ഹരിതകേരളം മിഷന്റെയും ശുചിത്വമിഷന്റെയും സംയുക്താഭിമുഖ്യത്തിൽ മാലിന്യത്തിൽ നിന്ന് സ്വാതന്ത്ര്യം രണ്ടാംഘട്ട ക്യാമ്പയിന്റെ ഭാഗമായി ശുചിത്വമികവ് ഏകദിന ജില്ലാ സംഗമം നടത്തി. ജില്ലാ ആസൂത്രണഭവൻ എപിജെ ഹാളിൽ നടന്ന പരിപാടി ജില്ലാ പഞ്ചായത്ത് വൈസ് പ്രസിഡന്റ് എ. പ്രഭാകരൻ ഉദ്ഘാടനം ചെയ്തു. ശുചിത്വമിഷൻ ജില്ലാ കോ-ഓഡിനേറ്റർ പി.എ ജസ്റ്റിൻ അധ്യക്ഷത വഹിച്ചു.
മാലിന്യത്തിൽ നിന്നു സ്വാതന്ത്യം-രണ്ടാംഘട്ട ക്യാമ്പയിനും ശുചിത്വമികവുകളും എന്ന വിഷയം ഹരിതകേരളം മിഷൻ ജില്ലാ കോ-ഓഡിനേറ്റർ ബി.കെ സുധീർ കിഷൻ അവതരിപ്പിച്ചു.
കൽപ്പറ്റ ജിഎസ്ടി ഓഫീസ്, മാനന്തവാടി ഡിഎം ഓഫിസ്, ഹിൽബ്ലൂംസ് സ്‌കൂൾ ഗ്രീൻ സൊസൈറ്റി, കൽപ്പറ്റ മുനിസിപ്പാലിറ്റി, മീനങ്ങാടി, എടവക, പൊഴുതന, മൂപ്പൈനാട് ഗ്രാമപഞ്ചായത്ത് പ്രതിനിധികൾ അതാതു സ്ഥാപന പരിധിയിൽ നടപ്പാക്കിയ ശുചിത്വ മികവുകൾ അവതരിപ്പിച്ചു. ഡിപിസി അംഗം സി.കെ ശിവരാമൻ, കില ഫെസിലിറ്റേറ്റർ പ്രഫ. കെ. ബാലഗോപാലൻ, ഐആർടിസി റിസർച്ച് ഓഫിസർ ബി.എം മുസ്തഫ, ശുചിത്വമിഷൻ അസിസ്റ്റന്റ് കോ-ഓഡിനേറ്റർ എ കെ രാജേഷ്, കുടുംബശ്രീ ജില്ലാ മിഷൻ കോ-ഓഡിനേറ്റർ പി സാജിത, ഹരിതകേരളം മിഷൻ റിസോഴ്‌സ്‌പേഴ്‌സൺ എം ആർ പ്രഭാകരൻ എന്നിവർ സംസാരിച്ചു. ഹരിതകർമ സേനാംഗങ്ങൾ, ശുചിത്വമിഷൻ പ്രതിനിധികൾ, കുടുംബശ്രീ അംഗങ്ങൾ, ഹരിതകേരളം മിഷൻ പ്രതിനിധികൾ തുടങ്ങിയവർ പങ്കെടുത്തു. കുടുംബശ്രീ മിഷന്റെയും ക്ലീൻ കേരള കമ്പനിയുടെയും സഹകരണത്തോടെയാണ് പരിപാടി സംഘടിപ്പിച്ചത്.
