ആലപ്പുഴ: കൊറോണ പ്രതിരോധ ബോധവൽക്കരണ പ്രവർത്തനത്തിനും സര്‍ക്കാരിന്റെ ബ്രേക്ക് ദി ചെയിൻ കാംപെയിനിന്റെ ഭാഗമായുള്ള ശുചിത്വ ബോധവൽക്കരണത്തിനും മുന്‍കൈയെടുത്ത് ജില്ലാ പഞ്ചായത്തംഗങ്ങള്‍ ആലപ്പുഴ കെഎസ്ആർടിസി ബസ് സ്റ്റാൻഡിൽ. രാവിലെ 10 മണിക്ക് കെഎസ്ആർടിസി സ്റ്റാൻഡിൽ എത്തിയ ജില്ല പഞ്ചായത്ത് അംഗങ്ങൾ സാനിറ്റൈസറിന്‍റെ പ്രാധാന്യം സംബന്ധിച്ച് ബോധവത്കരണം നടത്തി. ബസ്സുകളിലെ യാത്രക്കാർ ,സ്പര്‍ശിക്കുന്ന വാതില്‍, കൈപ്പിടി എന്നിവിടങ്ങള്‍ ബ്ലീച്ചിംഗ് പൗഡർ ലായനി ഉപയോഗിച്ച് വൃത്തിയാക്കി. ജില്ല പഞ്ചായത്ത് പ്രസിഡ‍ന്റ് ജി.വേണുഗോപാലിന്‍റെ നേതൃത്വത്തിലാണ് ശുചീതകണ-ബോധവത്കരണ പരിപാടി നടത്തിയത്.
നമ്മുടെ ആരോഗ്യം നമ്മുടെ ഉത്തരവാദിത്വം എന്ന സന്ദേശവുമായി പൊതുജനങ്ങൾ സഹകരിക്കണമെന്ന് പരിപാടിക്ക് തുടക്കം കുറിച്ചുകൊണ്ട് ജില്ലാ പഞ്ചായത്ത് പ്രസിഡൻറ് ജി. വേണുഗോപാൽ പറഞ്ഞു. പഞ്ചായത്ത് തലത്തിൽ ഓരോ വാർഡിലും മൂന്നു പേരടങ്ങുന്ന സംഘം രൂപവത്ക്കരിച്ച് ജനങ്ങളുടെ ശുചിത്വബോധം വര്‍ധിപ്പിക്കുന്നതിനുള്ള പ്രചാരണ പരിപാടികൾ നടത്തി വരികയാണെന്ന് അദ്ദേഹം പറഞ്ഞു. പനിയുടെ പകർച്ച കണ്ണികളെ ഇല്ലാതാക്കുക എന്നതാണ് ബ്രേക്ക് ദി ചെയിന്‍ ക്യാമ്പയിൻ കൊണ്ട് ഉദ്ദേശിക്കുന്നത്.
നിശ്ചിത ഇടവേളകളില്‍ കൈ കഴുകുക, തുമ്മുമ്പോഴും ചുമയ്ക്കുമ്പോഴും മൂക്കും വായും തൂവാല കൊണ്ട് പൊത്തുക, പനിയുണ്ടെങ്കില്‍ മറ്റുള്ളവരില്‍ നിന്ന് ഒരു മീറ്റര്‍ എങ്കിലും അകലം പാലിക്കുക തുടങ്ങിയ സന്ദേശങ്ങള്‍ അടങ്ങിയ ലഘുലേഖകളും യാത്രക്കാര്‍ക്ക് വിതരണം ചെയ്തുു. വൈസ് പ്രസിഡൻറ് മണി വിശ്വനാഥ് , ജില്ലാ പഞ്ചായത്ത് ആരോഗ്യ സ്ഥിരം സമിതി അധ്യക്ഷന്‍ അഡ്വ.കെ.ടി.മാത്യു,പൊതുമരാമത്ത് സ്ഥിരം സമിതി അധ്യക്ഷ കെ.സുമ, ക്ഷേമകാര്യ സ്ഥിരം സമിതി അധ്യക്ഷ സിന്ധുവിനു, പ്രതിപക്ഷനേതാവ് ജോൺ തോമസ്, ഡി.എം.ഓ ഡോ.അനുവര്‍ഗ്ഗീസ്, സെക്രട്ടറി കെ. ആർ. ദേവദാസ്, മറ്റ് ജില്ല പഞ്ചായത്ത് അംഗങ്ങൾ, ആരോഗ്യവകുപ്പ് ഉദ്യോഗസ്ഥര്‍ എന്നിവർ ശുചീകരണ ബോധവൽക്കരണ പ്രവർത്തനങ്ങളിൽ പങ്കാളികളായി.