പത്താമത് ആയുർവേദ ദിനാചരണത്തിന്റെ സംസ്ഥാനതല ഉദ്ഘാടനവും 14.39 കോടി രൂപയുടെ 12 പദ്ധതികളുടെ ഉദ്ഘാടനവും സെപ്റ്റംബർ 23ന് വൈകുന്നേരം 4 മണിക്ക് തിരുവനന്തപുരം മസ്‌കറ്റ് ഹോട്ടലിൽ വച്ച് ആരോഗ്യ വകുപ്പ് മന്ത്രി വീണാ ജോർജ് നിർവഹിക്കും. വി.കെ. പ്രശാന്ത് എംഎൽഎ ചടങ്ങിൽ അധ്യക്ഷത വഹിക്കും.

◈ സൂതികാമിത്രം പദ്ധതി

വനിതകൾക്ക് ആയുർവേദത്തിൽ അധിഷ്ഠിതമായ ഗർഭകാല-പ്രസവാനന്തര ശുശ്രൂഷയിൽ ശാസ്ത്രീയ പരിശീലനം നൽകുന്നതിനും അമ്മയെയും കുഞ്ഞിനെയും പരിചരിക്കുന്നതിന് അവരുടെ സേവനം സംസ്ഥാനത്ത് എല്ലായിടങ്ങളിലും ആവശ്യാനുസരണം ലഭ്യമാക്കുന്നതിനും ആവിഷ്‌കരിച്ച പദ്ധതിയാണ് സൂതികാമിത്രം പദ്ധതി.

◈ ആയുഷ് യോഗ ക്ലബ് ആപ്പ്

ജീവിതശൈലീ രോഗങ്ങൾ തടയുന്നതിൽ യോഗയുടെ പ്രാധാന്യം പ്രചരിപ്പിക്കുന്നതിനായി 10,000 ലധികം യോഗ ക്ലബ്ബുകൾ സംസ്ഥാനത്ത് ആരംഭിച്ച് പ്രവർത്തിച്ചു വരുന്നുണ്ട്. പൊതുജനങ്ങൾക്ക് അതതു പ്രദേശത്തെ യോഗ ക്ലബ്ബുകൾ മനസിലാക്കുന്നതിനായാണ് മൊബൈൽ ആപ്ലിക്കേഷൻ വികസിപ്പിച്ചത്.

◈ ആയുർകർമ്മ

സർക്കാർ ആയുർവേദ ഡിസ്പെൻസറികളിൽ പഞ്ചകർമ്മ ചികിത്സകൾ ഉൾപ്പെടുത്തി സാമ്പത്തികമായി പിന്നോക്കം നിൽക്കുന്നവർക്ക് സമഗ്രമായ ആയുർവേദ ചികിത്സ ലഭ്യമാക്കുക എന്ന ഉദ്ദേശത്തോടെ നടപ്പാക്കുന്ന പദ്ധതിയാണ് ആയുർകർമ്മ. 25 പുതിയ യൂണിറ്റുകളാണ് പ്രവർത്തനം ആരംഭിക്കുന്നത്.

◈ 240 സ്ഥാപനങ്ങളിൽ ഇ ഹോസ്പിറ്റൽ

ഭാരതീയ ചികിത്സാ വകുപ്പിന് കീഴിലുളള 240 സ്ഥാപനങ്ങളിൽ Next Gen E Hospital സംവിധാനം നടപ്പിലാക്കി. ആശുപപത്രികളിൽ നേരിട്ട് വരാതെ ഓൺലൈൻ വഴി വളരെ എളുപ്പത്തിൽ രോഗികൾക്ക് ഒപി രജിസ്ട്രേഷനും ഡോക്ടറുടെ അപ്പോയിന്റ്മെന്റും എടുക്കാനാകും.

◈ സുപ്രജ

ഗർഭകാലത്തും പ്രസവാനന്തര ഘട്ടത്തിലും സ്ത്രീകളുടെ ആരോഗ്യത്തെ മെച്ചപ്പെടുത്തുകയും കുഞ്ഞിന്റെ ആരോഗ്യകരമായ വളർച്ച ലക്ഷ്യമിട്ടുകൊണ്ടും നടപ്പിലാക്കുന്ന സമഗ്ര മാതൃ-ശിശു സംരക്ഷണ പദ്ധതിയാണ് സുപ്രജ.

