തിരുവനന്തപുരം: ‘ലിജോ ഇനി ഭയപ്പെടേണ്ട, അഭ്യുദയകാംക്ഷികൾ നിങ്ങളോടൊപ്പമുണ്ട്…’ജില്ലാ കളക്ടർ ഡോ.നവ്‌ജോത് ഖോസ ഇത് പറഞ്ഞപ്പോൾ ലിജോ പുഞ്ചിരിക്കുന്നുണ്ടായിരുന്നു.അക്യൂട്ട് എൻസഫലോ മൈലാറ്റിസ് ന്യുറോപ്പതി എന്ന അപൂർവ രോഗത്താൽ പതിമൂന്ന് വർഷങ്ങളായി വെന്റിലേറ്റർ സഹായത്തോടെ ജീവിക്കുന്ന പാറശ്ശാല നെടുവാൻവിള മച്ചിംഗത്തോട്ടം സ്വദേശി ലിജോയ്ക്ക് ജില്ലാ കളക്ടർ നേരിട്ടെത്തി അത്യാധുനിക വെന്റിലേറ്റർ കൈമാറി.

ഇന്ത്യൻ റെഡ്‌ക്രോസ് സൊസൈറ്റിയുടെ സഹായത്തോടെ ഏറ്റവും പുതിയ ആൽഫ എമർജൻസി വെന്റിലേറ്ററാണ് നൽകിയത്. വെന്റിലേറ്റർ എടുത്തുകൊണ്ടു പോകത്തക്ക വിധത്തിലായതിനാൽ ഒരിടത്തു നിന്നു വേറൊരിടത്തേക്ക് അനായാസേന മാറ്റാൻ സാധിക്കും.

ഇത് രണ്ടാം തവണയാണ് ജില്ലാ കളക്ടർ ലിജോയെ സന്ദർശിക്കുന്നത്.കഴിഞ്ഞതവണ എത്തിയപ്പോൾ ലിജോയുടെ പേരിൽ പുതുതായി തയാറാക്കിയ അന്ത്യോദയ റേഷൻ കാർഡ് കൈമാറിയിരുന്നു.ഉപയോഗിച്ച് കൊണ്ടിരിക്കുന്ന വെന്റിലേറ്റർ കേടാകുമോ എന്ന ആശങ്ക ലിജോ അന്ന് കളക്ടറോട് പങ്കുവെച്ചിരുന്നു.കാലതാമസമുണ്ടാകാതെ തന്നെ ഇന്ത്യൻ റെഡ്‌ക്രോസ് സൊസൈറ്റി ജില്ലാ പ്രസിഡന്റ് കൂടിയായ കളക്ടർ ലിജോയുടെ ഈ ആവിശ്യം നിറവേറ്റുകയായിരുന്നു.

2007ലാണ് അക്യൂട്ട് എൻസഫലോ മൈലാറ്റിസ് ന്യുറോപ്പതി എന്ന അപൂർവ രോഗം ബാധിച്ച്  കഴുത്തിനു താഴെ തളർന്ന നിലയിൽ ലിജോയെ ശ്രീചിത്രയിൽ പ്രവേശിപ്പിച്ചത്.അന്ന് ഡിപ്ലോമ കോഴ്‌സ് പൂർത്തിയാക്കി എഞ്ചിനീയറിങ് പ്രവേശനത്തിന് ഒരുങ്ങുകയായിരുന്നു ലിജോ. ഒന്നരവർഷത്തോളം ശ്രീചിത്രയിൽ ഐ.സി.യുവിലായിരുന്ന ലിജോയെ പിന്നീട് മറ്റൊരു സ്വകാര്യ ആശുപത്രിയിൽ പ്രവേശിപ്പിച്ചു.2012 മുതൽ വീട്ടിൽ വെന്റിലേറ്ററിന്റെ സഹായത്തോടെ കിടപ്പിലായിരുന്ന ലിജോ ഇപ്പോൾ വാടകവീട്ടിലാണ് കഴിയുന്നത്.

