തൃശൂര് ജില്ലാ പഞ്ചായത്ത് 11-മത്തെ പ്രസിഡന്റായി ആമ്പല്ലൂര് ഡിവിഷനില് നിന്നുള്ള വി എസ് പ്രിന്സ് തിരഞ്ഞെടുക്കപ്പെട്ടു. ജില്ലാ പഞ്ചായത്ത് കോണ്ഫറന്സ് ഹാളില് നടന്ന തിരഞ്ഞെടുപ്പില് ആകെ പോള് ചെയ്ത 28 വോട്ടില് 24 ഉം നേടിയാണ് വി എസ് പ്രിന്സ് പ്രസിഡന്റ് സ്ഥാനത്തെത്തിയത്. ഫലപ്രഖ്യാപനത്തിന് ശേഷം വരണാധികാരിയായ ജില്ലാ കലക്ടര് വി ആര് കൃഷ്ണതേജ പ്രസിഡന്റിന് സത്യവാചകം ചൊല്ലിക്കൊടുത്തു.
മുന് ജില്ലാ പഞ്ചായത്ത് പ്രസിഡന്റും ആളൂര് ഡിവിഷനില് നിന്നുള്ള പി കെ ഡേവിസ്, വി എസ് പ്രിന്സിനെ പ്രസിഡന്റ് സ്ഥാനത്തേക്ക് നിര്ദേശിക്കുകയും ചൂണ്ടല് ഡിവിഷനിലെ എ വി വല്ലഭന് പിന്താങ്ങുകയും ചെയ്തു. പ്രസിഡന്റ് സ്ഥാനത്തേക്ക് മത്സരിച്ച അടാട്ട് ഡിവിഷനില് നിന്നുള്ള ജിമ്മി ചൂണ്ടലിന് നാല് വോട്ടുകള് ലഭിച്ചു.
സത്യപ്രതിജ്ഞ ചടങ്ങില് ജില്ലാ പഞ്ചായത്ത് വൈസ് പ്രസിഡന്റ് ലതാ ചന്ദ്രന്, മുന് മന്ത്രി വി എസ് സുനില്കുമാര്, ജില്ലാ പഞ്ചായത്ത് സെക്രട്ടറി പി എസ് ഷിബു, ജില്ലാ പഞ്ചായത്ത് അംഗങ്ങള്, ജനപ്രതിനിധികള്, രാഷ്ട്രീയപാര്ട്ടി പ്രതിനിധികള് തുടങ്ങിയവര് പങ്കെടുത്തു.