നായരമ്പലം പഞ്ചായത്ത് ഓഫീസും കമ്മ്യൂണിറ്റി ഹാളും നിയമസഭാ സ്പീക്കർ പി.ശ്രീരാമകൃഷ്ണൻ
ഉദ്ഘാടനം ചെയ്തു.

കൊച്ചി: നവീകരിച്ച നായരമ്പലം ഹൈ – ടെക്ക് പഞ്ചായത്ത് ഓഫീസും കമ്മ്യൂണിറ്റി ഹാളും നിയമസഭാ സ്പീക്കർ പി.ശ്രീരാമകൃഷ്ണൻ ഉദ്ഘാടനം ചെയ്തു. ഐ എസ് ഒ അംഗീകൃത സർട്ടിഫിക്കറ്റ് സ്പീക്കർ പി.ശ്രീരാമകൃഷ്ണൻ പഞ്ചായത്ത് പ്രസിഡന്റ് ഇ.പി. ഷിബുവിന് കൈമാറി. വൈപ്പിൻ കരയുടെ പശ്ചാത്തല സൗകര്യ വികസന രംഗത്ത് എം എൽ എ യുടെ ആസ്തി വികസന ഫണ്ട് ഉപയോഗിച്ച് പുതിയ ഒരു അദ്ധ്യായമാണ് തുടങ്ങിയിരിക്കുന്നത്. പൊതുജനങ്ങൾക്ക് പരമാവധി സേവനങ്ങൾ നൽകി ജനപക്ഷ പഞ്ചായത്തായി മാറണമെന്നും അദ്ദേഹം പറഞ്ഞു.

ആധുനിക സംവിധാനങ്ങളോടു കൂടിയ ഓഫീസ് മുറികളാണ് പഞ്ചായത്ത് ഓഫീസിൽ സജ്ജീകരിച്ചിരിക്കുന്നത്. വൈപ്പിന്‍ പള്ളിപ്പുറം സംസ്ഥാന പാതയിലാണ് നായരമ്പലം പഞ്ചായത്തിന്റെ നവീകരിച്ച കെട്ടിടം നിര്‍മിച്ചിരിക്കുന്നത്. പൂർണ്ണമായും ഹരിത പെരുമാറ്റ ചട്ടം പാലിച്ചായിരുന്നു ഉദ്ഘാടന ചടങ്ങുകൾ.

കോൺഫറൻസ് ഹാൾ, ഫ്രണ്ട് ഓഫിസ്, കുടുംബശ്രീയുടെ നേതൃത്വത്തില്‍ ഹെല്‍പ് ഡെസ്ക്, കുടിവെള്ള സംവിധാനം, ആധുനിക ഇരിപ്പിടങ്ങള്‍, ശുചിമുറികള്‍, മുലയൂട്ടൽ മുറി തുടങ്ങിയവയെല്ലാം പുതിയ ഓഫിസിലുണ്ട്.  2.63 കോടി രൂപ ചെലവിട്ടാണ് പഞ്ചായത്ത് ഓഫിസ് കെട്ടിട നിർമ്മാണം പൂർത്തീകരിച്ചത്.

എം.ജി എൻ.ആർ.ഇ.ജി.എസ് ഓഫീസ്, കോൺഫറൻസ് ഹാൾ, എൽ.എസ്.ജി.ഡി എഞ്ചിനീയറുടെ കാര്യാലയം, , വിഇഒ ഓഫീസ് , പൊതുജനങ്ങൾക്കായി പ്രത്യേക ഇരിപ്പിടങ്ങൾ, കുടിവെള്ള സംവിധാനം, എന്നിവ പുതിയ പഞ്ചായത്ത് ഓഫീസ് കെട്ടിടത്തിലുണ്ട്.

എസ് ശർമ എം എൽ എ യുടെ ആസ്തി വികസന പദ്ധതി പ്രകാരമാണ് അത്യാധുനിക സംവിധാനങ്ങളോടെ പഞ്ചായത്ത് ഓഫീസും ആയിരം പേർക്ക് ഇരിക്കാവുന്ന കമ്മ്യൂണിറ്റി ഹാളും നിർമ്മിച്ചിരിക്കുന്നത്. സംസ്ഥാന പൊതുമരാമത്ത് കെട്ടിട വിഭാഗത്തിനായിരുന്നു നിർമ്മാണ ചുമതല. ബി.പി.എൽ വിഭാഗങ്ങൾക്ക് കമ്മ്യൂണിറ്റി ഹാൾ സൗജന്യമായി ആവശ്യങ്ങൾക്ക് ലഭിക്കുന്നതിന് വേണ്ട നടപടികൾ സ്വീകരിക്കുമെന്ന് എസ്. ശർമ എം എൽ എ പറഞ്ഞു.

എസ്. ശർമ എം എൽ. അദ്ധ്യക്ഷത വഹിച്ച ചടങ്ങിൽ ഹൈബി ഈഡൻ എം.പി. , ജോൺ ഫെർണാണ്ടസ് എം എൽ എ എന്നിവർ മുഖ്യാതിഥികൾ ആയിരുന്നു. മദ്ധ്യമേഖല പൊതുമരാമത്ത് സൂപ്രണ്ടിങ് എഞ്ചിനീയർ എ. മൊഹമ്മദ് , വൈപ്പിൻ ബ്ലോക്ക് പഞ്ചായത്ത് പ്രസിഡന്റ് ഡോ.കെ.കെ ജോഷി, പഞ്ചായത്ത് ഡെപ്യൂട്ടി ഡയറക്ടർ ബിനു ജോൺ, ജില്ലാ പഞ്ചായത്തംഗം റോസ് മേരി ലോറൻസ്, നായരമ്പലം സർവ്വീസ് സഹകരണ ബാങ്ക് പ്രസിഡന്റ് പി.കെ. രാജീവ്, കുടുംബശ്രീ സി ഡി എസ് ചെയർപേഴ്സൺ സവിത രഘു, പഞ്ചായത്ത് സെക്രട്ടറി കെ കെ ജയചന്ദ്രൻ തുടങ്ങിയവർ പങ്കെടുത്തു.