നീതിയുടെയും മാനവികതയുടെയും സന്ദേശം നൽകി ഭിന്നശേഷി സമൂഹത്തെ മുഖ്യധാരയിൽ കൊണ്ടുവരാനായി സസ്നേഹം, റിഹാബ്‌ എക്സ്പ്രസ് പദ്ധതികൾ എന്റെ കേരളം മെഗാ പ്രദർശന മേളയിൽ ഒരുക്കി സാമൂഹ്യ നീതി വകുപ്പ്.തൃശൂർ ജില്ലാ ഭരണകൂടവും സാമൂഹ്യ നീതി വകുപ്പുമായി ചേർന്ന് ഒരുക്കിയ സസ്നേഹം പ്രോജക്ട് വഴി ഭിന്നശേഷി വിഭാഗക്കാർ ഉണ്ടാക്കിയ ഉത്പന്നങ്ങൾ സസ്നേഹം സ്റ്റാളിൽ ലഭ്യമാണ്.

ജില്ലയിലെ ഏഴു സ്പെഷ്യൽ സ്കൂളുകൾ ഓരോ ദിവസവും മേളയിൽ അവരുടെ ഉത്പന്നങ്ങൾ വിൽക്കുന്ന രീതിയിലാണ് സ്റ്റാൾ ക്രമീകരിച്ചിരിക്കുന്നത്. മാങ്ങ് ഉപ്പിലിട്ടത്,അച്ചാർ, ഉണ്ണിയപ്പം,നറുനീണ്ടി,പൈനാപ്പിൾ ജ്യൂസുകൾ, മറ്റു ഭക്ഷ്യ ഉത്പന്നങ്ങൾ എന്നിവ സ്റ്റാളിൽ ലഭ്യമാണ്.

സാമൂഹ്യ നീതി വകുപ്പ് ഒരുക്കുന്ന വിദഗ്ദ ഡോക്ടർമാരുടെ കേൾവി പരിശോധന, ഫിസിയോ തെറാപ്പി എന്നിവ നടത്തുന്ന റിഹാബ് എക്സ്പ്രസ്സ് പ്രോഗ്രാം മേളയിൽ പതിമൂന്നാം തിയ്യതി ശനിയാഴ്ച നടക്കും. പരിശോധന നടത്താൻ താൽപര്യം ഉള്ളവർക്ക് വകുപ്പിന്റെ 04872321702 നമ്പറിൽ ബന്ധപ്പെടാവുന്നതാണ്.

സ്റ്റാളിൽ ഏവരെയും ആകർഷിക്കുന്നത് സമൂഹത്തിലെ ഭിന്നശേഷിക്കാർ ,വായോജനങ്ങൾ എന്നിവരെ സംരക്ഷിക്കാൻ ഉള്ള സന്ദേശങ്ങൾ അടങ്ങിയ ഫോട്ടോ ഫ്രെയിം തയ്യാറാക്കിയ സ്റ്റാൻഡ് ആണ്. സാമൂഹ്യനീതി വകുപ്പ് മന്ത്രി ഡോ. ആർ ബിന്ദു മേളയിലെത്തി ഫോട്ടോ ഫ്രെയിമിൽ നിന്ന് ചിത്രങ്ങൾ പകർത്തിയിരുന്നു. ഭിന്നശേഷി സൗഹൃദവും സ്വയംപര്യാപ്തത വുമായി മേളയെ മാറ്റുന്ന സാന്നിദ്ധ്യമാണ് സാമൂഹ്യ നീതി വകുപ്പ് ഒരുക്കിയിരിക്കുന്നത്.