കൊല്ലം: തിരഞ്ഞെടുപ്പിന്റെ ചൂടില്‍ പ്രചരണം കൊഴുക്കവെ വോട്ട് അഭ്യര്‍ത്ഥനക്കിടയില്‍ കാലാവസ്ഥാമുന്നറിയിപ്പ് നല്‍കി അനൗണ്‍സ്‌മെന്റ് വാഹനങ്ങള്‍ സഞ്ചരിച്ചത് കൗതുകമായി. മയ്യനാട് ഗ്രാമപഞ്ചായത്തില്‍ തിരഞ്ഞെടുപ്പ് പ്രചാരണത്തിന് ഇറങ്ങിയ വാഹനങ്ങളില്‍ നിന്നാണ് ഇത്തരം അനൗണ്‍സ്‌മെന്റ് കേട്ടത്.
ബംഗാള്‍ ഉള്‍ക്കടലില്‍ രൂപംകൊണ്ട ന്യൂനമര്‍ദ്ദത്തെ തുടര്‍ന്ന് കാലാവസ്ഥയില്‍ ഉണ്ടാകാവുന്ന മാറ്റങ്ങളും ജനങ്ങള്‍ സ്വീകരിക്കേണ്ട മുന്നറിയിപ്പുമാണ് വോട്ടഭ്യര്‍ത്ഥനയ്ക്ക് ഇടയില്‍ മുഴങ്ങിയത്. ഗ്രാമപഞ്ചായത്ത് സെക്രട്ടറിയുടെയും ഉദ്യോഗസ്ഥരുടെയും അഭ്യര്‍ത്ഥനയെ തുടര്‍ന്നാണ് പ്രചരണത്തിന് ഇറങ്ങിയവര്‍ മുന്നറിയിപ്പ് അനൗണ്‍സ്‌മെന്റ് നടത്തിയത്. ജില്ലയിലെ വിവിധ പ്രദേശങ്ങളിലും തദ്ദേശ സ്ഥാപനങ്ങളുടെയും ജില്ലാ ദുരന്തനിവാരണ അതോറിറ്റിയുടെയും ആഭിമുഖ്യത്തില്‍ കാലാവസ്ഥ മുന്നറിയിപ്പ് സംബന്ധിച്ച് അനൗണ്‍സ്‌മെന്റ് നടത്തി.