പൊതുമൈതാനങ്ങൾ താഴിട്ട് അടച്ചുവെക്കരുതെന്ന് ഫിഷറീസ്, കായിക വകുപ്പ് മന്ത്രി വി അബ്ദുറഹിമാൻ പറഞ്ഞു. ചേലോറ ഗവ. ഹയർസെക്കണ്ടറി സ്‌കൂൾ ഗ്രൗണ്ട് നവീകരണ പ്രവൃത്തി ഉദ്ഘാടനം ചെയത് സംസാരിക്കുകയായിരുന്നു അദ്ദേഹം. കായികക്ഷമത ഉറപ്പാക്കാൻ കളിസ്ഥലങ്ങൾ ആവശ്യമാണ്. എന്നാൽ പലയിടത്തും പൊതുമൈതാനങ്ങൾ താഴിട്ട് അടച്ച് വെക്കുന്നു. ഇതുമായി ബന്ധപ്പെട്ട് സർക്കാർ ഉടൻ സർക്കുലർ പുറത്തിറക്കും. കേരളത്തിൽ 14 ജില്ലാ സ്റ്റേഡിയങ്ങളുടെ പ്രവൃത്തി നടക്കുന്നുണ്ട്. ഇതോടൊപ്പം കണ്ണൂർ ജില്ലയിലും വലിയൊരു സ്റ്റേഡിയം ആവശ്യമാണ്. ഇത് അനുവദിക്കാനുള്ള പ്രവർത്തനങ്ങൾ പുരോഗമിക്കുന്നുണ്ട്. ജില്ലയിലെ കൂത്തുപറമ്പ്, തലശ്ശേരി, ധർമടം എന്നിവിടങ്ങളിൽ മികച്ച കളിക്കളങ്ങളാണ് ഒരുക്കിയതെന്നും മന്ത്രി പറഞ്ഞു.