പി.എന്‍ പണിക്കര്‍ സ്മരണാര്‍ഥം നടക്കുന്ന വായനപക്ഷാചരണത്തിന്റെ ഭാഗമായി ജില്ലാ ഇന്‍ഫര്‍മേഷന്‍ ഓഫീസിന്റെ ആഭിമുഖ്യത്തില്‍ ഇന്റഗ്രേറ്റഡ് ട്രൈബല്‍ ഡെവലപ്മെന്റ് പ്രൊജക്ട് ഐ.ടി.ഡി.പി.യുടെ സഹകരണത്തോടെ അട്ടപ്പാടിയിലെ പ്രീ-മെട്രിക്, പോസ്റ്റ് മെട്രിക് ഹോസ്റ്റല്‍, എം.ആര്‍.എസ് വിദ്യാര്‍ഥികള്‍ക്ക് ‘അട്ടപ്പാടിയിലെ വികസന കാഴ്ചപ്പാടും തങ്ങള്‍ ചെയ്യാന്‍ ഉദ്ദേശിക്കുന്നതും’ എന്ന വിഷയത്തില്‍ കുറിപ്പെഴുതാന്‍ അവസരം നല്‍കി. രാവിലെ 11 മുതല്‍ ഉച്ചയ്ക്ക് ഒന്ന് വരെ മുക്കാലി മോഡല്‍ റസിഡന്‍ഷ്യല്‍ സ്‌കൂളില്‍ നടന്ന കുറിപ്പെഴുത്തില്‍ അട്ടപ്പാടിയുടെ വിവിധ ഭാഗങ്ങളില്‍ നിന്നുള്ള 40 ഓളം വിദ്യാര്‍ഥികള്‍ പങ്കെടുത്തു.
വായനപക്ഷാചരണത്തിന്റെ ഭാഗമായി ജില്ലാ ഇന്‍ഫര്‍മേഷന്‍ ഓഫീസിന്റെ ആഭിമുഖ്യത്തില്‍ അട്ടപ്പാടിയിലെ പ്രീ-മെട്രിക്, പോസ്റ്റ് മെട്രിക് ഹോസ്റ്റല്‍, എം.ആര്‍.എസ് വിദ്യാര്‍ഥികള്‍ ‘അട്ടപ്പാടിയിലെ വികസന കാഴ്ചപ്പാടും തങ്ങള്‍ ചെയ്യാന്‍ ഉദ്ദേശിക്കുന്നതും’ എന്ന വിഷയത്തില്‍ കുറിപ്പെഴുതുന്നു.മികച്ച നിര്‍ദേശങ്ങളടങ്ങിയ കുറിപ്പുകളെഴുതുന്ന വിദ്യാര്‍ഥികള്‍ക്ക് ജില്ലാ പഞ്ചായത്ത് പ്രസിഡന്റ് അഡ്വ.കെ. ശാന്തകുമാരി, ജില്ലാ കലക്ടര്‍ ഡി. ബാലമുരളി, അട്ടപ്പാടി നോഡല്‍ ഓഫീസര്‍ കൂടിയായ ഒറ്റപ്പാലം സബ് കലക്ടര്‍ ജെറോമിക് ജോര്‍ജ്ജ് എന്നിവരുമായി മുഖാമുഖം നടത്താന്‍ അവസരമൊരുക്കും. അട്ടപ്പാടി ബ്ലോക്ക് പഞ്ചായത്ത് പ്രസിഡന്റ് ഈശ്വരിരേശനും മലയാള ഭാഷാ വൈദഗ്ധ്യമുള്ള രണ്ട് പേരടങ്ങുന്ന ടീമും മികച്ച നിര്‍ദേശങ്ങളടങ്ങിയ കുറിപ്പുകള്‍ തെരഞ്ഞെടുക്കും. ജില്ലാ ഇന്‍ഫര്‍മേഷന്‍ ഓഫീസര്‍ പ്രിയ കെ. ഉണ്ണികൃഷ്ണന്‍, അട്ടപ്പാടി ഐ.ടി.ഡി.പി. പ്രോജക്ട് ഓഫീസര്‍ കൃഷ്ണപ്രകാശ്, മുക്കാലി മോഡല്‍ റസിഡന്‍ഷ്യല്‍ സ്‌കൂള്‍ ഹെഡ്മാസ്റ്റര്‍ പി.പി.പ്രസാദ്, മോഡല്‍ റസിഡന്‍ഷ്യല്‍ സ്‌കൂള്‍ സീനിയര്‍ സൂപ്രണ്ട് ബി.സി. അയ്യപ്പന്‍, അസിസ്റ്റന്റ് ഇന്‍ഫര്‍മേഷന്‍ ഓഫീസര്‍ കെ.സുമ, ഇന്‍ഫര്‍മേഷന്‍ അസിസ്റ്റന്റ് ജെ.അക്ഷര എന്നിവര്‍ പരിപാടിക്ക് നേതൃത്വം നല്‍കി.