തദ്ദേശസ്വയംഭരണ സ്ഥാപനങ്ങളിലേക്കുള്ള പൊതു തെരഞ്ഞെടുപ്പിന് മുന്നോടിയായി വരണാധികാരികൾക്കും ഉപവരണാധികാരികൾക്കും വിവിധ വിഷയങ്ങളിലുള്ള പരിശീലനത്തിന് ജില്ലയില് തുടക്കമായി. ജില്ലാ പഞ്ചായത്ത് കോൺഫറൻസ് ഹാളിൽ നടന്ന പരിശീലന പരിപാടി ജില്ലാ കളക്ടർ അലക്സ് വർഗീസ് ഉദ്ഘാടനം ചെയ്തു. ജില്ലാ പഞ്ചായത്ത്, ആലപ്പുഴ നഗരസഭ വരണാധികാരികൾ, ഉപ-വരണാധികാരികൾ, തൈക്കാട്ടുശ്ശേരി, പട്ടണക്കാട്, കഞ്ഞിക്കുഴി എന്നീ ബ്ലോക്കുകളിലെയും അവയ്ക്ക് കീഴിൽ വരുന്ന പഞ്ചായത്തുകളിലെയും വരണാധികാരികൾ, ഉപ-വരണാധികാരികൾ, ജില്ലാതല ഉദ്യോഗസ്ഥർ, പഞ്ചായത്ത് സെക്രട്ടറിമാർ തുടങ്ങിയവർ പരിശീലനത്തിൽ പങ്കെടുത്തു.
തിരഞ്ഞെടുപ്പ് വിഭാഗം ഡെപ്യൂട്ടി കളക്ടർ എസ് ബിജു അധ്യക്ഷനായി. ‘തെരഞ്ഞെടുപ്പ് നടപടി ക്രമങ്ങൾ’ എന്ന വിഷയത്തിൽ എൽഎസ്ജിഡി ഇന്ത്യൻ വിജിലൻസ് ഓഫീസർ പി പി ഉദയസിംഹൻ, എൽഎസ്ജിഡി ജൂനിയർ സൂപ്രണ്ട് എം ഡി കരൺ എന്നിവർ പരിശീലനം നൽകി. എൽഎസ്ജിഡി സീനിയർ സൂപ്രണ്ട് ബിനു ഗോപാൽ മാതൃക പെരുമാറ്റച്ചാട്ടം, ഹെഡ് ക്ലർക്ക് എം എസ് നിയാസ് ഇലക്ട്രോണിക് വോട്ടിംഗ് മെഷീൻ, എൽഎസ്ജിഡി ടെക്നിക്കൽ അസിസ്റ്റൻ്റ് ദീപു കൃഷ്ണൻ ഐടി ആപ്ലിക്കേഷൻസ് എന്നിവയിൽ പരിശീലനം നല്കി. ജില്ലാ ട്രെയിനിങ് നോഡൽ ഓഫീസറും അമ്പലപ്പുഴ തഹസിൽദാറുമായ എസ് അൻവർ, മറ്റ് ഉദ്യോഗസ്ഥർ തുടങ്ങിയവർ പങ്കെടുത്തു.
ഒക്ടോബർ എട്ടിന് കായംകുളം, ഹരിപ്പാട്, മാവേലിക്കര എന്നീ നഗരസഭകൾ, ആര്യാട്, അമ്പലപ്പുഴ, ചമ്പക്കുളം എന്നീ ബ്ലോക്കുകളിലെയും അവയ്ക്ക് കീഴിൽ വരുന്ന പഞ്ചായത്തുകളിലെയും വരണാധികാരികൾ, ഉപ-വരണാധികാരികൾ എന്നിവർക്ക് പരിശീലനം നൽകും. ഒമ്പതിന് വെളിയനാട്,ചെങ്ങന്നൂർ, ഹരിപ്പാട് എന്നീ ബ്ലോക്കുകളിലെയും അവയ്ക്ക് കീഴിൽ വരുന്ന പഞ്ചായത്തുകളിലെയും വരണാധികാരികൾക്കും ഉപ വരണാധികാരികൾക്കും പരിശീലനം നൽകും. 10 ന് ചേർത്തല നഗരസഭ, മാവേലിക്കര, ഭരണിക്കാവ്, മുതുകുളം എന്നീ ബ്ലോക്കുകളിലെയും അവയ്ക്ക് കീഴിൽ വരുന്ന പഞ്ചായത്തുകളിലെയും വരണാധികാരികൾ, ഉപവരണാധികാരികൾ എന്നിവർക്ക് പരിശീലനം നൽകും.