പത്തനംതിട്ട: വരുന്ന നിയമസഭാതെരഞ്ഞെടുപ്പുമായി ബന്ധപ്പെട്ട സ്വീപ്(സിസ്റ്റമാറ്റിക് വോട്ടേഴ്‌സ് എഡ്യുക്കേഷന്‍ ആന്റ് ഇലക്ടറല്‍ പാര്‍ട്ടിസിപ്പേഷന്‍) ബോധവല്‍ക്കരണ കാമ്പയിന് പത്തനംതിട്ട ജില്ലയിലെ കോളജുകളില്‍ നടത്തി. പുതുതായി വോട്ടര്‍പട്ടികയില്‍ ഉള്‍പ്പെടാത്ത വിദ്യാര്‍ത്ഥികള്‍ക്ക് എന്റോള്‍ ചെയ്യുന്നതിനുളള അവസരം പ്രയോജനപ്പെടുത്താന്‍ കാമ്പയിനിലൂടെ കഴിയുന്നു.
ആറന്മുള ഗവണ്‍മെന്റ് എന്‍ജിനീയറിംഗ് കോളേജില്‍ അസിസ്റ്റന്റ് കളക്ടര്‍ വി.ചെല്‍സാസിനിയുടെ സാന്നിധ്യത്തില്‍ ഔദ്യോഗികമായി എന്റോള്‍മെന്റ് കാമ്പയിന് ആരംഭിച്ചു. മൗണ്ട് സിയോണ്‍ എന്‍ജിനീയറിംഗ് കോളേജില്‍ കോവിഡ് പ്രോട്ടോക്കോള്‍ പാലിച്ച് നൂറുകണക്കിന് വിദ്യാര്‍ത്ഥികള്‍ പങ്കെടുത്തു. വോട്ടര്‍ പട്ടികയില്‍ പേര് ഉള്‍പ്പെട്ടിട്ടില്ലാത്ത 18 വയസ് പൂര്‍ത്തിയായവര്‍ക്ക് ഇനിയും വോട്ടര്‍ പട്ടികയില്‍ പേരുചേര്‍ക്കാം.
തെരഞ്ഞെടുപ്പ് കമ്മീഷന്റെ ഔദ്യോഗിക വെബ്‌സൈറ്റിലൂടെ നേരിട്ടോ അക്ഷയകേന്ദ്രങ്ങളിലൂടെയോ പേരുചേര്‍ക്കാമെന്നും അസിസ്റ്റന്റ് കളക്ടര്‍ അറിയിച്ചു. സ്വീപ് നോഡല്‍ ഓഫീസര്‍, അസിസ്റ്റന്റ് സ്വീപ് നോഡല്‍ ഓഫീസര്‍, കോളേജ് പ്രിന്‍സിപ്പല്‍മാര്‍, മറ്റ് ഉദ്യോഗസ്ഥര്‍ തുടങ്ങിയവര്‍ കാമ്പയിന് പ്രവര്‍ത്തനങ്ങളില്‍ പങ്കെടുത്തു.