കുന്നംകുളത്തെ 220 കെ.വി ഗ്യാസ് ഇന്‍സുലേറ്റഡ് സബ് സ്റ്റേഷന്‍ യാഥാര്‍ത്ഥ്യമാകുന്നു. നിലവിലെ 110 കെ.വി സബ്‌സ്റ്റേഷന്റെ ശേഷി 220 കെ.വിയിലേയ്ക്ക് ഉയര്‍ത്തുന്നതിന്റെ ഭാഗമായി 220 കെ.വിയുടെ ഗ്യാസ് ഇന്‍സുലേറ്റഡ് സബ്‌സ്റ്റേഷന്റെ നിര്‍മാണം ട്രാന്‍സ്ഗ്രിഡ് പദ്ധതിയില്‍ ഉള്‍പ്പെടുത്തിയാണ് പൂര്‍ത്തീകരിച്ചത്. പദ്ധതി പ്രാവര്‍ത്തികമാകുന്നതോടെ വൈദ്യുതി തടസം ഒഴിവാക്കാനും വൈദ്യുത വിതരണം സുഗമമാക്കാനും കഴിയും.

തൃശൂര്‍ മാടക്കത്തറയില്‍ പവര്‍ഗ്രിഡ് പുതുതായി നിര്‍മിച്ച എച്ച്.വി.ഡി.സി സ്റ്റേഷനില്‍ നിന്നും മാലാപ്പറമ്പിലേക്ക് പോകുന്ന ലൈനില്‍ നിന്ന് വടക്കാഞ്ചേരി മുതല്‍ കുന്നംകുളം വരെ പുതിയ മള്‍ട്ടി സര്‍ക്യൂട്ടിനാവശ്യമായ ടവറുകള്‍ സ്ഥാപിച്ചാണ് ഇവിടേക്കാവശ്യമായ വൈദ്യുതി എത്തിക്കുന്നത്. 220 കെ.വി ഗ്യാസ് ഇന്‍സുലേറ്റഡ് സബ്‌സ്റ്റേഷനും അനുബന്ധ ലൈനുകള്‍ക്കുമായി 127 കോടി രൂപ ഭരണാനുമതി ലഭിച്ച പദ്ധതികളാണ് ഇപ്പോള്‍ പൂര്‍ത്തീകരിച്ചിരിക്കുന്നത്.

കുന്നംകുളം സബ്‌സ്റ്റേഷന് പുറമെ സമീപത്തുള്ള പുന്നയൂര്‍ക്കുളം, ഗുരുവായൂര്‍, കണ്ടശാംകടവ്, അത്താണി, വിയ്യൂര്‍ എന്നീ 110 കെ.വി
സബ്‌സ്റ്റേഷനുകളിലേക്കും ബ്ലാങ്ങാട്, ചാവക്കാട്, കൊങ്ങന്നൂര്‍, മുണ്ടൂര്‍, എരുമപ്പെട്ടി, വാടാനപ്പിള്ളി, മുല്ലശ്ശേരി, അന്തിക്കാട് എന്നീ 33 കെ.വി സബ്‌സ്റ്റേഷനുകളിലേക്കും ആവശ്യമായ വൈദ്യുതി ഇവിടെ നിന്ന് നല്‍കാനാകും. അതിനായി 100 എം.വി.എ ശേഷിയുള്ള 220/110 കെ.വിയുടെ രണ്ട് ട്രാന്‍സ്‌ഫോര്‍മറുകള്‍ സ്ഥാപിച്ചിട്ടുണ്ട്.

വൈദ്യതി വിതരണം നടത്തുന്നതിന് 110 കെ.വിയുടെ 9 ഫീഡര്‍ ബേയുടെയും 3 ട്രാന്‍സ്‌ഫോര്‍മര്‍ ബേയുടെയും നിര്‍മാണം പുരോഗമിക്കുകയാണ്. ഒന്നാം ഘട്ടത്തിലെ 5 ഫീഡര്‍ ബേയുടെയും 1 ട്രാന്‍സ് ഫോര്‍മര്‍ ബേയുടെയും നിര്‍മാണം പൂര്‍ത്തീകരിച്ചിട്ടുണ്ട്. 110/11 കെ.വി ട്രാന്‍സ്‌ഫോര്‍മറുകളുടെ ശേഷി 25 എംവിഎയില്‍ നിന്ന് 40 എംവിഎ ആയി ഉയര്‍ത്തുന്ന ജോലിയും 3 ബേകളുടെ നിര്‍മാണവും ദ്രുതഗതിയില്‍ പുരോഗമിക്കുന്നു. മൂന്നാം ഘട്ടത്തില്‍ നിലവിലുണ്ടായിരുന്ന 110 കെ.വി യാര്‍ഡ് പുതുക്കിപ്പണിയുന്ന ജോലികള്‍ ഈ സാമ്പത്തിക വര്‍ഷം തന്നെ പൂര്‍ത്തീകരിക്കാന്‍ സാധിക്കും. മൂന്നാംഘട്ടം പൂര്‍ത്തീകരിക്കുന്നതോടെ കുന്നംകുളം സബ്‌സ്റ്റേഷന്‍ പൂര്‍ണമായും ഓട്ടോമാറ്റിക് ഓപ്പറേഷനിലേയ്ക്ക് മാറ്റും. 110 കെ.വി വോള്‍ടേജ് ലെവലില്‍ മാത്രം 20 കോടി രൂപയുടെ പദ്ധതികളാണ് നടപ്പിലാക്കുന്നത്.

നിര്‍മാണം പൂര്‍ത്തീകരിച്ച 220 കെ.വി ലൈനുകളുടെയും ഗ്യാസ് ഇന്‍സുലേറ്റഡ് സബ്‌സ്റ്റേഷന്റെയും 110 കെ.വി ഒന്നാംഘട്ടത്തിന്റെയും നിര്‍മാണ പ്രവര്‍ത്തനങ്ങള്‍ പൂര്‍ത്തീകരിച്ച് ഉദ്ഘാടനത്തിന് തയ്യാറെടുക്കുകയാണ്.