വയനാട് ജില്ലയില്‍ കനത്ത മഴക്ക് സാധ്യതയുണ്ടെന്ന കാലാവസ്ഥാ മുന്നറിയിപ്പ് വന്ന സാഹചര്യത്തില്‍ മുന്‍കരുതല്‍ നടപടിയെന്ന നിലയ്ക്ക് ബാണാസുര സാഗര്‍ അണക്കെട്ടിന്റെ രണ്ടാമത്തെ ഷട്ടര്‍ വെള്ളിയാഴ്ച വൈകിട്ട് നാലരയോടെ 10 സെന്റിമീറ്റര്‍ ഉയര്‍ത്തി. ഇതോടെ കടമാന്‍തോടിലൂടെ സെക്കന്റില്‍ 8.5 ക്യൂബിക് മീറ്റര്‍ ജലം ഒഴുക്കി വിടാന്‍ തുടങ്ങി. ഘട്ടഘട്ടമായി സെക്കന്റില്‍ 55 ക്യൂബിക്‌സ് മീറ്റര്‍ വെള്ളം ഒഴുക്കി വിടാനുള്ള അനുമതിയാണ് ജില്ലാ ദുരന്ത നിവാരണ സമിതി നല്‍കിയിരിക്കുന്നത്. കടമാന്‍തോട്, പനമരം പുഴ എന്നിവയുടെ തീരപ്രദേശങ്ങളില്‍ താമസിക്കുന്നവര്‍ ജാഗ്രതപാലിക്കണമെന്ന് ജില്ലാ കളക്ടര്‍ അറിയിച്ചു. അടിയന്തര സാഹചര്യം നേരിടാന്‍ ദേശിയ ദുരന്തനിവാരണ സേനയുടെ ഒരു സംഘവും ജില്ലയിലെത്തി ചേര്‍ന്നിട്ടുണ്ട്. ജില്ലാ ഭരണകൂടം നല്‍കുന്ന മുന്നറിയിപ്പുകള്‍ പൊതുജനങ്ങള്‍ പാലിക്കണം. കളക്ടറേറ്റിലും താലൂക്ക് ഓഫീസുകളിലും 24 മണിക്കൂറും കണ്‍ട്രോള്‍ റൂമുകള്‍ പ്രവര്‍ത്തന സജ്ജമാണ്. കളക്ടറേറ്റ് – 04936 204151, മാനന്തവാടി – 04935 240231, വൈത്തിരി – 04936 255229, സുല്‍ത്താന്‍ ബത്തേരി – 04936 220296.