➣ യുവജനക്ഷേമ ബോര്‍ഡ് കലാഭവന്‍ മണിയുടെ സ്മരണാര്‍ത്ഥം നടത്തുന്ന ‘മണിനാദം 2026’ നാടന്‍പാട്ട് മത്സരത്തിന് അപേക്ഷ ക്ഷണിച്ചു. യുവജനക്ഷേമ ബോര്‍ഡില്‍ അംഗമായ ക്ലബ്ബുകളുടെ ടീമുകള്‍ക്കാണ് പങ്കെടുക്കാന്‍ അവസരം. പങ്കെടുക്കുന്നവരുടെ പ്രായം 18 നും 40 നും ഇടയിലാവണം. ടീം അംഗങ്ങളുടെ എണ്ണം 10, പരമാവധി സമയം 10 മിനിറ്റ്.

ജില്ലാതലത്തില്‍ ഒന്നും രണ്ടും മൂന്നും സ്ഥാനക്കാര്‍ക്ക് യഥാക്രമം 25000/, 10000/, 5000/ എന്നിങ്ങനെ സമ്മാനത്തുക ലഭിക്കും. ജില്ലയില്‍ ഒന്നാം സ്ഥാനം ലഭിക്കുന്നവര്‍ക്ക് തൃശൂര്‍ ചാലക്കുടിയില്‍ നടക്കുന്ന സംസ്ഥാനതല മത്സരത്തില്‍ പങ്കെടുക്കാന്‍ അവസരം ലഭിക്കും. സംസ്ഥാനതല മത്സരത്തില്‍ ആദ്യ മൂന്ന് സ്ഥാനം നേടുന്നവര്‍ക്ക് യഥാക്രമം 100000, 75000, 50000 രൂപ വീതം ലഭിക്കും. അപേക്ഷകള്‍ തപാല്‍ വഴിയോ, ഇ മെയില്‍ വഴിയോ 2026 ഫെബ്രുവരി മൂന്നിനകം നല്‍കണം. വിശദവിവരങ്ങള്‍ മലപ്പുറം ബ്ലോക്ക് പഞ്ചായത്ത് ഓഫീസില്‍ പ്രവര്‍ത്തിക്കുന്ന ജില്ലാ യുവജന കേന്ദ്രം ഓഫീസുമായോ, 0483 2960700 നമ്പറിലോ ലഭിക്കും. വെബ്‌സൈറ്റ്- malappuramyouth@gmail.com.

➣ സര്‍ക്കാര്‍ സ്ഥാപനമായ സി-ആപ്റ്റും സാങ്കേതിക വിദ്യാഭ്യാസ വകുപ്പും സംയുക്തമായി കോഴിക്കോട് ഉപകേന്ദ്രത്തില്‍ നടത്തുന്ന ആറ് മാസം ദൈര്‍ഘ്യമുള്ള പി.എസ്.സി അംഗീകൃത സര്‍ട്ടിഫിക്കറ്റ് ഇന്‍ കംപ്യൂട്ടര്‍ ആന്റ് ഡി.ടി.പി ഓപ്പറേഷന്‍ കോഴ്‌സിന് അപേക്ഷ ക്ഷണിച്ചു. പത്താംതരം വിജയിച്ചവര്‍ക്ക് ഫെബ്രുവരി അഞ്ച് വരെ അപേക്ഷിക്കാം. പട്ടികജാതി/പട്ടികവര്‍ഗ/മറ്റ് അര്‍ഹരായ വിഭാഗങ്ങള്‍ക്ക് നിയമാനുസൃത ഫീസ് ആനുകൂല്യവും സ്‌റ്റൈപ്പെന്‍ഡും ലഭിക്കും. വെബ്‌സൈറ്റ്- kozhikode@captkerala.com, captkerala.com, ഫോണ്‍- 0495 2723666, 0495 2356591, 9496882366.

➣പത്താം ക്ലാസ് മുതലുള്ള വിവിധ പൊതു പരീക്ഷകള്‍ക്ക് ഉയര്‍ന്ന മാര്‍ക്ക് വാങ്ങി വിജയിക്കുന്ന പട്ടിക ജാതി വിദ്യാര്‍ഥികള്‍ക്ക് പ്രത്യേക പ്രോത്സാഹന സമ്മാന പദ്ധതി പ്രകാരമുള്ള സ്‌കോളര്‍ഷിപ്പിന് അപേക്ഷ ക്ഷണിച്ചു. 2024-25 അധ്യയന വര്‍ഷം ബി ഗ്രേഡ് അല്ലെങ്കില്‍ 60 ശതമാനം മാര്‍ക്കിന് മുകളില്‍ വാങ്ങി വിജയിച്ചവര്‍ പരീക്ഷയുടെ മാര്‍ക്ക് ലിസ്റ്റ് സഹിതം ഇ-ഗ്രാന്റ്സ് 3.0 പ്രൊഫൈല്‍ മുഖേന ഫെബ്രുവരി ഏഴിനകം അപേക്ഷിക്കണം. ഫോണ്‍- 0483 27334901.