി തിരഞ്ഞെടുപ്പ് ഡ്യൂട്ടികൾക്കായി സജ്ജരാക്കും.