കേരള മത്സ്യത്തൊഴിലാളി ക്ഷേമനിധി ബോർഡ് (മത്സ്യബോർഡ്) മത്സ്യതൊഴിലാളികളുടെയും അനുബന്ധതൊഴിലാളികളുടെയും മക്കൾക്കായി നടപ്പിലാക്കി വരുന്ന വിദ്യാഭ്യാസകായിക പ്രോത്സാഹന അവാർഡിന്  അപേക്ഷകൾ ക്ഷണിച്ചു. 2024-25 അധ്യയന വർഷം എസ്.എസ്.എൽ.സി, പ്ലസ്.ടു/ വി.എച്ച്.എസ്.സി പരീക്ഷകളിൽ ഉന്നത വിജയം നേടിയ വിദ്യാർത്ഥികൾ, ഗവൺമെന്റ് റീജിയണൽ ഫിഷറീസ് ടെക്‌നിക്കൽ ഹൈ സ്‌കൂളുകളിൽ നിന്ന് ഉന്നത വിജയം വിദ്യാർത്ഥികൾ, കായിക മത്സരങ്ങളിൽ ദേശീയ തലത്തിലും സംസ്ഥാന തലത്തിലും വിജയം വിദ്യാർത്ഥികൾ എന്നിവർക്കാണ് വിദ്യാഭ്യാസ പ്രോത്സാഹന അവാർഡിന് അർഹത. 2025ലെ എസ്.എസ്.എൽ.സി/ ടി.എച്ച്.എസ്.എൽ.സി പരീക്ഷകളിൽ 10എ+, 9എ+, 8എ+ വാങ്ങിയ വിദ്യാർത്ഥികൾക്ക് എസ്.എസ്.എൽ.സി വിഭാഗത്തിൽ അവാർഡിന് അപേക്ഷിക്കാം.

2025 ലെ പ്ലസ്ടു/ വി.എച്ച്.എസ്.സി പരീക്ഷകളിൽ മുഴുവൻ വിഷയങ്ങൾക്കും എ+ വാങ്ങിയ വിദ്യാർത്ഥികൾക്ക് പ്ലസ്ടു/ വി.എച്ച്.എസ്.സി വിഭാഗത്തിൽ അവാർഡിന് അപേക്ഷിക്കാം.

വ്യക്തിഗതവും ഗ്രൂപ്പ് അടിസ്ഥാനത്തിലും ഉള്ള കായിക മത്സര ഇനങ്ങളിൽ ദേശീയ തലത്തിലും സംസ്ഥാന തലത്തിലും ഒന്ന്, രണ്ട്, മൂന്ന് സ്ഥാനങ്ങൾ കരസ്ഥമാക്കിയ മത്സ്യത്തൊഴിലാളികളുടെ മക്കൾക്ക് കായിക പ്രോത്സാഹന അവാർഡിന് അപേക്ഷിക്കാം.

എസ്.എസ്.എൽ.സി പരീക്ഷയിൽ എല്ലാ വിഷയങ്ങൾക്കും എ+ നേടുന്ന വർക്ക് 5000 രൂപയും 9എ+ നേടുന്നവർക്ക് 4000 രൂപയും, 8എ+ നേടുന്നവർക്ക് 3000രൂപയും പ്രോത്സാഹന തുകയായി നൽകും.

ഹയർസെക്കൻഡറി (+2), വൊക്കേഷണൽ  ഹയർസെക്കണ്ടറി പരീക്ഷകളിൽ എല്ലാ വിഷയങ്ങൾക്കും എ+ നേടുന്ന വിദ്യാർത്ഥികൾക്ക് 5000രൂപ പ്രോത്സാഹന തുകയായി നൽകും.

കായിക മത്സരങ്ങളിൽ ദേശിയതലത്തിലും, സംസ്ഥാന തലത്തിലും വ്യക്തികത, ഗ്രൂപ്പ് മത്സരങ്ങളിൽ ഒന്ന്, രണ്ട്, മൂന്ന് സ്ഥാനങ്ങൾ നേടുന്ന വിദ്യാർത്ഥികൾക്ക്  ക്യാഷ് അവാർഡും, മൊമന്റോയും നൽകി ആദരിക്കും.