വെന്റിലേറ്ററില്ലാതെ ലിജോയ്ക്ക് ജീവിക്കാനാകില്ല.അതീവ ഗുരുതരാവസ്ഥയിൽ നിന്നു ശ്രീചിത്ര ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസിലെ ന്യൂറോളജി വിഭാഗം മേധാവി ഡോ. സഞ്ജീവ് വി. തോമസാണ് ലിജോയെ ജീവിതത്തിലേക്കു തിരികെയെത്തിച്ചത്.തീർത്തും ദുരവസ്ഥയിലായ ലിജോയുടെ കഥ ഡോ. സഞ്ജീവ് തന്നെയാണു ജില്ലാ കളക്ടറുടെ ശ്രദ്ധയിൽപ്പെടുത്തിയത്.

നമ്മുടെ സമൂഹത്തിന്റെ സഹജീവി സ്‌നേഹം വ്യക്തമാക്കുന്ന മാതൃകയാണിത്.സാമ്പത്തികമായും അല്ലാതെയും ലിജോയെ സഹായിക്കാൻ നിരവധി പേർ മുന്നോട്ട് വന്നിരുന്നു.പ്രതിസന്ധികൾക്കിടെയിലും ലിജോയ്ക്ക് സുഖപ്രദമായൊരു ജീവിതം നൽകുവാൻ തുടർന്നും ആവശ്യമായ സഹായങ്ങൾ നൽകുമെന്ന് കളക്ടർ അറിയിച്ചു.

ആരോഗ്യസ്ഥിതിയെ സംബന്ധിച്ച് ലിജോയുടെ ഡോക്ടറോട് ചോദിച്ചറിഞ്ഞു.ലിജോയുടെ ആവിശ്യം നിറവേറ്റാൻ ഒരു ചെറിയ ഭാഗമായതിൽ വ്യക്തിപരമായി സംതൃപ്തിയുണ്ടെന്നും കളക്ടർ പറഞ്ഞു.സഹായം നൽകിയ എല്ലാവരോടും ജില്ലാ ഭരണകൂടത്തിന്റെ നന്ദി കളക്ടർ അറിയിച്ചു.

ചെല്ലയ്യൻ-മേഴ്സി ദമ്പതികളുടെ അഞ്ചു മക്കളിൽ അവസാനത്തെ ആളാണ് ലിജോ. അച്ഛനും അമ്മയും മരിച്ചപ്പോൾ രോഗിയായ സഹോദരിയെയും തന്റെ രണ്ട് കുഞ്ഞുങ്ങളെയും ലിജോയേയും നോക്കുന്നത് കൂടപ്പിറപ്പായ വിപിൻ ആണ്.  സ്ഥിര വരുമാനം ഇല്ലാത്ത വിപിൻ ഉണ്ടായിരുന്ന വീടും വസ്തുക്കളും വിറ്റായിരുന്നു ഇതുവരെയുള്ള ചികിത്സ നടത്തിയത്.

ഐ ബി എസ് കമ്പനിയുടെ നേതൃത്വത്തിൽ സ്വന്തമായൊരു വീട് എന്ന ലിജോയുടെ സ്വപ്നം  സാക്ഷാത്കരിക്കുകയാണ്.ഹാബിറ്റാറ്റാണ് വീട് നിർമിക്കുന്നത്. നിർമാണ പ്രവർത്തനങ്ങൾ ഇതിനോടകം ആരംഭിച്ചു.90 ദിവസം കൊണ്ട് വീടു പണി പൂർത്തിയാകും.

പാറശ്ശാല ബ്ലോക്ക് പഞ്ചായത്ത് പ്രസിഡന്റ് എസ്.കെ ബെൻഡാർവിൻ, നെടുവാൻവിള വാർഡ് മെമ്പർ വി ആർ വിനയനാഥ്, പാറശ്ശാല താലൂക്ക് ആസ്ഥാന ആശുപത്രി സൂപ്രണ്ട് ഡോ ബി.ഉണ്ണികൃഷ്ണൻ, ഇന്ത്യൻ റെഡ്‌ക്രോസ്സ് സൊസൈറ്റി കേരള സ്റ്റേറ്റ് ബ്രാഞ്ച് ചെയർമാൻ രഞ്ജിത്ത് കാർത്തികേയൻ, ഇന്ത്യൻ റെഡ്‌ക്രോസ്സ് സൊസൈറ്റി ജില്ലാ ചെയർമാൻ ഹരികൃഷ്ണൻ, ഇന്ത്യൻ റെഡ്‌ക്രോസ്സ് സൊസൈറ്റി വോളന്റിയർമാർ,സമീപവാസികൾ തുടങ്ങിയവർ പങ്കെടുത്തു.