ആർട്ടിഫിഷ്യൽ ഇന്റലിജൻസിന്റെയും അതി നൂതന സാങ്കേതിക വിദ്യയുടെയും പുതിയ ലോകത്തേക്ക് മലപ്പുറത്തെ വിദ്യാർത്ഥികളെ കൈ പിടിച്ചാനയിക്കുന്നതിനായി മലപ്പുറം ജില്ലാ പഞ്ചായത്ത് ആവിഷ്‌കരിച്ചു നടപ്പിലാക്കിയ 100 കെ മലപ്പുറം കോഡേഴ്സ് പദ്ധതിയിൽ കോഴ്‌സ് പൂർത്തിയാക്കിയ പ്രഥമ ബാച്ചിന്റെ കോൺവൊക്കേഷൻ നാളെ (ജനുവരി 12 വ്യാഴം ) രാവിലെ 10 മണിക്ക് മലപ്പുറം റോസ് ലോഞ്ച് ഓഡിറ്റോറിയത്തിൽ നടക്കും.
കോൺവൊക്കേഷൻ പ്രോഗ്രാം ഡോ. ശശി തരൂർ എം. പി ഉദ്ഘാടനം ചെയ്യും. കേരള നിയമസഭ പ്രതിപക്ഷ ഉപനേതാവ് പി. കെ. കുഞ്ഞാലികുട്ടി മുഖ്യാതിഥിയാവും. എം. എൽ. എ മാരായ പി. ഉബൈദുല്ല, എ. പി. അനിൽകുമാർ, പി. നന്ദകുമാർ, മലപ്പുറം നഗരസഭ അധ്യക്ഷൻ മുജീബ് കാടേരി സംബന്ധിക്കും.
ജില്ലയിലെ വിദ്യാർത്ഥികൾക്ക് സ്‌കൂൾ പഠനത്തോടൊപ്പം ആർട്ടിഫിഷ്യൽ ഇന്റലിജിൻസ്, റോബോട്ടിക്, ബ്ലോക്ക് ചെയിൻ, 3 ഡി പ്രിന്റിംഗ് തുടങ്ങിയ അതിനൂതന സാങ്കേതിക വിദ്യകളിൽ സൗജന്യമായി പരിശീലനം നൽകുന്ന പദ്ധതിയാണിത്. ആധുനിക വിവര സാങ്കേതിക വിദ്യാഭ്യാസ രംഗത്ത് വേറിട്ട മാതൃകയായ പദ്ധതി മലപ്പുറം ഇ ഡാപ്റ്റ് ലേണിംഗ് അപ്ലിക്കേഷനുമായി സഹകരിച്ചാണ് നടപ്പിലാക്കിയത്.
ഇന്ത്യയിൽ തന്നെ ആദ്യമായാണ് ഒരു തദ്ദേശ സ്വയം ഭരണ സ്ഥാപനം ഇത്തരമൊരു പദ്ധതി സ്‌കൂൾ വിദ്യാർത്ഥികൾക്കായി നടപ്പിലാക്കുന്നത്.
അതിവേഗത്തിലുള്ള മാറ്റങ്ങൾക്ക് വിധേയമായിക്കൊണ്ടിരിക്കുന്ന ശാസ്ത്ര സാങ്കേതിക മുന്നേറ്റത്തിനൊപ്പം സഞ്ചരിക്കാൻ മലപ്പുറത്തെ പുതിയ തലമുറയെ സജ്ജമാക്കുന്നതിനുള്ള സവിശേഷമായ പദ്ധതിക്ക് കഴിഞ്ഞ വർഷമാണ് തുടക്കം കുറിച്ചത്. അമ്പത്തിനായിരത്തോളം വിദ്യാർത്ഥികളാണ് ഇതിനോടകം പദ്ധതിയുടെ ഭാഗമായത്.
ജില്ലയിലെ വിവിധ സ്‌കൂളുകളിൽ നിന്നായി കോഴ്‌സ് പൂർത്തിയാക്കിയ ആദ്യത്തെ 1000 വിദ്യാർത്ഥികളാണ് കോൺവൊക്കേഷനിൽ പങ്കെടുക്കുക.
വരും വർഷങ്ങളിൽ കൂടുതൽ കുട്ടികളിലേക്ക് കോഴ്‌സ് എത്തിക്കുന്നതിനും പുതിയ നൂറ്റാണ്ടിന്റെ സാങ്കേതിക മുന്നേറ്റങ്ങൾക്ക് മുന്നിൽ നടക്കാൻ ജില്ലയിലെ കുട്ടികളെ പ്രാപ്തരാക്കുന്നതിനുമാണ് മലപ്പുറം ജില്ലാ പഞ്ചായത്ത് ലക്ഷ്യമിടുന്നതെന്ന് പ്രസിഡന്റ് എം. കെ. റഫീഖ, വൈസ് പ്രസിഡന്റ് ഇസ്മായിൽ മൂത്തേടം എന്നിവർ അറിയിച്ചു.