ആകര്‍ഷകമായ വിലക്കിഴിവോടെ ഖാദി ബോര്‍ഡിന്റെ ക്രിസ്തുമസ്, പുതുവത്സര മേളക്ക് ജില്ലയില്‍ തുടക്കമായി. കോട്ടപ്പടിയിലെ ഖാദിഗ്രാമ സൗഭാഗ്യ-ഖാദി വില്പന കേന്ദ്രത്തില്‍ നടന്ന മേളയുടെ ജില്ലാതല ഉദ്ഘാടനം വാര്‍ഡ് കൗണ്‍സിലര്‍ സി.സുരേഷ് നിര്‍വഹിച്ചു. ജില്ലാ ഖാദിഗ്രാമ വ്യവസായ ഓഫീസ് പ്രൊജക്ട് ഓഫീസര്‍ എസ്.കൃഷ്ണ അധ്യക്ഷയായി. ഖാദിഗ്രാമ വ്യവസായ ഓഫീസ് പ്രോജക്ട് ഓഫീസര്‍ എസ്.കൃഷ്ണ വ്യാപാരി വ്യവസായി ഏകോപനസമിതി മലപ്പുറം മുന്‍സിപ്പല്‍ പ്രസിഡന്റ് പരി ഉസ്മാന് ഖാദി ഉല്പന്നം നല്‍കി മേളയുടെ ആദ്യ വില്പന നടത്തി.
ഡിസംബര്‍ 31 വരെ നടക്കുന്ന മേളയില്‍ ഖാദി വസ്ത്രങ്ങള്‍ക്ക് 20 മുതല്‍ 30 ശതമാനം വരെ ഗവ.റിബേറ്റ് ലഭിക്കും. ഖാദി സില്‍ക്ക് സാരികള്‍, കോട്ടണ്‍ സാരികള്‍, കുപ്പടം മുണ്ടുകള്‍, ഡബിള്‍ ദോത്തികള്‍, ഉന്ന കിടക്കകള്‍, തലയിണകള്‍, ബെഡ്ഷീറ്റുകള്‍, നറുതേന്‍, സോപ്പുകള്‍, മറ്റു ഗ്രാമ വ്യവസായ ഉല്‍പ്പന്നങ്ങള്‍ എന്നിവയുടെ വിപുലമായ ശേഖരം കോട്ടപ്പടിയിലെ ഖാദി ഗ്രാമ സൗഭാഗ്യയില്‍ ഒരുക്കിയിട്ടുണ്ട്.
ഖാദിഗ്രാമ സൗഭാഗ്യ മലപ്പുറം കൂടാതെ ഖാദി സൗഭാഗ്യ ചങ്ങരംകുളം, ഖാദി സൗഭാഗ്യ എടപ്പാള്‍, ഖാദി സൗഭാഗ്യ താനൂര്‍, ഖാദി സൗഭാഗ്യ വടക്കുംമുറി എന്നിവിടങ്ങളിലും ഗ്രാമ സൗഭാഗ്യകളിലും സ്പെഷ്യല്‍ മേളകള്‍ സംഘടിപ്പിച്ചിട്ടുണ്ട്. പരിപാടിയില്‍ വില്ലേജ് ഇന്‍ഡസ്ട്രീസ് ഓഫീസര്‍ സത്യനിര്‍മ്മല, ജൂനിയര്‍ സൂപ്രണ്ട് മഞ്ജുഷ, ഖാദി ഓഫീസ് ജീവനക്കാര്‍, ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.