◈ ആയുഷ് ഇൻഫെർട്ടിലിറ്റി ക്ലിനിക്

വന്ധ്യത പരിഹരിക്കുന്നതിനായി ആരംഭിച്ച സമഗ്രമായ പദ്ധതിയായ ആയുഷ് ഇൻഫെർട്ടിലിറ്റി ക്ലിനിക് കാസറഗോഡ്, പാലക്കാട്, തിരുവന്തപുരം എന്നിവിടങ്ങളിൽ കൂടി ആരംഭിക്കുന്നു.

◈ NPPMOMD

ഓസ്റ്റിയോആർത്രൈറ്റിസ് ഉൾപ്പെടെയുള്ള വിവിധ മസ്‌കുലോസ്‌കെലറ്റൽ രോഗങ്ങളുടെ പ്രതിരോധവും നിയന്ത്രണവും ചികിത്സയും ലക്ഷ്യമാക്കി നടപ്പിലാക്കുന്ന പൊതുജന ആരോഗ്യ പദ്ധതിയാണിത്.

◈  എൻസിഡി സ്പെഷ്യാലിറ്റി ക്ലിനിക്

ജീവിതശൈലി രോഗങ്ങൾ തടയുന്നതിനും നിയന്ത്രിക്കുന്നതിനുമായി ആയുർവേദത്തിന്റെ സാധ്യതകളെ പരമാവധി ഉപയോഗിച്ച് സമഗ്രമായ ഇടപെടൽ ഉറപ്പാക്കുന്നതിനാണ് ഈ പദ്ധതി രൂപകല്പന ചെയ്തിരിക്കുന്നത്.

◈ ഹർഷം

വിഷാദ രോഗം തടയുന്നതിനും, ചികിത്സിക്കുന്നതിനും, മാനസികാരോഗ്യം നിലനിർത്തുന്നതിനുമായി നടപ്പിലാക്കുന്ന പദ്ധതി യാണ് ഹർഷം. കൊല്ലം, ആലപ്പുഴ, തൃശൂർ, പാലക്കാട്, മലപ്പുറം, കണ്ണൂർ എന്നീ ജില്ലകളിൽ ഹർഷം ക്ലിനിക്കുകൾ ആരംഭിച്ചു.

◈ ദൃഷ്ടി ക്ലിനിക്

ആയുർവേദത്തിന്റെ സാധ്യത ഉപയോഗിച്ച് നേത്ര ചികിത്സ കൂടുതൽ പേരിലേക്ക് എത്തിക്കുന്നതിനാണ് ‘ദൃഷ്ടി’ പദ്ധതി നടപ്പിലാക്കുന്നത്.

◈ ആരോഗ്യ നൗക

ആലപ്പുഴ ജില്ലയിലെ ഒറ്റപ്പെട്ട ദീപ് നിവാസികൾക്ക് വാതിൽപ്പടിയിൽ ആരോഗ്യ സേവനം നൽകുന്നതിനായി മോട്ടോർ ബോട്ടിൽ സജ്ജീകരിച്ച ആയുർവേദ ക്ലിനിക്കാണ് ആരോഗ്യ നൗക.

◈ സ്പോർട്സ് ആയുർവേദ

കായിക താരങ്ങളുടെ പരിക്കുകൾ പരിഹരിക്കുന്നതിന് ആയുർവേദത്തിന്റെ സാധ്യതകൾ പ്രയോജനപ്പെടുത്തുന്ന ആയുർവേദ സ്പോർട്സ് മെഡിസിൻ പദ്ധതിയാണ് സ്പോർട്സ് ആയുർവേദ പദ്ധതി. നിവില 13 യൂണിറ്റുകൾ കൂടാതെ 10 യൂണിറ്റുകൾ കൂടി ആരംഭിക്കുന്നു.