പോളിടെക്നിക് ഡിപ്ലോമ സ്പോട്ട് അഡ്മിഷന്‍ സംസ്ഥാനതലത്തില്‍ ഓണ്‍ലൈനായി നടത്തും. അപേക്ഷകര്‍ക്ക് നവംബര്‍ 21 മുതല്‍ 24 വരെ www.polyadmission.org എന്ന വെബ്സൈറ്റിലെ ”Spot Admission Registration’ എന്ന ലിങ്ക് വഴി രജിസ്റ്റര്‍ ചെയ്യാം. ആപ്ലിക്കേഷന്‍ നമ്പരും ജനനതീയതിയും നല്കുമ്പോള്‍ ലഭിക്കുന്ന ഒടിപി ഉപയോഗിച്ച് റജിസ്ട്രേഷന്‍ പൂര്‍ത്തിയാക്കാം. പഴയ ഓപ്ഷനുകള്‍ റദ്ദാകുന്നതിനാല്‍ ഓണ്‍ലൈന്‍ സ്പോട്ട് അഡ്മിഷനിലേക്ക് പഴയ ഓപ്ഷനുകള്‍ പരിഗണിക്കില്ല.

പുതുതായി ചേരാന്‍ താല്പര്യമുള്ള പത്ത് ഓപ്ഷനുകള്‍ വരെ ഓണ്‍ലൈനായി സമര്‍പ്പിക്കാം. നിലവില്‍ ലഭ്യമായ ഒഴിവുകള്‍ പോളീടെക്നിക് കോളേജ് അടിസ്ഥാനത്തില്‍ www.polyadmission.org എന്ന വെബ്സൈറ്റിലെ ‘Vacancy position’ എന്ന ലിങ്ക് വഴി മനസ്സിലാക്കാം. ഒഴിവുകള്‍ പരിശോധിച്ചതിനുശേഷമേ പുതിയതായി ഓപ്ഷന്‍ നല്‍കാവൂ. ഓണ്‍ലൈന്‍ സ്പോട്ട് അഡ്മിഷനു വേണ്ടി പ്രത്യേകം രജിസ്റ്റര്‍ ചെയ്യാത്തവരെ സ്പോട്ട് അഡ്മിഷനില്‍ പങ്കെടുപ്പിക്കില്ല. ഇപ്പോള്‍ നടത്തുന്ന രജിസ്ട്രേഷന്‍ ഈ സ്പോട്ട് അഡ്മിഷനില്‍ മാത്രം ബാധകമായിരിക്കും.

പുതുതായി നല്‍കിയ ഓപ്ഷനുകള്‍ക്കനുസരിച്ച് നവംബര്‍ 25ന് സ്പോട്ട് അഡ്മിഷന്‍ സെലക്ട് ലിസ്റ്റ് പ്രസിദ്ധീകരിക്കും. അപേക്ഷകര്‍ക്ക് ‘Check Your Allotment’ എന്ന ലിങ്ക് വഴി സ്പോട്ട് അഡ്മിഷന്‍ അലോട്ട്മെന്റ് പരിശോധിച്ച് അഡ്മിഷന്‍ ലഭിച്ച സ്ഥാപനത്തില്‍ നവംബര്‍ 30നുള്ളില്‍ എല്ലാ അസ്സല്‍ രേഖകളും സമര്‍പ്പിച്ച് മുഴുവന്‍ ഫീസടച്ച് അഡ്മിഷന്‍ നേടണം. മറ്റേതെങ്കിലും പോളിടെക്നിക് കോളേജില്‍ അഡ്മിഷന്‍ ലഭിച്ച അപേക്ഷകനാണെങ്കില്‍ അഡ്മിഷന്‍ സ്ലിപ്പോ, ഫീ രസീതോ ഹാജരാക്കിയാല്‍ മതിയാകും. അഡ്മിഷനില്‍ പങ്കെടുക്കുന്നവര്‍ കോവിഡ്-19 മാനദണ്ഡങ്ങള്‍ നിര്‍ബന്ധമായും പാലിച്ചിരിക്കണം. വിശദ വിവരങ്ങള്‍ക്ക് www.polyadmission.org. .