എറണാകുളം: ജില്ലാ പഞ്ചായത്ത്, കടമക്കുടി ഗ്രാമപഞ്ചായത്ത് എന്നിവരുടെ സഹകരണത്തോടെ നടത്തുന്ന കടമക്കുടി വില്ലേജ് ഫെസ്റ്റിന് തുടക്കം. എറണാകുളം എം.പി ഹൈബി ഈഡൻ ഫെസ്റ്റ് ഉദ്ഘാടനം ചെയ്തു. ഫെസ്റ്റിലൂടെ കടമക്കുടിയിലെ ടൂറിസം സാധ്യതകൾ ലോക സഞ്ചരികൾക്ക് മുന്നിലെത്തണമെന്നും അതുവഴി ഈ പ്രദേശം ജില്ലയിലെ പ്രധാന വിനോദ സഞ്ചാര കേന്ദ്രമാകുമെന്നും എം.പി പറഞ്ഞു. എറണാകുളം രാജഗിരി കോളേജിലെ വിദ്യാർത്ഥികളും എം.പിയും പൊക്കാളി കൊയ്ത്തിൽ പങ്കാളികളായി. ജൈവകർഷകർ, അക്വാഫാം ഉടമകൾ, വില്ലേജ് ടൂർ ഓപ്പറേറ്റർമാർ എന്നിവരാണ് കടമക്കുടി വില്ലേജ് ഫെസ്റ്റ് സംഘടിപ്പിക്കുന്നത്.
ഇടപ്പള്ളി ബ്ലോക്ക് പഞ്ചായത്ത് പ്രസിഡന്റ് ട്രീസ മാനുവൽ ഫെസ്റ്റിന്റെ ലോഗോ പ്രകാശനം ചെയ്തു. ജില്ലയിലെ വിവിധ കോളേജുകളിലെ വിദ്യാർഥികൾ കർഷക തൊഴിലാളികളോടൊപ്പം വരും ദിവസങ്ങളിലെ കൊയ്ത്തുത്സവങ്ങളിലും പങ്കെടുക്കും. നാല് ദിവസങ്ങളിലായി നടക്കുന്ന ഫെസ്റ്റിൽ വിവിധ പരിപാടികളാണ് സംഘടിപ്പിക്കുന്നത്. കടമക്കുടിയിലെ വനിതകൾ വൈകുന്നേരങ്ങളിൽ സംഘടിപ്പിക്കുന്ന ഫുഡ് ഫെസ്റ്റിലൂടെ ഗ്രാമത്തിന്റെ തനത് രുചികൾ സന്ദർശകർക്കായി ലഭിക്കും. ഇതുവഴി ഭാവിയിലും ഗ്രാമത്തിലെ വനിതകൾക്ക് ടൂറിസത്തിലൂടെ സ്ഥിരവരുമാനം നൽകുക എന്നതാണ് ഉദ്ദേശം.
ഫെസ്റ്റ് ദിനങ്ങളിൽ രാവിലെ മുതൽ ഉച്ചവരെ പൊക്കാളി കൊയ്ത്ത് നടക്കും. കൊയ്ത്ത് പാട്ട്, നാടൻ പാട്ട് എന്നിവ ഉൾപ്പെടുത്തിക്കൊണ്ടുള്ള കലാസന്ധ്യകളിൽ പ്രമുഖ കലാകാരൻമാർ പങ്കെടുക്കും. കടമക്കുടി ദ്വീപിന്റെ ഭംഗി ആസ്വദിക്കുന്നതിനായി ബോട്ടിങും ഒരുക്കിയിട്ടുണ്ട്. വിവിധയിനം മത്സരങ്ങളും ഫെസ്റ്റിന്റെ ഭാഗമായി നടക്കും.
കടമക്കുടി പഞ്ചായത്ത് പ്രസിഡന്റ് മേരി വിൻസൻ്റ്, വൈസ് പ്രസിഡൻ്റ് വിപിൻ രാജ്, വികസന കാര്യ സ്റ്റാന്റിങ് കമ്മിറ്റി ചെയർപേഴ്സൺ സജിനി ജ്യോതിഷ്, അഗ്രികൾച്ചർ ഓഫീസർ ശില്പ കെ. തോമസ്, ഫെസ്റ്റ് ജനറൽ കൺവീനർ ബെന്നി സേവ്യർ, ജോയിന്റ് കൺവീനർ വിശാൽ കോശി, പി.കെ രാജീവ് എന്നിവർ പങ്കെടുത്തു.