അന്താരാഷ്ട്ര വയോജന ദിനാഘോഷത്തിന്റെ ഭാഗമായി ആലപ്പുഴ ജില്ലാ സാമൂഹ്യനീതി ഓഫീസിൻ്റെ നേതൃത്വത്തിൽ ജില്ലാതല വയോജന ദിനാചരണം സംഘടിപ്പിച്ചു. പട്ടണക്കാട് ബ്ലോക്ക് പഞ്ചായത്ത് കമ്മ്യൂണിറ്റി ഹാളിൽ നടന്ന പരിപാടി ജില്ലാ പഞ്ചായത്ത് വൈസ് പ്രസിഡന്റ് എൻ എസ് ശിവപ്രസാദ് ഉദ്ഘാടനം ചെയ്തു.
മെയിൻ്റനൻസ് ട്രൈബ്യൂണൽ, വയോമിത്രം യൂണിറ്റ്, സായം പ്രഭ ഹോമുകൾ, ഓൾഡ് ഏജ് ഹോമുകൾ, ജില്ലാതല വയോജന കമ്മിറ്റി എന്നിവരുടെ സഹകരണത്തോടെയാണ് പരിപാടി സംഘടിപ്പിച്ചത്.
‘വയോജനങ്ങള് പ്രാദേശികവും ആഗോളവുമായ പ്രവര്ത്തനങ്ങള്ക്ക് നേതൃത്വം നല്കുന്നു: ഞങ്ങളുടെ അഭിലാഷങ്ങള്, ഞങ്ങളുടെ ക്ഷേമം, ഞങ്ങളുടെ അവകാശങ്ങള്’ എന്നതാണ് ഈ വര്ഷത്തെ പ്രമേയം.
ചടങ്ങിൽ പട്ടണക്കാട് ബ്ലോക്ക് പഞ്ചായത്ത് പ്രസിഡന്റ് മേരി ടെൽഷ്യ അധ്യക്ഷയായി.
ദിനാചരണത്തിന്റെ ഭാഗമായി കേരള സംസ്ഥാന വയോസേവന അവാർഡ് ജേതാവ് പി കെ മേദിനി, മാസ്റ്റേഴ്സ് കായിക രംഗത്ത് മികവാർന്ന പ്രകടനം കാഴ്ചവെച്ച തങ്കച്ചൻ എന്നിവരെ ആദരിച്ചു. ഡിഎൽഎസ്എ സെക്രട്ടറിയും സീനിയർ സിവിൽ ജഡ്ജുമായ പ്രമോദ് മുരളി, പട്ടണക്കാട് ബ്ലോക്ക് പഞ്ചായത്ത് വൈസ് പ്രസിഡന്റ് ആർ ജീവൻ, പട്ടണക്കാട് ഗ്രാമപഞ്ചായത്ത് വൈസ് പ്രസിഡന്റ് എം കെ ജയപാൽ, ജില്ലാ സാമൂഹ്യനീതി ഓഫീസർ വി അശ്വതി, ബ്ലോക്ക് പഞ്ചായത്ത് ബിഡിഒ മൃദുല തുടങ്ങിയവർ പങ്കെടുത്തു. വയോജന ക്ഷേമ പദ്ധതികളെക്കുറിച്ചുള്ള വിവിധ ക്ലാസ്സുകളും കലാപരിപാടികളും നടന്നു.