പ്രളയക്കെടുതിയില്‍ അകപ്പെട്ട പട്ടികജാതിവിഭാഗക്കാര്‍ക്ക് കൈത്താങ്ങുമായി പട്ടികജാതിവികസന വകുപ്പ്. പ്രളയം നശിപ്പിച്ച വീടുകളും വിദ്യാലയങ്ങളും വീണ്ടെടുക്കുന്നതിനായി പട്ടികജാതി വികസന വകുപ്പ് ശുചീകരണ പ്രവര്‍ത്തനങ്ങള്‍ ആരംഭിച്ചു. ഇതിന്റെ ഭാഗമായി എറണാകുളം ജില്ലയില്‍ 15 പട്ടികജാതികോളനികളും 10 പട്ടികജാതിസ്ഥാപനങ്ങളും ശുചീകരിച്ചു.
ആലപ്പുഴ ജില്ലയില്‍ രണ്ട് കോളനികളും രണ്ട് സ്ഥാപനങ്ങളും ഇത്തരത്തില്‍ വൃത്തിയാക്കി. പത്തനംതിട്ട ജില്ലയില്‍ 400 വീടുകളുള്ള ഒരു പട്ടിക ജാതി കോളനിയും പന്തളം ഐ.ടി.ഐയുമാണ് ശുചീകരിച്ചത്. പത്തനംതിട്ടയിലും ആലപ്പുഴയിലും നടന്ന ശുചീകരണ പ്രവര്‍ത്തനങ്ങള്‍ പട്ടികജാതിവികസന വകുപ്പ് ഡയറക്ടര്‍ അലി അസ്ഗര്‍ പാഷയുടെ നേതൃത്വത്തിലാണ് നടന്നത്.
പ്രളയത്തില്‍ രേഖകള്‍ നഷ്ടപ്പെട്ടവര്‍ക്ക് ധനസഹായത്തിനായി ജാതിതെളിയിക്കുന്നതിന് ജനപ്രതിനിധികള്‍ സാക്ഷ്യപ്പെടുത്തിയ സര്‍ട്ടിഫിക്കറ്റ് ഹാജരാക്കിയാല്‍ മതിയെന്ന് വകുപ്പ് ഡയറക്ടര്‍ അലിഅസ്ഗര്‍ പാഷ അറിയിച്ചു. പട്ടികജാതി വികസന വകുപ്പ് ബ്ലോക്ക് ഓഫീസര്‍മാരെ ഈ സര്‍ട്ടിഫിക്കറ്റുമായി സമീപിച്ചാല്‍ പട്ടികജാതി വികസന വകുപ്പ് പ്രഖ്യാപിച്ച പ്രളയാശ്വാസ അധിക ധനസഹായമായ 5000 രൂപ അക്കൗണ്ടുകളില്‍ നിക്ഷേപിക്കും. ഇതിനോടകം തിരുവനന്തപുരം ജില്ലയില്‍ പ്രളയ ദുരിതാശ്വാസ അധിക ധനസഹായമായി 158 പേര്‍ക്ക് 5000 രൂപ ക്രമത്തില്‍ 7, 90,000 രൂപ നല്‍കുന്നതിന് ഉത്തരവായി.