നടത്തറ ഗ്രാമപഞ്ചായത്തും നടത്തറ കുടുംബാരോഗ്യ കേന്ദ്രവും സംയുക്തമായി മെൻസ്ട്രൽ കപ്പ് വിതരണം ചെയ്തു. കുടുംബരോഗ്യ കേന്ദ്രത്തിൽ നടന്ന വിതരണ ഉദ്ഘാടനം ജില്ലാ പഞ്ചായത്തംഗം കെ വി സജു നിർവഹിച്ചു.

തൃശൂർ ജില്ലാ പഞ്ചായത്തിന്റെ സഹകരണത്തോടെ 5 ലക്ഷം രൂപ ചെലവഴിച്ച് പഞ്ചായത്ത് പരിധിയിലെ 1500 പേർക്കാണ് മെൻസ്ട്രൽ കപ്പ് വിതരണം ചെയ്തത്. ഹിന്ദുസ്ഥാൻ ലാറ്റക്സിൽ നിന്നും വാങ്ങിയ മെൻസ്ട്രൽ കപ്പുകളാണ് വിതരണം ചെയ്തത്. ഉപയോക്താക്കളിൽ നിന്നും ഫീഡ്ബാക്ക് ശേഖരണം ആശ വർക്കർമാർ മുഖേന നടത്തും.

നടത്തറ പഞ്ചായത്ത് പ്രസിഡണ്ട് ശ്രീവിദ്യ രജേഷ് അദ്ധ്യക്ഷത വഹിച്ച യോഗത്തിൽ പഞ്ചായത്ത് വൈസ് പ്രസിഡണ്ട് അഡ്വ.പി ആർ രജിത്ത്, മെഡിക്കൽ ഓഫീസർ ഡോ.ശാലിനി, പഞ്ചായത്തംഗങ്ങളായ ഇ എൻ സീതാലക്ഷ്മി, പി കെ അഭിലാഷ്, ജിനിത സുഭാഷ്, ഇ ആർ പ്രദീപ്, ബിന്ദു സുരേഷ്, എം എസ് അശോക് കുമാർ, ടി പി മാധവൻ, ജൂനിയർ ഹെൽത്ത് ഇൻസ്പെക്ടർ ജോബി തുടങ്ങിയവർ പങ്കെടുത്തു.