* പൊതുവിദ്യാഭ്യാസ മന്ത്രി ഉദ്ഘാടനം ചെയ്തു

തലസ്ഥാന നഗരിയിലെ പ്രമുഖ സ്‌കൂളായ മണക്കാട് കാർത്തിക തിരുനാൾ ഗവ. ഗേൾസ് വൊക്കേഷണൽ ആന്റ് ഹയർ സെക്കന്ററി സ്‌കൂളിന് കൂടുതൽ പ്രൗഢിയേകി പുതിയ ഹൈടെക് മന്ദിരം. അന്താരാഷ്ട്ര നിലവാരത്തിലേക്കുയർത്തുന്നതിന് തിരുവനന്തപുരം നിയോജക മണ്ഡലത്തിൽ നിന്ന് തെരഞ്ഞെടുത്ത സ്‌കൂളിൽ അത്യാധുനിക സൗകര്യങ്ങളോടെ നിർമ്മിച്ച ബഹുനില മന്ദിരം പൊതുവിദ്യാഭ്യാസ വകുപ്പ് മന്ത്രി പ്രൊഫ.സി.രവീന്ദ്രനാഥ് ഉദ്ഘാടനം ചെയ്തു.

കേരളം ജനകീയ വിദ്യാഭ്യാസത്തിന്റെ മാതൃകയായി മാറുന്നുവെന്നും എല്ലാ സ്‌കൂളുകളിലും വികസനത്തിനായുള്ള മാസ്റ്റർ പ്ലാൻ തയ്യാറാക്കുമെന്നും മന്ത്രി പറഞ്ഞു. അടുത്ത അധ്യയന വർഷം കേരളത്തിന്റെ വിദ്യാഭ്യാസ രംഗത്ത് സുവർണ വർഷമാണ്. ഒന്നു മുതൽ പ്ലസ് ടു വരെയുള്ള ക്ലാസുകളെല്ലാം ഹൈടെക് ആകും. ഓരോ കുട്ടിക്കും വ്യക്തിഗതമായ അക്കാദമിക് മാസ്റ്റർ പ്ലാൻ തയ്യാറാക്കും. ക്ലാസ് മുറികളിൽ ലൈബ്രറി സജ്ജമാക്കും. ക്ലാസ് മുറിയുടെ നാല് ചുവരുകൾക്കുള്ളിൽ അറിവിന്റെ സമൃദ്ധി കുട്ടികൾക്ക് ലഭ്യമാക്കാനാണ് ലക്ഷ്യമിടുന്നതെന്നും മന്ത്രി പറഞ്ഞു.

കിഫ്ബി ഫണ്ടിൽ നിന്ന് അനുവദിച്ച അഞ്ച് കോടി രൂപയും വി.എസ്. ശിവകുമാർ എം. എൽ.എയുടെ ആസ്തി വികസന ഫണ്ടിൽ നിന്നും രണ്ട് കോടി എട്ട് ലക്ഷം രൂപയും വിനിയോഗിച്ചാണ് ബഹുനില മന്ദിരം നിർമ്മിച്ചത്. 32 ക്ലാസ് മുറികൾ, സയൻസ്, കമ്പ്യൂട്ടർ ലാബുകൾ, ഓഫീസ് മുറികൾ, അടുക്കള, 500 പേർക്ക് ഒന്നിച്ചിരുന്ന് കഴിക്കാൻ സൗകര്യമുള്ള ഡൈനിംഗ് ഹാൾ, 34 ആധുനിക ശുചിമുറികൾ, ഒരു ലക്ഷം ലിറ്റർ ജലസംഭരണി, വിശാലമായ ഓപ്പൺ എയർ ഓഡിറ്റോറിയം എന്നിവ കെട്ടിടത്തിൽ ഉൾപ്പെടുന്നു. സയൻസ് കമ്പ്യൂട്ടർ ലാബുകളുടെ ഉദ്ഘാടനവും നടന്നു.

വി.എസ്. ശിവകുമാർ എം.എൽ.എ. അധ്യക്ഷത വഹിച്ചു. മൂവായിരത്തിലധികം പെൺകുട്ടികൾ പഠിക്കുന്ന സ്‌കൂൾ കേരളത്തിന്റെ വിദ്യാഭ്യാസ സാംസ്‌കാരിക മേഖലയിൽ നിർണായകമായ സ്വാധീനമാണ് ചെലുത്തിയതെന്ന് എം.എൽ.എ. പറഞ്ഞു. മേയർ കെ. ശ്രീകുമാർ മുഖ്യാതിഥിയായി.

പ്രിൻസിപ്പൽ എസ്.അജിത്കുമാർ, പൊതുവിദ്യാഭ്യാസ സംരക്ഷണ യജ്ഞം ജില്ലാ കോർഡിനേറ്റർ എസ്. ജവാദ്, നഗരസഭ വിദ്യാഭ്യാസ സ്റ്റാന്റിംഗ് കമ്മിറ്റി ചെയർമാൻ സി.സുദർശനൻ, മരാമത്ത് വകുപ്പ് കമ്മിറ്റി ചെയർപെഴ്സൺ എസ്.പുഷ്പലത, ടാക്സ് അപ്പീൽ കമ്മിറ്റി ചെയർപെഴ്സൺ സിമി ജ്യോതിഷ്, വാർഡ് കൗൺസിലർമാരായ ആർ.മിനി, റസിയ ബീഗം, വി.ഗിരി, സ്‌കൂൾ വികസന സമിതി വർക്കിംഗ് ചെയർമാൻ എസ്.എ. സുന്ദർ, പി.ടി.എ. പ്രസിഡന്റ് എം. മണികണ്ഠൻ, കെ.വിജയകുമാരി, എ.നജീബ്, ഷൈലജാബായ്, എ.എം. മിഖ്ദാദ്, വി.എച്ച്.എസ്.ഇ. പ്രിൻസിപ്പൽ ജോട്ടില ജോയ്സ്, വൈസ് പ്രിൻസിപ്പൽ എൻ. വിനിതകുമാരി തുടങ്ങിയവർ സംബന്ധിച്ചു.