പട്ടികവർഗ വികസന വകുപ്പിന് കീഴിലുളള വിവിധ ഓഫീസുകളിൽ ഓഫീസ് മാനേജ്‌മെന്റ് ട്രെയിനി തസ്തികയിലേക്ക് പട്ടികവർഗ യുവതീയുവാക്കളിൽ നിന്നും അപേക്ഷ ക്ഷണിച്ചു. ആകെയുളള 140 ഒഴിവുകളിലേക്ക് എസ്.എസ്.എൽ.സി പാസായവർക്ക് അപേക്ഷിക്കാം. അപേക്ഷകർ ജനുവരിയിൽ 18 വയസ്സ് പൂർത്തിയായവരും 35 വയസ്സ് കവിയാത്തവരുമായിരിക്കണം. ബിരുദധാരികൾക്ക് അഞ്ച് മാർക്ക് ഗ്രേസ്് മാർക്കായി ലഭിക്കും. ഉദ്യോഗാർത്ഥികളുടെ വാർഷികവരുമാനം 40,000 രൂപയിൽ കവിയരുത് (കുടുംബനാഥന്റെ/സംരക്ഷകന്റെ വരുമാനം) അപേക്ഷകരെ സ്വന്തം ജില്ലയിൽ മാത്രമേ പരിഗണിക്കുകയുളളൂ. പരിശീലനത്തിനായി തിരഞ്ഞെടുക്കപ്പെടുന്നവർക്ക് പ്രതിമാസം 10,000 രൂപ ഓണറേറിയം നൽകും. നിയമനം അപ്രന്റീസ്ഷിപ്പ് ആക്ട് അനുസരിച്ചുളള നിയമങ്ങൾക്ക് വിധേയവും താൽക്കാലികവും പരമാവധി ഒരു വർഷത്തേക്കുമാത്രവുമായിരിക്കും. പട്ടികവർഗ വികസന വകുപ്പിന്റെ അതത് ജില്ലാതല ഓഫീസുകളിൽ നടത്തുന്ന എഴുത്തു പരീക്ഷയുടെ അടിസ്ഥാനത്തിലാണ് തിരഞ്ഞെടുപ്പ്. അപേക്ഷാഫോമുകൾ എല്ലാ പ്രോജക്ട് ഓഫീസ്/ട്രൈബൽ ഡവലപ്‌മെന്റ് ഓഫീസ്/ട്രൈബൽ എക്സ്റ്റഷൻ ഓഫീസുകളിലും ലഭിക്കും. പൂരിപ്പിച്ച അപേക്ഷ അതത് ജില്ല പ്രോജക്ട് ഓഫീസ്/ട്രൈബൽ ഡവലപ്‌മെന്റ് ഓഫീസ്/ട്രൈബൽ എക്സ്റ്റൻഷൻ ഓഫീസുകളിൽ സമർപ്പിക്കണം. അവസാന തീയതി ജൂലൈ 31. ഒരു തവണ പരിശീലനം നേടിയവർ വീണ്ടും അപേക്ഷിക്കാൻ പാടില്ല. തിരഞ്ഞെടുക്കപ്പെടുന്നവർ പരിശീലനത്തിന് റിപ്പോർട്ടു ചെയ്യുമ്പോൾ വരുമാന സർട്ടിഫിക്കറ്റ്, നിലവിലുളള റേഷൻ കാർഡ്, വരുമാനം സംബന്ധിച്ച് 200 രൂപ മുദ്രപത്രത്തിൽ അഫിഡവിറ്റ് എന്നിവ ഹാജരാക്കണം.