മന്ത്രിയുടെ നേതൃത്വത്തിൽ ആലോചനായോഗം

അംബേദ്കർ ഗ്രാമ വികസന പദ്ധതിയുടെ ഭാഗമാകാൻ
ചേലക്കര ഗ്രാമപഞ്ചായത്തിലെ നാലാം വാർഡിലെ നാട്ട്യൻചിറ കോളനിയും. 2021-22 വർഷത്തെ അംബേദ്കർ ഗ്രാമ വികസന പദ്ധതിയുടെ ഭാഗമായി ഒരു കോടി രൂപയുടെ വിവിധ പ്രവർത്തനങ്ങളാണ് കോളനിയിൽ ഒരുങ്ങുന്നത്. ഇത് സംബന്ധിച്ച് ചേർന്ന ആലോചന യോഗം പട്ടികജാതി-പട്ടികവർഗ-പിന്നോക്ക ക്ഷേമ മന്ത്രി കെ രാധാകൃഷ്ണൻ ഉദ്ഘാടനം ചെയ്തു.

കോളനിയുടെ സമഗ്ര വികസനം ലക്ഷ്യമിട്ട് നടപ്പിലാക്കുന്ന പദ്ധതികൾ സമയബന്ധിതമായി പൂർത്തിയാക്കണമെന്ന് മന്ത്രി യോഗത്തിൽ പറഞ്ഞു. ജനങ്ങളുടെ പങ്കാളിത്തം ഉറപ്പുവരുത്തിയും താൽപര്യങ്ങൾ അനുസരിച്ചും വേണം പദ്ധതികൾ നടപ്പിലാക്കാനെന്നും മന്ത്രി ഓർമ്മിപ്പിച്ചു.

കോളനിയിൽ നടപ്പിലാക്കേണ്ട വിവിധ പദ്ധതികളുടെ വിശദീകരണം, മോണിറ്ററിംഗ് കമ്മിറ്റി അംഗങ്ങളുടെ തിരഞ്ഞെടുപ്പ്, കോളനി നിവാസികളുടെ ആവശ്യങ്ങൾ എന്നിവ യോഗത്തിൽ  ചർച്ച ചെയ്തു. നവീകരണത്തിന്റെ ഭാഗമായി കോളനിയിലേയ്ക്കുള്ള റോഡ്, ഇതിനോട് ചേർന്നുള്ള സംരക്ഷണ ഭിത്തി, കുടിവെള്ള പദ്ധതി, ഭവന പുനരുദ്ധാരണം, അങ്കണവാടി പുനരുദ്ധാരണം തുടങ്ങിയ പ്രവർത്തനങ്ങളാണ് പ്രധാനമായും പദ്ധതിയിൽ ഉൾപ്പെടുത്തി ചെയ്യുന്നത്. സാംസ്കാരിക നിലയം വേണമെന്ന കോളനിവാസികളുടെ ആവശ്യം സ്ഥല ലഭ്യത കൂടി ഉറപ്പുവരുത്തി പരിഗണിക്കാൻ യോഗത്തിൽ തീരുമാനിച്ചു. പദ്ധതി യാഥാർത്ഥ്യമാകുന്നതോടെ 48 കുടുംബങ്ങൾക്ക് പ്രയോജനം ലഭിക്കും.

സ്ഥലം എം എൽ എ ചെയർമാനായും പട്ടികജാതി വികസന ഓഫീസർ കൺവീനറായും വാർഡ് മെമ്പർ/ കൗൺസിലർ/സങ്കേത പ്രതിനിധികൾ, പട്ടികജാതി പ്രൊമോട്ടർ, ഏജൻസി പ്രതിനിധികൾ എന്നിവർ അംഗങ്ങളായുള്ള മോണിറ്ററിംഗ് കമ്മിറ്റിയെ യോഗത്തിൽ തിരഞ്ഞെടുത്തു.

യോഗത്തിൽ ബ്ലോക്ക് പഞ്ചായത്ത് പ്രസിഡന്റ് കെ എം അഷ്റഫ് അധ്യക്ഷനായി. ബ്ലോക്ക് പഞ്ചായത്ത് വൈസ് പ്രസിഡന്റ് പി പ്രശാന്തി, ഗ്രാമപഞ്ചായത്ത് വൈസ് പ്രസിഡന്റ് എച്ച് ഷലീൽ, സ്റ്റാൻഡിംഗ് കമ്മിറ്റി ചെയർമാൻ എല്ലിശേരി വിശ്വനാഥൻ, വാർഡ് അംഗം എ കെ അഷറഫ്, നിർമ്മിതി കേന്ദ്രം എക്സിക്യുട്ടിവ്  എൻജിനീയർ സതീദേവി, ജില്ലാ പട്ടികജാതി വികസന ഓഫിസർ ലിസ ജെ മങ്ങാട്ട്, എസ്.സി.ഡി.ഒ.  പ്രബിത വി തുടങ്ങിയവർ പങ്കെടുത്തു.