പാലക്കാട്: ദുരന്തമുഖത്ത് മാതൃകാപരമായ രക്ഷാപ്രവര്‍ത്തനം നടത്താന്‍ സിവില്‍ ഡിഫെന്‍സ് വൊളന്റിയര്‍മാര്‍ക്ക് കഴിയുമെന്നും ഇത് ഒട്ടേറെ ജീവന്‍ രക്ഷിക്കാന്‍ സഹായകമാകുമെന്നും മുഖ്യമന്ത്രി പിണറായി വിജയന്‍ പറഞ്ഞു. ഫയര്‍ ആന്‍ഡ് റെസ്‌ക്യൂ സേനക്ക് കീഴില്‍ ആരംഭിച്ച സിവില്‍ ഡിഫന്‍സ് വൊളന്റിയര്‍മാരുടെ പാസ്സിങ് ഔട്ട് പരേഡിന് സല്യൂട്ട് സ്വീകരിച്ചു സംസാരിക്കുകയായിരുന്നു മുഖ്യമന്ത്രി.
പല പ്രദേശങ്ങളില്‍ നിന്നും തിരഞ്ഞെടുക്കപ്പെട്ട സിവില്‍ ഡിഫെന്‍സ് വൊളന്റിയര്‍മാര്‍ക്ക് അതത് പ്രദേശത്തെ ദുരന്ത മുഖങ്ങളിലെത്തി ധൃതഗതിയില്‍ രക്ഷപ്രവര്‍ത്തനം നടത്താന്‍ കഴിയുമെന്നത് വലിയ കാര്യമാണെന്നും മുഖ്യമന്ത്രി പറഞ്ഞു. ദുരന്ത മുഖങ്ങളില്‍ സേവനം നടത്താന്‍ സ്വയം തയ്യാറായി വന്ന സിവില്‍ ഡിഫെന്‍സ് വൊളന്റിയര്‍മാരെ മുഖ്യമന്ത്രി അഭിനന്ദിച്ചു. പാലക്കാട് ഫയര്‍ സ്റ്റേഷന്‍ പരിസരത്ത് നടന്ന സിവില്‍ ഡിഫെന്‍സ് വൊളന്റിയര്‍മാരുടെ മാര്‍ച്ച് പാസ്റ്റിന് മുഖ്യമന്ത്രി ഓണ്‍ലൈന്‍ വഴി സല്യൂട്ട് സ്വീകരിച്ചു.
ജില്ലാ കലക്ടര്‍ മൃണ്മയി ജോഷി ശശാങ്ക്, ജില്ലാ പോലീസ് മേധാവി ആര്‍.വിശ്വനാഥ്, ജില്ലാ ഫയര്‍ ഓഫീസര്‍ അരുണ്‍ ഭാസ്‌കര്‍ തുടങ്ങിയവര്‍ പങ്കെടുത്തു. ജില്ലയില്‍ നിന്നും പ്രത്യേക പരിശീലനം പൂര്‍ത്തിയാക്കിയ 200 സിവില്‍ ഡിഫെന്‍സ് വൊളന്റിയര്‍മാരാണ് ഇന്ന് മുതല്‍ ദുരന്ത മുഖത്ത് സജീവമാവുക. പ്രകൃതി ക്ഷോഭം, തീപ്പിടുത്തം, ജലാശയ രക്ഷാപ്രവര്‍ത്തനം, വാഹനാപകടങ്ങള്‍ തുടങ്ങി ഏത് മേഖലയിലും രക്ഷാപ്രവര്‍ത്തനം നടത്താനുള്ള പരിശീലനം ഇവര്‍ക്ക് നല്‍കിയിട്ടുണ്ട്. 44 വനിതകളും 156 പുരുഷന്മാരുമാണ് പരിശീലനം പൂര്‍ത്തിയാക്കിയ 200 അംഗ ഡിഫെന്‍സ് ടീമിലുള്ളത്. 15 ഘട്ടങ്ങളിലായി ഒരു വര്‍ഷത്തെ പരിശീലനമാണ് ഇവര്‍ പൂര്‍ത്തീകരിച്ചത്.
കോവിഡ് പ്രതിരോധ പ്രവര്‍ത്തങ്ങളില്‍ സജീവമായി ഡയറക്ടറല്‍ ജനറലിന്റെ പ്രശംസ നേടിയ സിവില്‍ ഡിഫെന്‍സ് വൊളന്റിയര്‍മാര്‍ക്ക് ജില്ലാ കളക്ടറും, ജില്ലാ പോലീസ് മേധാവിയും ചേര്‍ന്ന് സര്‍ട്ടിഫിക്കറ്റുകള്‍ വിതരണം ചെയ്തു. പെട്ടിമുടി, നെല്ലിയാമ്പതി തുടങ്ങിയ പ്രകൃതി ദുരന്തങ്ങളില്‍ രക്ഷാപ്രവര്‍ത്തനം നടത്തിയ ഫയര്‍ ആന്‍ഡ് റെസ്‌ക്യൂ സേനാംഗങ്ങള്‍ക്കും സിവില്‍ ഡിഫെന്‍സ് വൊളന്റിയര്‍മാര്‍ക്കും ജില്ലാ കളക്ടര്‍, ജില്ലാ പോലീസ് മേധാവി എന്നിവര്‍ മെഡലുകള്‍ വിതരണം ചെയ്തു. രാഷ്ട്രപതിയുടെ മെഡല്‍ നേടിയ അസിസ്റ്റന്റ് ഫയര്‍ ഓഫീസര്‍ വി.നാസറിനെ ചടങ്ങില്‍ വെച്ച് ആദരിച്ചു.