കൽപ്പറ്റ നഗരസഭ പിഎംഎവൈ ലൈഫ് പദ്ധതിയിൽ പൂർത്തിയാക്കിയ 301 വീടുകളുടെ താക്കോൽദാനം ഫെബ്രുവരി 16ന് നടക്കും. സംസ്ഥാന സർക്കാരിന്റെ ആയിരം ദിനാഘോഷത്തിന്റെ ഭാഗമായാണ് താക്കോൽദാനം. കൽപ്പറ്റ മുനിസിപ്പൽ ടൗൺഹാളിൽ രാവിലെ 11.30നു തൊഴിൽ-എക്‌സൈസ് വകുപ്പ് മന്ത്രി ടി.പി രാമകൃഷ്ണൻ ഉദ്ഘാടനം ചെയ്യും. സി.കെ ശശീന്ദ്രൻ എംഎൽഎ അധ്യക്ഷത വഹിക്കും. നഗരസഭ ചെയർപേഴ്‌സൺ സനിത ജഗദീഷ്, വൈസ് ചെയർമാൻ ആർ. രാധാകൃഷ്ണൻ, സ്ഥിരം സമിതി അധ്യക്ഷരായ ബിന്ദു ജോസ്, മണി, കെ. അജിത, അഡ്വ. ടി.ജെ ഐസക്, ഉമൈബ മൊയ്തീൻകുട്ടി തുടങ്ങിയവർ സംസാരിക്കും.
പിഎംഎവൈ ലൈഫ് പദ്ധതിയിൽ ഉൾപ്പെടുത്തി നാലുലക്ഷം രൂപ ചെലവിലാണ് പുതിയ വീടുകൾ നിർമിച്ചത്. ഇതിൽ രണ്ടുലക്ഷം കേന്ദ്ര-സംസ്ഥാന വിഹിതവും രണ്ടുലക്ഷം രൂപ നഗരസഭ വിഹിതവുമാണ്. വിവിധ പദ്ധതികൾ പ്രകാരം നിർമാണം തുടങ്ങി പാതിവഴിയിൽ നിലച്ച വീടുകളും ആനുപാതികമായി തുക വകയിരുത്തി ഇതോടൊപ്പം പൂർത്തിയാക്കി. പദ്ധതി യാഥാർത്ഥ്യമാക്കാൻ കേരള സസ്റ്റൈനബിൾ അർബൻ ഡെവലപ്‌മെന്റ് പ്രൊജക്റ്റിൽ നിന്ന് നഗരസഭ അഞ്ചര കോടി രൂപയാണ് വായ്പയെടുത്തത്. 2.35 കോടി രൂപ പദ്ധതി വിഹിതമായും ചെലവഴിച്ചു.