തൃശ്ശൂർ: വേളൂക്കര ഗ്രാമപഞ്ചായത്തിൽ എംഎൽഎയുടെ ആസ്തി വികസന ഫണ്ട് ഉപയോഗിച്ച് കുടുംബാരോഗ്യകേന്ദ്രത്തിൽ ഒ പി കെട്ടിടം നിർമ്മിക്കുന്നു. പ്രൊഫ കെ യു അരുണൻ എംഎൽഎയുടെ വികസന ഫണ്ടിൽ നിന്ന് 40 ലക്ഷം രൂപയാണ് നിർമ്മാണ പ്രവർത്തികൾക്കായി അനുവദിച്ചിരിക്കുന്നത്. കുടുംബാരോഗ്യ കേന്ദ്രത്തിന്റെ പുതിയ കെട്ടിടത്തിന്റെ തറക്കല്ലിടൽ കർമ്മം പ്രൊഫ കെ യു അരുണൻ എംഎൽഎ നിർവ്വഹിച്ചു.1900 ചതുരശ്ര അടിയിൽ ഫ്രെയിംഡ് സ്റ്റർക്ചർ ആയിട്ടാണ് കെട്ടിടം നിർമ്മിക്കുന്നത്. ഇതിൽ ഡോക്ടർ റൂം, സ്റ്റേയർ റൂം, എച്ച്. ഐ സെക്ഷൻ, ഐ യു ഡി, ഐ സി എൽ സ്റ്റോർ, ഇമ്മ്യൂണൈസേഷൻ കൊറിഡോർ, ഫീഡിങ് ആന്റ് സ്റ്റെറിലൈസേഷൻ റൂം, ചേഞ്ചിങ് റൂം, വെയ്റ്റിംഗ് ഏരിയ, ടോയ്ലറ്റ് എന്നീ സൗകര്യങ്ങൾ ഉണ്ടായിരിക്കും. ഇതിന് പുറമെ മുറികളിലെല്ലാം വിട്രിഫൈഡ് ഫ്ലോറിങ് ടൈൽ വിരിച്ച് പെയിന്റിംഗ് ഉൾപ്പെടെ നടത്തിയാണ് പണികൾ പൂർത്തീകരിക്കുക.

വേളൂക്കര കുടുംബാരോഗ്യ കേന്ദ്രത്തിൽ വച്ച് നടന്ന ചടങ്ങിൽ വേളൂക്കര ഗ്രാമപഞ്ചായത്ത്‌ പ്രസിഡന്റ്‌ കെ എസ് ധനീഷ് അദ്ധ്യക്ഷത വഹിച്ചു. വെള്ളാങ്ങല്ലൂർ എൽ എസ് ജി ഡി സബ്ബ് ഡിവിഷൻ അസിസ്റ്റന്റ് എക്സിക്യൂട്ടീവ് എഞ്ചിനീയർ ബാബു റിപ്പോർട്ട് അവതരിപ്പിച്ചു. പഞ്ചായത്ത്‌ വൈസ് പ്രസിഡന്റ്‌ ജെൻസി ബിജു, സ്റ്റാന്റിംഗ് കമ്മിറ്റി ചെയർമാൻമാരായ ബിബിൻ ബാബു തുടിയത്ത്, ഷീജ ഉണ്ണികൃഷ്ണൻ, പി ജെ സതീഷ്, വാർഡംഗം സ്വപ്ന സെബാസ്റ്റ്യൻ, പഞ്ചായത്ത്‌ സെക്രട്ടറി കെ ബി സജീവ്കുമാർ, ഡോ. അബു താഹിർ എന്നിവർ പങ്കെടുത്തു.