ദേശിയ തലത്തിൽ വ്യക്തിഗത ഇനങ്ങളിൽ ഒന്നാം സ്ഥാനം നേടുന്നവർക്ക് 10,000 രൂപയും, രണ്ടാം സ്ഥാനം നേടുന്ന വിദ്യാർത്ഥികൾക്ക് 8,000 രൂപയും, മൂന്നാം സ്ഥാനം നേടുന്ന വിദ്യാർത്ഥികൾക്ക് 5000 രൂപയും സംസ്ഥാനത്തെ പ്രതിനിധീകരിക്കുന്ന വിദ്യാർത്ഥികൾക്ക് 5000 രൂപയും പ്രോത്സാഹന തുകയായി നൽകും.

ദേശിയ തലത്തിൽ ഗ്രൂപ്പ് ഇനങ്ങളിൽ ഒന്നാം സ്ഥാനം നേടുന്നവർക്ക് 8,000 രൂപയും, രണ്ടാം സ്ഥാനം നേടുന്ന വിദ്യാർത്ഥികൾക്ക് 5,000 രൂപയും, മൂന്നാം സ്ഥാനം നേടുന്ന വിദ്യാർത്ഥികൾക്ക് 5000 രൂപയും പ്രോത്സാഹന തുകയായി നൽകുന്നു.

        സംസ്ഥാന തലത്തിൽ വ്യക്തിഗത ഇനങ്ങളിൽ ഒന്നാം സ്ഥാനം നേടുന്ന വിദ്യാർത്ഥികൾക്ക് 5,000 രൂപയും, രണ്ടാം സ്ഥാനം നേടുന്ന വിദ്യാർത്ഥികൾക്ക് 3,000 രൂപയും, മൂന്നാം സ്ഥാനം നേടുന്ന വിദ്യാർത്ഥികൾക്ക്  2000 രൂപയും പ്രോത്സാഹന തുകയായി നൽകും.

സംസ്ഥാന തലത്തിൽ ഗ്രൂപ്പ് ഇനങ്ങളിൽ ഒന്നാം സ്ഥാനം നേടുന്ന വിദ്യാർത്ഥികൾക്ക് 3,000 രൂപയും, രണ്ടാം സ്ഥാനം നേടുന്ന വിദ്യാർത്ഥികൾക്ക്  2,000 രൂപയും, മൂന്നാം സ്ഥാനം നേടുന്ന വിദ്യാർത്ഥികൾക്ക് 1000 രൂപയും പ്രോത്സാഹന തുകയായി നൽകും.

പാസ്സ് സർട്ടിഫിക്കറ്റിന്റെയും മാർക്ക് ലിസ്റ്റിന്റെയും സാക്ഷ്യപ്പെടുത്തിയ പകർപ്പ്,  രക്ഷാകർത്താവിന്റെ ക്ഷേമനിധി ബോർഡ് പാസ്സ് ബുക്കിന്റെ ഫോട്ടോ പതിച്ച  പേജ്, കുടുംബ വിവര പേജ്, വിഹിതമടവ് രേഖപ്പെടുത്തിയിട്ടുള്ള പേജ് എന്നിവയുടെ പകർപ്പ്, 3. വിദ്യാർഥിയുടെ ആധാർ പകർപ്പ്, വിദ്യാർഥിയുടെ ബാങ്ക് പാസ്ബുക്കിന്റെ പകർപ്പ്, പാസ്‌പോർട്ട് സൈസ് കളർ ഫോട്ടോ (2 എണ്ണം) എന്നിവയാണ് ഹാജരാക്കേണ്ട രേഖകൾ. 2 സെറ്റ് അപേക്ഷകൾ അനുബന്ധ രേഖകൾക്കൊപ്പം മത്സ്യത്തൊഴിലാളി ക്ഷേമനിധി ബോർഡിന്റെ ഫിഷറീസ് ഓഫീസുകളിൽ മേയ് 20ന് മുമ്പ് ഹാജരാക്കണം.