കേരളീയം മഹോത്സവത്തിന്റെ ഭാഗമായ മെഗാ ഓൺലൈൻ ക്വിസിൽ കാട്ടാക്കട നിയമസഭാ മണ്ഡലത്തിലെ മുഴുവൻ സ്‌കൂൾ, കോളജ് വിദ്യാർഥികളെയും പങ്കെടുപ്പിച്ച് അറിവിന്റെ ഉത്സവമാക്കാനുള്ള ഒരുക്കവുമായി വിദ്യാഭ്യാസവകുപ്പും കേരളീയം സംഘാടകരും. അറിവിന്റെ മലയാളി സംഗമം ഓൺലൈനായി ഒരുക്കുന്ന കേരളീയം മെഗാ ക്വിസ് രജിസ്‌ട്രേഷൻ പുരോഗമിക്കുകയാണ്. പങ്കാളിത്തം കൊണ്ട് ചരിത്രം സൃഷ്ടിക്കാനുള്ള അപൂർവനേട്ടത്തിലേക്കാണ് കേരളീയം മെഗാ ഓൺലൈൻ ക്വിസിന്റെ ആവേശം നീങ്ങുന്നത്.

നിയമസഭാ മണ്ഡലത്തിലെ സ്‌കൂളുകളിലെയും കോളജുകളിലെയും എല്ലാ ക്ലാസുകളിലെയും എല്ലാ കുട്ടികളെയും ക്വിസ് മത്സരത്തിൽ പങ്കെടുപ്പിക്കുന്നതിന് ഇവിടത്തെ മുഴുവൻ അധ്യാപകരുടെയും യോഗം ഓൺലൈനായി ചേർന്നുവെന്ന് കാട്ടാക്കട മണ്ഡലത്തിലെ എം.എൽ.എയും കേരളീയം പ്രോഗ്രാം സമിതി അധ്യക്ഷനുമായ ഐ.ബി. സതീഷ് പറഞ്ഞു. 1001 വിദ്യാർഥികൾ പങ്കെടുക്കുന്ന ഗാനാലാപനവും കാട്ടാക്കട മണ്ഡലത്തിൽ സംഘടിപ്പിക്കുമെന്ന്  അദ്ദേഹം അറിയിച്ചു.

ക്വിസിൽ പങ്കെടുക്കുന്നതിനായി ഒക്ടോബർ 18 ഉച്ചയ്ക്കു രണ്ടുമണി വരെ രജിസ്റ്റർ ചെയ്യാം. കേരളീയം വെബ്സൈറ്റിലൂടെയും (keraleeyam.kerala.gov.in) ക്യൂആർ കോഡ് സ്‌കാൻ ചെയ്തും രജിസ്ട്രേഷൻ പൂർത്തിയാക്കാം.

കേരളം നാളിതുവരെ നേടിയ നേട്ടങ്ങളുടെ പ്രദർശനവുമായി നവംബർ ഒന്നു മുതൽ ഏഴുവരെ തിരുവനന്തപുരം നഗരത്തിൽ സംസ്ഥാനസർക്കാർ ഒരുക്കുന്ന കേരളീയം പരിപാടിയുടെ ഭാഗമാണ് ഓൺലൈൻ ക്വിസ് മത്സരം. പ്രായഭേദമെന്യേ ലോകത്തുള്ള എല്ലാ മലയാളികൾക്കും ഓൺലൈൻ ക്വിസ് മത്സരത്തിൽ പങ്കെടുക്കാം. ഒക്ടോബർ 19ന് ഇന്ത്യൻ സമയം വൈകിട്ട് 7.30നാണ്  മത്സരം നടക്കുന്നത്. ഓൺലൈൻ ക്വിസ് മത്സരത്തിലെ വിജയികൾക്ക് തിരുവനന്തപുരത്ത് ഓഫ് ലൈനായി നടക്കുന്ന ഗ്രാൻഡ് ഫിനാലെയിൽ പങ്കെടുത്ത് ഒരു ലക്ഷം രൂപ ക്യാഷ് പ്രൈസ് അടക്കമുള്ള ആകർഷകമായ സമ്മാനങ്ങൾ നേടാം.

രജിസ്റ്റർ ചെയ്യുന്നവർക്ക് മോക്ക് ടെസ്റ്റിന് അവസരമുണ്ട്. വിശദാംശങ്ങൾ കേരളീയം വെബ്സൈറ്റിൽ ലഭ്യമാണ്. കേരളവുമായി ബന്ധപ്പെട്ട ചരിത്രം, കല, സംസ്‌കാരം, സയൻസ്, ഗണിതം, സാമൂഹ്യശാസ്ത്രം, സാഹിത്യം തുടങ്ങി വിവിധ വിഷയങ്ങളെ ആസ്പദമാക്കിയ ചോദ്യങ്ങളായിരിക്കും ഉണ്ടാകുക. കേരളീയം വെബ്സൈറ്റ്: keraleeyam.kerala.gov.in.