ഓണത്തോടനുബന്ധിച്ച് വ്യവസായ വാണിജ്യ വകുപ്പിന്റെ നേതൃത്വത്തില്‍ തുടങ്ങിയ ബ്രാന്‍ഡ് വയനാടിന് തിരക്കേറുന്നു. ദിവസങ്ങള്‍ക്കകം ഒന്നേകാല്‍ ലക്ഷത്തിലധികം രൂപയുടെ വരുമാനമുണ്ടായി. ജില്ലയിലെ സൂക്ഷ്മ ചെറുകിട ഇടത്തരം വ്യവസായ സംരംഭങ്ങളുടെ ഉല്‍പ്പന്നങ്ങള്‍ വിപണനം നടത്തുക എന്ന ലക്ഷ്യത്തോടെയാണ് ജില്ലാ വ്യവസായ കേന്ദ്രം ‘ഈ ഓണം ബ്രാന്‍ഡ് വയനാടിനൊപ്പം’ പദ്ധതിക്ക് തുടക്കമിട്ടത്.
പദ്ധതിയിലുടെ വ്യവസായ സ്ഥാപനങ്ങളുടെ ഉല്‍പ്പന്നങ്ങള്‍ ഘട്ടംഘട്ടമായി ജനങ്ങളില്‍ എത്തിക്കും. ജില്ലയിലെ മുഴുവന്‍ വ്യവസായ സംരംഭകരുമായി സഹകരിച്ച് ഉത്പാദിപ്പിക്കുന്ന ഉല്‍പ്പന്നങ്ങളെ ബ്രാന്‍ഡ് വയനാട് എന്ന ലേബലില്‍ പ്രത്യേകം സജ്ജീകരിച്ച വണ്ടികളില്‍ സര്‍ക്കാര്‍ ഓഫീസുകള്‍ പൊതുസ്ഥലങ്ങള്‍, സ്ഥാപനങ്ങള്‍ എന്നിവിടങ്ങളില്‍ വില്‍പ്പനയ്ക്ക് എത്തിക്കുന്നുണ്ട്.
അച്ചാറുകള്‍, കോഫീ ഉല്‍പ്പന്നങ്ങള്‍, ചിപ്സുകള്‍, ചക്ക ഉല്‍പ്പന്നങ്ങള്‍ തുടങ്ങി വിവിധതരം ഭക്ഷ്യ ഉല്‍പ്പന്നങ്ങള്‍, ആയുര്‍വേദ ഉല്‍പ്പന്നങ്ങള്‍, തുണിത്തരങ്ങള്‍, ചെരുപ്പുകള്‍, വിവിധതരം അരികള്‍ എന്നിങ്ങനെ മികച്ച ഗുണമേന്മയുള്ള ഉല്‍പ്പന്നങ്ങളാണ് ബ്രാന്‍ഡ് വയനാട് വില്‍പ്പനയ്ക്കായി ഒരുക്കിയത്.