എറണാകുളം: ലഹരിക്കെതിരെ ജനകീയ കൂട്ടായ്മയൊരുക്കി ജനകീയ മുഖാമുഖം ശ്രദ്ധേയമായി. സംസ്ഥാന എക്സൈസ് വകുപ്പിന് കീഴിലെ വിമുക്തി ലഹരി വർജന മിഷൻ്റെ നേതൃത്വത്തിൽ മഞ്ഞള്ളൂർ പഞ്ചായത്തിലെ മണിയന്തടം കോളനിയിൽ നടന്ന ജനകീയ മുഖാമുഖമാണ് സ്ത്രീകളടക്കമുള്ളവരുടെ പങ്കാളിത്തം കൊണ്ട് ശ്രദ്ധേയമായത്.
മുഖാമുഖത്തിനെത്തിയവർ തങ്ങളുടെ നിർദ്ദേശങ്ങളും ആശങ്കകളും ജനപ്രതിനിധികൾക്കും ഉദ്യോഗസ്ഥർക്കും മുന്നിൽ അവതരിപ്പിച്ചു.ജില്ലാ പട്ടികജാതി വികസന വകുപ്പിൻ്റെ സഹകരണത്തോടെ നടത്തിയ പരിപാടിയുടെ ഉദ്ഘാടനം ജില്ലാ പഞ്ചായത്ത് പ്രസിഡൻ്റ് ഉല്ലാസ് തോമസ് ഉദ്ഘാടനം ചെയ്തു. ലഹരി മാഫിയയുടെ സ്വാധീനം സമൂഹത്തിൽ അപകടകരമായ രീതിയിൽ വർധിച്ചുവരികയാണെന്നും ഇതിനെതിരെ ജില്ലയിലുട നീളം ജനകീയ കൂട്ടായ്മകൾ രൂപപ്പെടുത്തുമെന്നും അദ്ദേഹം പറഞ്ഞു.
മഞ്ഞള്ളൂർ പഞ്ചായത്ത് പ്രസിഡൻ്റ് ആൻസി ജോസ് അധ്യക്ഷത വഹിച യോഗത്തിൽ മധ്യമേഖലാ എക്സൈസ് ജോ.കമ്മീഷണർ പി.കെ സനു മുഖ്യാതിഥിയായി. ബ്ലോക്ക് പഞ്ചായത്തംഗം ജോസിജോളി, ഗ്രാമപഞ്ചായത്ത് സ്റ്റാൻഡിങ്ങ് കമ്മിറ്റി ചെയർമാൻ രതീഷ് മോഹൻ, ഗ്രാമപഞ്ചായത്തംഗം സെലിൻ ഫ്രാൻസിസ് തുടങ്ങിയവർ പ്രസംഗിച്ചു. വിമുക്തി മിഷൻ ജില്ലാ കോർഡിനേറ്റർ കെ.എ. ഫൈസൽ സ്വാഗതവും പട്ടികജാതി വികസന വകുപ്പ് സീനിയർ ക്ലർക്ക് ശ്രീനാഥ് ശ്രീധരൻ നന്ദിയും പറഞ്ഞു. മഞ്ഞള്ളൂർ പഞ്ചായത്തിലെ 5, 6 വാർഡുകളുൾപ്പടുന്ന മണിയന്തടം കോളനിയിൽ ലഹരി മാഫിയക്കെതിരെ നിരീക്ഷണം ശക്തമാക്കാനും ജനകീയ റെയ്ഡുകൾ നടത്താനും കൂട്ടായ്മയിൽ തീരുമാനമായി.
ടൂറിസം ഭൂപടത്തിലിടം പിടിച്ചതോടെ ഇവിടെക്ക് അസമയങ്ങളിൽ പോലും അപരിചിതർ എത്തുകയാണെന്ന് കോളനിക്കാർ പരാതിപ്പെട്ടു. ലഹരി മാഫിയക്കെതിരെ കോളനിയിൽ എക്സൈസ് വകുപ്പിൻ്റെ മേൽ നോട്ടത്തിൽ വിവിധ പരിപാടികൾ നടത്തുമെന്ന് ജോ.കമ്മീഷണർ പി.കെ സനു പറഞ്ഞു. കുടുംബശ്രീയംഗങ്ങൾ, ജാഗ്രത സമിതിയംഗങ്ങൾ, അങ്കണവാടി – ആശ വർക്കർമാർ അടക്കം നിരവധി പേർ മുഖാമുഖത്തിൽ പങ്കെടുത്തു. ഫോട്ടോ അടിക്കുറിപ്പ്: ലഹരി വിരുദ്ധ പ്രചാരണാർത്ഥം മഞ്ഞള്ളൂർ പഞ്ചായത്തിലെ മണിയന്തടം കോളനിയിൽ നടന്ന ജനകീയ മുഖാമുഖം ജില്ലാ പഞ്ചായത്ത് പ്രസിഡൻ്റ് ഉല്ലാസ് തോമസ് ഉദ്ഘാടനം ചെയ്യുന്നു.