വൈപ്പിൻ: ഫോക്ക്‌ലോർ ഫെസ്റ്റിന്റെ ഭാഗമായി ഇന്ന് (23) വളപ്പ് ബീച്ച് സാന്താക്ളോസുമാരെക്കൊണ്ട് നിറയും. വൈകുന്നേരം 4.30നു നിത്യസഹായമാത പള്ളിയിൽ നിന്ന് പപ്പാഞ്ഞികൾ ബീച്ചിലേക്ക് ചുവടുവയ്ക്കും. തുടർന്ന് ബീച്ചിൽ ക്രിസ്‌മസ്‌ കരോൾ അരങ്ങേറും.

101 സാന്തമാരാണ് പള്ളിയിൽ നിന്ന് ബീച്ചിൽ നിറയുക. ഫോക്ക്‌ലോർ ഫെസ്റ്റുമായി സഹകരിക്കുന്ന ഗ്രേറ്റർ കൊച്ചി കൾച്ചറൽ ഫോറമാണ് ക്രിസ്‌മസിനെയും പുതുവത്സരത്തെയും വരവേൽക്കുന്ന പരിപാടി ഒരുക്കുന്നത്. പള്ളിവികാരി ഫാ. റോണി മാത്യുവും കെ എൻ ഉണ്ണികൃഷ്ണൻ എംഎൽഎയും നേതൃത്വം നൽകും.

കുഴുപ്പിള്ളി ബീച്ചിൽ ഇന്ന് മൂന്നിനു കുടുംബശ്രീ നേതൃത്വത്തിലുള്ള ഭക്ഷ്യമേള ആരംഭിക്കും. വിപണനമേളയുമുണ്ടാകും. ബഹുവിധ രുചിരസങ്ങൾ ആസ്വദിക്കാൻ ഭക്ഷ്യമേളയിൽ അവസരമുണ്ടാകും. നാടൻ ഉത്പന്നങ്ങളുൾപ്പെടെ വിപണന മേളയിലുണ്ടാകും. മേള എഴുത്തുകാരി തസ്മിൻ ഷിഹാബ് ഉദ്ഘാടനം ചെയ്യും. കുഴുപ്പിള്ളി ഗ്രാമ പഞ്ചായത്ത് പ്രസിഡന്റ് കെ എസ് നിബിൻ അധ്യക്ഷത വഹിക്കും. എം എം പ്രമുഖൻ, എം സി സുനിൽകുമാർ , അനൂജ ജോർജ് എന്നിവർ സംസാരിക്കും.

കേരള ലളിതകലാ അക്കാദമിയുടെ സഞ്ചരിക്കുന്ന ചിത്ര പ്രദർശനം ഇന്ന് നായരമ്പലം ബിവിഎച്ച്എസിൽ എത്തും. ചലച്ചിത്ര അക്കാദമിയുടെ ആഭിമുഖ്യത്തിൽ സഹോദരൻ സ്‌മാരകത്തിൽ നടന്നു വന്ന ഫോക്ക്ലോർ ഫിലിം ഫെസ്റ്റ് സമാപിച്ചു.