പതിനാലാം പഞ്ചവത്സര പദ്ധതിയുടെ ഭാഗമായി സുൽത്താൻ ബത്തേരി നഗരസഭയുടെ വിദ്യാഭ്യാസ മേഖലയിലെ പദ്ധതികൾക്ക് ആശയരൂപീകരണം നൽകുന്നതിനായി സംഘടിപ്പിച്ച സ്റ്റുഡന്റ്‌സ് കൗൺസിൽ ശ്രദ്ധേയമായി. നഗരസഭാ ചെയർമാൻ ടി.കെ രമേശ് ഉദ്ഘാടനം ചെയ്തു. പദ്ധതികളുടെ പ്രധാന ഗുണഭോക്താക്കളായ വിദ്യാർഥികളുടെ അഭിപ്രായങ്ങൾക്കും നിർദ്ദേശങ്ങൾക്കും പ്രാധാന്യം നൽകിയാണ് പരിപാടി സംഘടിപ്പിച്ചത്. കുട്ടികളും രക്ഷിതാക്കളും അധ്യാപകരും മറ്റ് ജീവനക്കാരും സന്തോഷത്തോടെ പ്രവർത്തിക്കുന്ന വിദ്യാലയങ്ങൾ സൃഷ്ടിക്കുകയാണ് നഗരസഭ ലക്ഷ്യമിടുന്നത്.

​നഗരസഭാ പരിധിയിലെ 8350 വിദ്യാർഥികളെ പ്രതിനിധീകരിച്ച് എൽ.പി വിഭാഗത്തിൽ നിന്ന് ഏഴും യു.പി വിഭാഗത്തിൽ നിന്ന് ആറും ഹൈസ്‌കൂൾ വിഭാഗത്തിൽ നിന്ന് ഏഴും ഹയർ സെക്കൻസറി വിഭാഗത്തിൽ നിന്ന് നാലും ഉൾപ്പെടെ 25 നൂതന ആശയങ്ങളാണ് കൗൺസിലിൽ അവതരിപ്പിച്ചത്. ഓരോ ആശയവും അഞ്ച് വിദ്യാർഥികൾ അഞ്ച് മിനിറ്റ് കൊണ്ട് നഗരസഭാ ഭരണസമിതിക്ക് മുന്നിൽ അവതരിപ്പിക്കുകയായിരുന്നു. ​വിദ്യാർഥികളിൽ നിന്ന് ലഭിക്കുന്ന മികച്ച ആശയങ്ങൾ സ്‌കൂളുകളിൽ നടപ്പാക്കുന്നതിനായി നഗരസഭ പ്രത്യേക സാമ്പത്തിക സഹായവും പ്രഖ്യാപിച്ചിട്ടുണ്ട്. എൽ.പി. വിഭാഗത്തിന് 10,000 രൂപയും, യു.പി. വിഭാഗത്തിന് 20,000 രൂപയും, ഹൈസ്കൂൾ വിഭാഗത്തിന് 30,000 രൂപയും, ഹയര്‍ സെക്കൻഡറി വിഭാഗത്തിന് 40,000 രൂപയും പദ്ധതിയിലൂടെ സ്‌കൂളുകൾക്ക് നൽകും.

എൽ.പി വിഭാഗത്തിൽ സ്കൂൾ സൗന്ദര്യവത്കരണത്തിൻ്റെ മികച്ച മാതൃക അവതരിപ്പിച്ച ബീനാച്ചി ജി.എച്ച്.എസും യു.പി വിഭാഗത്തിൽ ആർച്ചറി പരിശീലനത്തിലൂടെ കായിക മികവിനൊപ്പം സ്കൂളുകളിലെ കൊഴിഞ്ഞ് പോക്ക് തടയാമെന്ന വേറിട്ട ആശയം അവതരിപ്പിച്ച ഓടപ്പള്ളം ജി.എച്ച്.എസും ഒന്നാം സ്ഥാനം നേടി. ഹൈസ്കൂൾ വിഭാഗത്തിൽ ഗണിതം മധുരം എന്ന നൂതനാശയം അവതരിപ്പിച്ച സർവജന ഹൈസ്കൂളിനും, ഡിജിറ്റൽ പെയിൻ്റിങിലൂടെ മൂല്യവർദ്ധിത ഉത്പന്നങ്ങൾ ഉണ്ടാക്കി വിൽപന നടത്താമെന്ന നൂതനാശയം അവതരിപ്പിച്ച സർവജന വി.എച്ച്.എസ്.സി. വിഭാഗത്തിന് ഹയര്‍ സെക്കൻഡറി തലത്തിലും ഒന്നാം സ്ഥാനം ലഭിച്ചു.

വിജയികൾക്കുള്ള സമ്മാന വിതരണം ജില്ലാ പ്ലാനിംഗ് ഓഫീസർ എം. കമാലുദ്ദീൻ നിർവഹിച്ചു. നഗരസഭാ സ്ഥിരം സമിതി അംഗങ്ങളായ ടോം ജോസ്, പി.എസ് ലിഷ, കെ. റഷീദ്, സാലി പൗലോസ്, വിവിധ കക്ഷിനേതാക്കളായ എം. ആരിഫ്, കെ.സി യോഹന്നാൻ, ഡി.ഇ.ഒ സി.വി മൻമോഹൻ, എസ്.എസ്.കെ ഡി.പി.സി അനിൽ കുമാർ, ഹയർ സെക്കൻഡറി കോ-ഓർഡിനേറ്റർ ഷിവി കൃഷ്ണൻ, ഡെപ്യൂട്ടി പ്ലാനിംഗ് ഓഫീസർ കെ. എസ് ശ്രീജിത്ത്, എ.ഇ.ഒ ബി.എസ് ഷിജിത, ടി. രാജൻ, നിർവഹണ ഉദ്യോഗസ്ഥൻ പി.എ അബ്ദുൾ നാസർ, കോ-ഓർഡിനേറ്റർ ടി.ജി സജി, നഗരസഭാ കൗൺസിലർമാർ, പ്രധാനാധ്യാപകർ എന്നിവർ സംസാരിച്ചു.